މާދަމާ އިން ފެށިގެން މުދަލުގެ ޒަކާތް ބަލައިގަންނަމުންދާނީ މިރާ އިންކަމަށް އެއިދާއިން ހާމާކުރައްވައިފިއެވެ.
މުދަލު ޒަކާތް މިހާތަނަށް ދައުލަތުން ބަލައިގަންނަމުން އައީ މާލޭގައި އިސްލާމިކް މިނިސްޓްރީންނެވެ. އަދި އަތޮޅުތެރޭ ރަށު ކައުންސިލްތަކާއި ސިޓީ ކައުންސިލްތަކުންނެވެ. މުދަލުގެ ޒަކާތަކީ، ނިސާބުގެ ހަމަވުމުގެ ސަބަބުން އެ ޒަކާތްދެއްކުން ވާޖިބު ކޮންމެ މުސްލިމަކު އެމީހެއްގެ މުދަލުން ދައްކަންޖެހޭ އެއްޗެކެވެ. މުދަލުގެ ޒަކާތުގެ ނިޞާބުގެ ގޮތުގައި ކަނޑައަޅާފައިވަނީ 4212.64 ރުފިޔާއެވެ.
މީރާ އިން ވިދާޅުވީ މާލެ ނޫން ރަށްރަށުގައި ޤާއިމްކޮށްފައިވާ މީރާގެ އޮފީސްތަކުން ވެސް މުދަލު ޒަކާތް ބަލައިގަންނާނެކަމަށެވެ. އަދި މީރާގެ އޮފީހެއް ޤާއިމްކޮށްފައިނުވާ ރަށްރަށުގައި ޒަކާތް ބަލައިގަންނަމުންދާނީ ރަށު ކައުންސިލްގެ އިދާރާއިންކަމަށް މިރާއިން ވިދާޅުވެއެވެ.
ޒަކާތުގެ ފައިސާ ދައްކާއިރު މިކަމަށްޓަކައި މީރާ އިން ކަނޑައަޅާފައިވާ ފޯމު ހުށަހަޅަންޖެހޭނެ ކަމަށް މޯލްޑިވްސް އިންލަންޑް ރެވެނިއު އޮތޯރިޓީން ވިދާޅުވެއެވެ. މުދަލު ޒަކާތް މީރާއިން ބަލައިގަންނަ ގޮތަށް ހަމަޖެހިފައިވީ ނަމަވެސް ކުރިއަށް އޮތް ތަނުގައި ވެސް ފިތުރު ޒަކާތް ބަލައިގަންނާނީ މިނިސްޓްރީ އޮފް އިސްލާމިކް އެފެއާޒުންނެވެ.
މީރާއިން ފައިސާ ބަލައިގަތުމަށްފަހު އެ ފައިސާ ޖަމާކުރާނީ ދައުލަތުން ކަނޑައަޅާފައިވާ އެކައުންޓަކަށް ކަމަށް އިސްލާމިކް މިނިސްޓަރު ވަނީ ވިދާޅުވެފައެވެ. އަދި ޒަކާތް ބެހުމުގައި މީރާއިން އެއްވެސް ދައުރެއް އަދާނުކުރާނެކަމަށާއި އެކަން ކުރަމުންދާނީ އިސްލާމިކް މިނިސްޓްރީންކަމަށްވެސް އެމިނިސްޓްރީން ވިދާޅުވެއެވެ.