އަލިފާނުގެ ހާދިސާގައި ހާލުގައިޖެހުނު 37 މީހަކަށް އިންސާނީ އެހީތެރިކަން ދަނީ ފޯރުކޮށްދެމުން: އެންޑީއެމްއޭ

ހ. ދޫހިމެރިގޭގައި ހިނގި އަލިފާނުގެ ހާދިސާގައި ހާލުގައިޖެހުނު 37 މީހަކަށް އިންސާނީ އެހީތެރިކަން ފޯރުކޮށްދިނުމުގެ މަސައްކަތް ކުރަމުން އަންނަކަމަށް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭއިން ހާމަކޮށްފިއެވެ.

ހ،ދޫހިމެރިގޭގައި މިއަދު މެންދުރުފަހު ހިނގި އަލިފާނުގައި ހާދިސާގައި އަލިފާން ރޯވީ އެގޭގައި ހިންގާ ގާމަގު ނަމަކަށް ކިޔާ ކެފޭގެ ބަދިގޭގައެވެ. މިގޭގައި ރޯވި އަލިފާން ހަވީރު 4:30 ހާއިރުވަނީ ނިއްވާލާފައެވެ. ނަމަވެސް އެތަނަކީ ގިނަ އަދަދަކަށް ޓިނާއި ލަކުޑިން ހަދާފައިވާ ތަނަކަށްވާތީ ދަށުގައި ހުރި ލަކުޑި ތަކުގައި އަލިފާނުގެ އަސަރުހުރުމުން މިހާރުވެސް ދޭތެރެ ދޭތެރެއިން ހުޅުހިފާގޮތްވާ ކަމަށް އެމްއެންޑީއެފުން ވިދާޅުވެއެވެ. ނަމަވެސް އަލިފާން ނިއްވާލުމަށްފަހު މޮނިޓަރ ކުރަމުން އަންނަ ކަމަށް އެމްއެންޑީއެފުން ވިދާޅުވެއެވެ. ދޫހިމެރިގޭގައި ހިނގި އަލިފާނުގެ ހާދިސާގައި އެގޭގެ އިތުރުން އެ ގެއާއި އިންވެގެން ހުރި ގެއަކަށްވެސް އަލިފާނުގެ އަސަރުކުރިއެވެ.

މިހާދިސާގައި އެއްވެސް މީހަކަށް އަނިޔާވެފައި ނުވެއެވެ. ނަމަވެސް މަގުމަތީގައި ތިބި ބިދޭސީ 2 މީހަކަށް ދުމުގެ އަސަރުކޮށްގެން ހޮސްޕިޓަލަށް ގެންގޮސްވަނީ ފަރުވާދީފައެވެ.

އެންޑީއެމްއޭއިން ވިދާޅުވީ އަލިފާނުގެ މިހާދިސާގައި ހާލުގައި ޖެހުނު 37 މީހަކަށް އިންސާނީ އެހީތެރިކަން ފޯރުވައިދިނުމަށް މަސައްކަތް ކުރަމުން އަންނަކަމަށެވެ. މީގެ ތެރޭގައި ހިމެނެނީ 22 ދިވެހިންނާއި 15 ބިދޭސީންނެވެ.