އެފްއޭއެމް ނޯމަލައިޒިން ކޮމިޓީން އެދުމުން ޖީއެސްގެ މަގާމުގައި ޖައުޝަން މި ވަގުތަށް މަޑުކުރަނީ
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޖެނެރަލް ސެކްރެޓަރީގެ ވަޒީފާއިން އިސްތިއުފާ ނުދެއްވާ ކަަމަށާއި، ނަމަވެސް ވަޒީފާގެ އެއްބަސްުން އައުކުރަން ބޭނުންނުވާކަން އަންގާފައިވާނެ ކަމަށް އެ މަގާމުގައި ހުންނެވި މުޙައްމަދު ޖައުޝަން ޝަރީފް (ޖައު) ވިދާޅުވެއްޖެއެވެ.
"ޕީއެސްއެމް ސްޕޯޓްސް" އާ ވާހަކަދައްކަވަމުން ޖައުޝަން ވިދާޅުވީ ނޯމަލައިޒޭޝަން ކޮމެޓީ އައްޔަނުވުމުގެ ކުރިންވެސް މިވާހަކަ ފީފާ އާއި ހިއްސާކޮށްފައިވާ ކަމަށާއި ކޮމެޓީ އައްޔަނު ކުރަންވާއިރަށް ހޭންޑްއޯވާ ރިޕޯޓް ތައްޔާރުކޮށް ފީފާ އަދި އޭއެފްސީ ހިއްސާކޮށްފައިވާނެ ކަމަށެވެ. އަދި ކޮމެޓީ އައްޔަނުވުމަށްފަހު މިކަންކަން ކޮމެޓީ އާއި އަދި ޗެއަރމަން އާއި ހިއްސާކޮށްފައިވާނެ ކަމަށްވެސް ވިދާޅުވިއެވެ.
ނޯމަލައިޒޭޝަން ކޮމިޓީން ވަނީ މިވަގުތަށް އެ މަގާމުގައި ޖައުޝަން މަޑުކުރުމަށް އެދިވަޑައިގެންފައެވެ. ޖައުޝަން ވިދާޅުވީ މިކަމުގައި ފީފާ އާއި ކޮމެޓީ އަދި ކޮމެޓީގެ ޗެއަރމަން ވެސް މަޑުކޮށްދިނުމަށް އެދިވަޑައިގެންފައިވާ ކަމަށާއި އެފްއޭ އޮތް ހާލަތުން ކަންކަން ތަރުތީބު ކުރުމަށްޓަކައި ކޮމެޓީއާއި އެކު މަސައްކަތް ކޮށްދިނުމަށް ފީފާ އަދި ކޮމެޓީންވެސް އެދިފައިވާ ކަމަށެވެ.
އެހެންކަމުން ފީފާ އާއި ކޮމެޓީ އަދި ކޮމެޓީގެ ޗެއަރމަންގެ އެދުމުގެ މަތިންނާއި ފުޓުބޯޅައަށް މަސައްކަތްތަކެއް ކޮށްދިނުމުގެ ހެޔޮ ނިޔަތުގައި އަދި މިވަގުތު އެފްއޭގައި މަޑުކުރުމަށް ނިންމާފައިވާ ކަމަށް ޖައުޝަން ވިދާޅުވިއެވެ.
އެފްއޭއެމްގެ ޖެނަރަލް ސެކްރެޓަރީގެ މަގާމަށް ޖައުޝަން އެންމެ ފުރަތަމަ އައްޔަން ކުރީ، އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލްގެ ދައުރުގައި މިދިޔަ އަހަރުގެ ނޮވެމްބަރު މަހު އެވެ. އެއީ އަށް އަހަރު ވަންދެން ޖެނަރަލް ސެކްރެޓަރީގެ މަގާމު އަދާކުރި ޔޫތު މިނިސްޓްރީގެ މިހާރުގެ ޑެޕިއުޓީ މިނިސްޓަރު ހުސައިން ޖަވާޒު މަގާމުން އިސްތިއުފާ ދެއްވުމުންނެވެ. އޭގެ ކުރިން އެފްއޭއެމްގެ ލީގަލް މަގާމެއް ވެސް ޖައުޝަން އަދާކުރެއްވިއެވެ.