ޔޫއެފާ ނޭޝަންސް ލީގުގައި މިރޭ ނެދަލަންޑްސްއާ ދެކޮޅަށް ޖަރުމަން މެޗަކީ އެޓީމަށް ރަނގަޅު އިމްތިހާނެއް ކަމަށް އެ ޓީމުގެ ކޯޗް ބުނެފި އެވެ.
ނޭޝަންސް ލީގުގެ ފުރަތަމަ މެޗުގައި ޖަރުމަން ވަނީ ހަންގޭރީ އަތުން 5-0 ގެ ތަފާތު ބޮޑު ނަތީޖާކުން މެޗު ކާމިޔާބުކޮށްފަ އެވެ. އަނެއްކޮޅުން ނެދަލޭންޑްސް އިން ވަނީ ބޮސްނިއާ އަތުން 5-2 ގެ ނަތީޖާ އަކުން ފުރަތަމަ މެޗު ކާމިޔާބުކޮށްފަ އެވެ.
ޖަރުމަނުގެ ކޯޗް ޖޫލިއަން ނަގެލްސްމަން ބުނެފައިވަނީ މި މެޗަށް ނިކުންނައިރުވެސް އޭނާ ބޭނުންވަނީ ފުރަތަމަ މެޗުގައި ފެނިގެންދިޔަ ފަދަ ރަގަޅު ކުޅުމެއް ދައްކާ އެ ފޯމު ދަމަހައްޓަން ކަމަށެވެ. ނަމަވެސް އެއީ ފަސޭހަ ކަމަކަށް ނުވާނެ ކަމަށާއި ނެދަލޭންޑްސްވެސް އޮތީ މިވަގުތު ރަގަޅު ހާލަތެއްގައި ކަމަށް އޭނާ ގަބޫލުކުރެއެވެ.
ޖަރުމަނުގެ މަޝްހޫރު ކުޅުންތެރިން ކަމުގައިވާ ޓޯނީ ކްރޫޒް, ތޯމަސް މުލާ އަދި ކީޕަރު މެނުއެލް ނޯޔާ ގައުމީ ޓީމަށް ކުޅުން ހުއްޓާލުމާއިއެކު ޒުވާން އާ ޓީމެއް ނަގައިގެން އެ ގައުމުން ދަނީ 2026 ވަނަ އަހަރުގެ ވޯލްޑްކަޕްގައި ރަގަޅު ނަތީޖާއެއް ހޯދުމަށް މިހާރުވެސް މަސައްކަތް ފަށާފަ އެވެ.
އަމިއްލަ ގައުމުގައި މިއަހަރު ބޭއްވި ޔޫރޯ ފުޓްބޯޅަ މުބާރާތުގައި ޖަރުމަނަށް ދަތުރު ކުރެވިފައިވަނީ ކުއާޓަރ ފައިނަލާއި ހަމައަށެވެ.
ޖަރުމަނާއި ނެދަލޭންޑްސް މިރޭ ބައްދަލުކުރާއިރު, މި ގްރޫޕްގައި ދެން ހިމެނޭ ބޮސްނިއާ އާއި ހާންގޭރީ ބައްދަލުކުރާ މެޗުން ކުރިއަށްދާނީ ހަންގޭރީގެ ބުޑަޕެސްޓުގަ އެވެ.