ދެކުނު އެމެރިކާ ސަރަހައްދުގެ ފީފާ ވޯލްޑް ކަޕް ކޮލިފައިންގައި ޕެރަގުއޭ އަތުން 1-0 ގެ ނަތީޖާއަކުން ބަލިވެ، ތާވަލުގެ ފަސްވަނައަށް ބްރެޒިލް ވެއްޓިއްޖެއެވެ.
މިއީ މި ފަހަރުގެ ކޮލިފައިންގައި ބްރެޒިލް އެންމެ ފަހުން ކުޅުނު ފަސް މެޗުގެ ތެރެއިން ބަލިވި ހަތަރުވަނަ ފަހަރެވެ. މޮޅުވީ މި މަހުގެ 7 ވަނަ ދުވަހު އަމިއްލަ ދަނޑުގައި އެކުއޭޑޯ އަތުންނެވެ.
މި ނަތީޖާއާއެކު، ދުނިޔޭގެ ޗެމްޕިއަންކަން ފަސް ފަހަރު ކާމިޔާބުކޮށްފައިވާ ބްރެޒިލަށް ކޮލިފައިންގައި މިހާތަނަށް ކުޅުނު އަށް މެޗުން ލިބިފައިވަނީ 10 ޕޮއިންޓެވެ. ބްރެޒިލް ފަސްވަނައިގައި އޮތްއިރު، ހައެއްގައި އޮތް ވެނެޒުއެލާގެ ކުރި އެ ޓީމަށް ލިބެނީ ފައިދާ ގޯލްގެ ތަފާތުންނެވެ. އެންމެ ކުރީގައި އުޅޭ ވާދަވެރި އާޖެންޓީނާ އަށް 18 ޕޮއިންޓް ލިބިފައިވާއިރު، ކޮލަމްބިއާ ދެވަނައިގައި އޮތީ 16 ޕޮއިންޓާއެކު އެވެ. ތިނެއްގައި އޮތް އުރުގުއޭ އަށް 15 ޕޮއިންޓް ލިބިފައިވާއިރު، އެކުއޭޑޯ އޮތީ 11 ޕޮއިންޓާއެކު ހަތަރުވަނައިގައެވެ.
ބްރެޒިލުން މި މެޗަށް ނިކުތީ އެންމެ ފަހުން އަމިއްލަ ދަނޑުގައި އެކުއޭޑޯއާ ދެކޮޅަށް ކުޅުނު މެޗުގެ ފުރަތަމަ އެގާރައަށް އެންމެ ބަދަލެއް ގެނެސްގެންނެވެ. އެ މެޗުގެ ފުރަތަމަ އެގާރައިގައި ހިމެނުނު ބޮޓަފޯގޯގެ ވިންގް، ލުއިޒް ހެންރީކްގެ ބަދަލުގައި ޕެރަގުއޭ މެޗުން ފުރުޞަތު ދީފައިވަނީ ރެއާލް މެޑްރިޑަށް ކުޅެމުންއަންނަ ޒުވާން ފޯވާޑް، އެންޑްރިކް އަށެވެ. ބްރެޒިލް ޓީމަށް މިވަގުތު ދިމާވެފައިވާ އެންމެ ބޮޑު މައްސަލައަކީ އަނިޔާގެ ސަބަބުން ނޭމާ އަށް ނުކުޅެވުމެވެ.
ޕެރަގުއޭގެ ދަނޑުގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑު، ފުރަތަމަ ހާފުގެ 20 ވަނަ މިނެޓުގައި އެ ޓީމަށް ކާމިޔާބުކޮށްދިނީ އެމެރިކާގެ މޭޖާ ލީގު ސޮކާގެ އިންޓަ މިއާމީ އަށް ކުޅެމުންއަންނަ ވިންގް، ޑިއޭގޯ ގޮމޭޒް އެވެ.
މި ހާފުގައި ޕެރަގުއޭގެ ގޯލަށް އަމާޒުކޮށް އެންމެ ހަމަލާއެއްވެސް ބްރެޒިލަށް ފޮނުވާލެވިފައިނުވާއިރު، މުޅި މެޗުގައި އެ ޓީމުން ގޯލަށް އަމާޒުކޮށް ފޮނުވާލި ތިން ހަމަލާވެސް ފެނިގެންދިޔައީ ފަހު ހާފުގައި ވިނީޝިއުސް ޖޫނިއާގެ ފަރާތުންނެވެ.
މެޗަށްފަހު ބްރެޒިލްގެ ޑިފެންޑަރު، މާކީނޯސް ވަނީ، އަދިވެސް ކޯޗު މަސައްކަތްކުރަމުންއެދަނީ ބްރެޒިލްގެ ކުޅުންތެރިންނަށް އެންމެ ރަނގަޅަށް ކުޅޭނެ ގޮތް ދެނެގަތުމަށް ކަމަށެވެ. މިވަގުތު އޮތް ޓީމުގައި އައު ގިނަ ކުޅުންތެރިންތަކެއް އެބަތިބި ކަމަށާއި، ހަމައެކަނި މަދުވަނީ އިތުބާރު ކަމަށް ވެސް މާކީނޯސް ބުންޏެވެ.
"ކޮލިފައިވުމަކީ ފަސޭހަކަމެއް ނޫން، މިއީ އުނދަގޫ ދަނޑިވަޅެއް. އަދި އަހަރެމެންނަށް މިކަން މެނޭޖްކުރަން އެނގޭ،"
"މިވަގުތު އެންމެ އިތުބާރާއެކު ނުކުޅެވޭ. ކުރިއަށް އޮތް ތާނގާއި، ބުރަކޮށް މަސައްކަތްކޮށް ނަތީޖާ ރަނގަޅު ކުރުމަށް މަސައްކަތްކުރާނަން. ދަނޑުމަތީގައި ރަނގަޅު ނަތީޖާއެއް ހޯދުމަކީ ހުރިހާ ކަމެއް ދެވޭނެ ޖަވާބަކީ،" ނިންމާލަމުން މާކީނޯސް ބުންޏެވެ.
ބްރެޒިލްގެ މިހާރު ކޯޗު، ޑޮރިވާލް ޖޫނިއާ އެ މަގާމާ ހަވާލުވީ، 2022 ވަނަ އަހަރުގެ ފީފާ ވޯލްޑް ކަޕަށް ފަހު އޭރުގެ ކޯޗު، ޓީޓޭ މަގާމުން ވަކިވުމުންނެވެ.
ދެކުނު އެމެރިކާ ސަރަހައްދުގެ ކޮލިފައިންގ ބުރުގެ މެޗުތައް ކުޅެ ނިމޭއިރު، އެންމެ ކުރީގައި އުޅޭ ހަ ޓީމަކަށް އެމެރިކާ، މެކްސިކޯ އަދި ކެނެޑާގައި ބާއްވާ ވޯލްޑް ކަޕުން އޮޓޮމެޓިކް ޖާގަ ލިބިގެންދާނެ އެވެ. އެއަށްފަހު، ހަތްވަނައިގައި އޮންނަ ޓީމަށް ޖެހޭނީ ޕްލޭ-އޮފް ބުރުގައި ވާދަކުރާށެވެ.
ކޮލިފައިންގައި ބްރެޒިލުން ދެން ކުޅޭ މެޗުގައި އަންނަ އޮކްޓޫބަރު މަހުގައި އެންމެ ފުރަތަމަ ބައްދަލުކުރާނީ ޗިލީއާ އެވެ. އެއަށްފަހު، އެ ޓީމު ދެން ނިކުންނާނީ ޕެރޫއާ ދެކޮޅަށެވެ.