2024 ވަނަ އަހަރުގެ ބަލޮންޑޯ އެވޯޑްގެ 30 ކުޅުންތެރިންގެ ޝޯޓްލިސްޓްގައި ނުހިމެނުމުން ރެއާލް މެޑްރިޑަށް ކުޅެމުންއަންނަ ބްރެޒިލްގެ ވިންގް، ރޮޑްރީގޯ ހިތްހަމަނުޖެހިއްޖެއެވެ.
ރޮޑްރީގޯ، 23، ވަނީ، އޭނާ ޝޯޓްލިސްޓުގައި ނުހިމެނުމުން ހިތްހަމަނުޖެހޭ ކަމަށާއި، އޭނާ އަށް ހައްގުވާ ކަމަށް ބުނެފައެވެ.
"އަހަރެން ހިތްހަމަނުޖެހޭ، އަހަރެންނަށް ހައްގުވާކަމަށް ހީވޭ." އީއެސްޕީއެން އަށް ދިން އިންޓަވިއުއެއްގައި ރޮޑްރީގޯ ބުންޏެވެ.
ރޮޑްރީގޯ ބުނީ، ކޮންމެހެން ނޮމިނޭޓްވެފައި ތިބި ކުޅުންތެރިންގެ ފެންވަރު ދަށްކުރުމަށް ނޫން ކަމަށާއި، އެ ކުޅުންތެރިންނެކޭ އެއްފަދައިން ނޮމިނޭޓްވި 30 ކުޅުންތެރިންގެ ތެރޭގައި އޭނާ ވެސް ހިމެނެންޖެހޭނެ ކަމަށެވެ.
ނިމިދިޔަ ސީޒަނުގައި ރެއާލުން ސްޕެނިޝް ލަލީގާގެ އިތުރުން ޔުއެފާ ޗެމްޕިއަންސް ލީގު ކާމިޔާބުކުރި މުހިއްމު ދައުރެއް އަދާކުރި ރޮޑްރީގޯ ވަނީ ހުރިހާ މުބާރާތެއްގައި އެ ޓީމަށް ކުޅުނު 51 މެޗުގައި 17 ލަނޑުޖަހައި، އިތުރު ނުވަ ލަނޑުޖެހުމަށް އެހީތެރިވެދީފައެވެ.
ނަމަވެސް، އެ ޓީމުގައި އޭނާ އާއެކު ކުޅެމުން އަންނަ ބްރެޒިލްގެ ވިންގް، ވިނީޝިއުސް ޖޫނިއާ އާއި އިންގްލެންޑްގެ ޖޫޑް ބެލިންހަމް ވަނީ ބަލޮންޑޯ އެވޯޑަށް ނޮމިނޭޓްވެފައެވެ.
މި ފަހަރުގެ ބަލޮންޑޯ އެވޯޑަށް ނޮމިނޭޓްވި 30 ކުޅުންތެރިންގެ ޝޯޓްލިސްޓުގައި ހިމެނުނު ރެއާލްގެ އިތުރު ކުޅުންތެރިންގެ ތެރޭގައި، ސްޕެއިނުގެ ފުލްބެކް، ޑަނީ ކަރްވަހާލް، އުރުގުއޭގެ މިޑްފީލްޑަރު، ފެޑެރީކޯ ވަލްވާޑޭ، ޖަރުމަނުގެ ޑިފެންޑަރު، އެންޓޯނިއޯ ރުޑިގާ އަދި ޔޫރޯ 2024 އަށް ފަހު ރިޓަޔާކުރި ރެއާލާއި ޖަރުމަނުގެ ކުރީގެ މިޑްފީލްޑަރު، ޓޮނީ ކްރޫސް ހިމެނެއެވެ.
މީގެއިތުރުން، މި ފަހަރުގެ ސީޒަނަށް ފްރީ އޭޖެންޓެއްގެ ގޮތުގައި ޕީއެސްޖީން ރެއާލާ ގުޅުނު ފްރާންސްގެ ތަރި، ކީލިއަން އެމްބާޕޭ ވެސް ވަނީ ބަލޮންޑޯ އަށް ނޮމިނޭޓްވެފައެވެ.
ބަލޮންޑޯ އެވޯޑަކީ ކޮންމެ އަހަރަކު ދުނިޔޭގެ މޮޅު ފުޓްބޯޅަ ކުޅުންތެރިޔާ އަށް ފްރާންސްގެ ފުޓްބޯޅަ މެގަޒިންގެ އެޑިޓޯރިއަލް ޓީމު އިސްކޮށް ހުރެ، ބެލޮންޑިއޯ އެވޯޑްގެ އެމްބެސަޑަރު ކަމަށްވާ، ޗެލްސީގެ ކުރީގެ ފޯވާޑް، ޑިޑިއޭ ޑްރޮގްބާ ހިމެނޭ ގޮތަށް ހޮވާލެވިފައިވާ މީޑިއާގެ މެންބަރުންގެ ވޯޓަކުން ދެމުން އަންނަ އެވޯޑެކެވެ.
މި ފަހަރުގެ ބަލޮންޑޯ އެވޯޑް ދިނުމަށް ބާއްވާ ހަފްލާ އޮތީ އަންނަ އޮކްޓޫބަރު މަހުގެ 28 ވަނަ ދުވަހު ފްރާންސްގެ ޕެރިހުގައެވެ.