ފްރާންސްގެ ވެރިރަށް ޕެރިހުގައި ބޭއްވި އޮލިމްޕިކްސްގެ ޕެރަ ގޭމްސްގައި ރާއްޖެ ތަމްސީލުކުރި ދެ ދުވުންތެރިން ކަމަށްވާ ފާތިމަތު އިބްރާހީމް (ފާތުން) އާއި އަބްދުލް ރައްޒާގު އަބްދުލް ސަމަދު ހޯދި ކާމިިޔާބީ ފާހަގަކުރައްވައި، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ހިތްވަރުދެއްވައިފިއެވެ.
މި ފަހަރުގެ ގޭމްސްގައި ދިވެހި ދިދަ މި ދެ ދުވުންތެރިން ވިހުރުވާލިއިރު، ރާއްޖޭގެ ޕެރަ އެތުލީޓުން ވަނީ ގޭމްސްގައި ރަނގަޅު ނަތީޖާތަކެއް ނެރެފައެވެ. އެގޮތުން އަބްދުލް ރައްޒާގު ވަނީ ފިރިހެނުންގެ 100 މީޓަރު ދުވުމުގައި ވާދަކޮށް، 14.46 ސިކުންތުން ރޭސް ނިންމައި، ހީޓުގެ ތިންވަނަ ހޯދާފައެވެ. މިއީ އަބްދުލް ރައްޒާގުގެ ޕާސަނަލް ރިކޯޑެކެވެ. މީގެ އިތުރުން ފާތުން ވަނީ އަންހެނުންގެ 100 މީޓަރު ދުވުން 17:10 ސިކުންތުން ނިންމައި، ޕެރަ އިވެންޓުގެ ގައުމީ ރިކޯޑެއް ހަދާފައެވެ.
ޕެރަލިމްޕިކް ގޭމްސްގައި ވާދަކުރުމުގެ ފުރުސަތު މި ދެ ދުވުންތެރިންނަށް ލިބުނީ ރާއްޖޭގެ ރޭންކިންގެ އެންމެ ކުރީގައި އޮތް ދެ ދުވުންތެރިންނަށް ވާތީއެވެ. މި ދެ ދުވުންތެރިން ވަނީ މިދިޔަ އަހަރު މަޑަގަސްކަރައިގައި ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައިވެސް ރާއްޖެ ތަމްސީލުކޮށްފައެވެ. އަދި އެ ގޭމްސްގައި އެ ދުވުންތެރިން ވަނީ ރާއްޖެއަށް ލޯ މެޑަލް ހޯދައިދީފައެވެ.
އޮލިމްޕިކްސްގެ ޕެރަ ކަޓެގަރީ ނުވަތަ ޕެރަލިމްޕިކްސްއަކީ ނުކުޅެދޭ މީހުންނަށް ޚާއްސަކޮށް، ދުނިޔޭގެ އޮލިމްޕިކް ކައުންސިލުން ބާއްވާ ގޭމްސްއެކެވެ. މި ފަހަރުގެ ގޭމްސްގައި ރާއްޖޭގެ ދެ އެތުލީޓަކުން ވާދަކުރިއިރު، ޖަޕާނުގައި 2021 ގައި ބޭއްވި ޕެރަލިމްޕިކްސްގައިވެސް ފާތުން ވަނީ ރާއްޖެ ތަމްސީލުކޮށްފައެވެ. އެއީ ރާއްޖޭގެ އެތުލީޓަކު އެންމެ ފުރަތަމަ ވާދަކުރި ޕެރަލިމްޕިކްސްއެވެ.