ކުޅިވަރު އެސޯސިއޭޝަނެއްގެ އިންތިޚާބަށް މި ސަރުކާރުން ނުފޫޒު ނުފޯރުވާނެ ކަމަށާއި، ނަމަވެސް އެއްވެސް އެސޯސިއޭޝަނަކަށް ރާއްޖޭގެ ގާނޫނު ތަކަށްވުރެ މަތިން މަސައްކަތް ނުކުރެވޭނެ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ. ވަޒީރު މިހެން ވިދާޅުވީ ރައީސް އޮފީހުގައި މިއަދު މެންދުރުފަހު ބޭއްވި ނޫސްވެރިންގެ ބައްދަލުވުމުގެ ތެރެއިން، ނޫސްވެރިއަކު ކުރެއްވި ސުވާލަކަށް ޖަވާބުދެއްވަމުންނެވެ.
ވަޒީރު ވިދާޅުވީ އެއްވެސް ކަހަލަ ސިޔާސީ ނުފޫޒެއް އެސޯސިއޭޝަނެއްގެ އިންތިޚާބަށް ނުފޯރުވާނަ ކަމަށާއި، އެސޯސިއޭޝަންތައް ހިންގަން ޖެހޭނީ އަމިއްލަ މުއައްސަސާއެއްގެ ގޮތުގައި ކަމަށެވެ. އެހެން ނަމަވެސް ގާނޫނާ ގަވާއިދާ ޚިލާފު ކަމެއް އެސޯސިއޭޝަނަކުން ކުރާނަމަ، އެސޯސިއޭޝަންތަކުގެ ބެލެނިވެރި ފަރާތް ސްޕޯޓްސް ކޮމިޝަނުން އެކަމަށް ތަދައްޚުލްވާނެ ކަމަށްވެސް ވިދާޅުވިއެވެ.
ވަޒީރު ވިދާޅުވީ ދިވެހިރާއްޖޭގެ ގާނޫނާ ގަވާއިދާ އެއްގޮތަށް އެސޯސިއޭޝަންތަކުންވެސް އަމަލުކުރަން ޖެހޭނެ ކަމަށެވެ. އަދި ބައެއް އެސޯސިއޭޝަންތަކުން ކޯޓުތަކަށް މައްސަލަ ހުށަހަޅާއިރު، އެ ބާރު ލިބެނީ ގަވާއިދުތައް ހެދިފައި ހުރި ގޮތުން، ފުށުއަރާ މާއްދާތަކެއް ހުރުމުގެ ސަބަބުން ކަމަށާއި، އެކަންކަން ރަނގަޅުކުރުމުން ދިގު މުއްދަތަކަށް ހައްލު ލިބިގެންދާނެ ކަމަށްވެސް ވިދާޅުވިއެވެ.
މިދިޔަ ދުވަސްތަކުގައި ވަނީ ރާއްޖޭގެ ގިނަ ކުޅިވަރު އެސޯސިއޭޝަންތަކެއްގެ އިންތިޚާބުގެ މައްސަލަތައް ފެންމަތިވެފައެވެ. އަދި އެކި ސަބަބުތަކާ ހުރެ އިންތިޚާބު ކުރިއަށް ނުގެންދެވި، ހުއްޓިފައިވާއިރު، ބައެއް ކުޅިވަރު އެސޯސިއޭޝަންތަކާ ގުޅޭ ކޮރަޕްޝަންގެ މައްސަލަތަށްވެސް އަންނަނީ ތަހުގީގުކުރަމުންނެވެ.
ނޫސްވެރިންގެ މި ބައްދަލުވުމުގައި ނޫސްވެރިއަކު ކުރެއްވި ސުވާލަކަށް ޖަވާބުދެއްވަމުން ކޮމިޝަނަރ އޮފް ސްޕޯޓްސް މުޙައްމަދު ޠަލާލް ވިދާޅުވީ މިހާތަނަށް އައިރު މި ސަރުކާރުން ސިޔާސީ ގޮތުން އެއްވެސް މަންފާއެއް ހޯދުމުގެ ގޮތުން އެސޯސިއޭޝަނެއް މެދުވެރިކޮށް އެއްވެސް ކަމެއް ކޮށްފައި ނުވާނެ ކަމަށެވެ. އަދި އެސޯސިއޭޝަންތަކުގައި ހުރި މައްސަލަތަށް މިއަދު ފެންމަތިވީ ޒަމާނުއްސުރެ ބައެއް އެސޯސިއޭޝަންތަކުގައި ހުރި މައްސަލަތަކެއް ހައްލުނުވެ، މިއަދު އެކަންކަން ބަލައި، އެއަށް ފިޔަވަޅު އަޅަން ނުވަތަ ގަވާއިދާ އެއްގޮތަށް ކަންކަން ކުރަން މަސައްކަތްކުރަން ފެށުމުން ކަމަށްވެސް ވިދާޅުވިއެވެ.
ޠަލާލް ވިދާޅުވީ އެ މައްސަލަތަށް ފެންމަތިވެގެން އައީ ކުޅިވަރުގެ ގާނޫނުގެ ދަށުން ހެދިފައި ހުރި ގަވާއިދުތަކާއި، އެސޯސިއޭޝަންތަކުގެ ހިންގާ ގަވާއިދުތަކާއި އުސޫލުތަކުގައި ތައާރުޒުވާ ކަންތައްތަކެއް ހުރުމުން ކަމަށެވެ. އެހެންކަމުން ގެންނަން ޖެހޭ ބަދަލުތައް ގެނެސްދިނުމަށް އެދި އެކަންކަން ފާހަގަކޮށް ކުޅިވަރާ ބެހޭ ގައުމީ މަޖިލީހަށް ފޮނުވާފައިވާނެ ކަމަށާއި، އަވަސް މުސްތަގުބަލެއްގައި އެ ގަވާއިދުތައް ބަދަލުވެގެން އަންނާނެ ކަމަށް ގަބޫލުކުރައްވާ ކަމަށްވެސް ވިދާޅުވިއެވެ.
ކުޅިވަރު އެސޯސިއޭޝަންތަކުގެ ގިނަ މައްސަލަތަކެއް މި ފަހުން ފެންމަތިވެފައިވާއިރު، ކުޅިވަރު ގާނޫނުގެ ދަށުން އަންނަން ޖެހޭ ސްޕޯޓްސް އާބިޓްރޭޝަން އަދިވެސް ވުޖޫދުވެފައެއް ނުވެއެވެ.