ޔުއެފާ ނޭޝަންސް ލީގުގެ ފުރަތަމަ މެޗުގައި އިޓަލީ އަތުން އަމިއްލަ ދަނޑުގައި 3-1 އިން ބަލިވެފައިވީނަމަވެސް، ބެލްޖިއަމްއާ ދެކޮޅަށް މިރޭ ކުޅުމަށް ހަމަޖެހިފައިވާ މެޗަށް ފްރާންސްގެ ކޯޗު، ޑިޑިއޭ ޑެޝޯމްޕްސް ގިނަ ބަދަލުތަކެއް ގެނެސް ރޮޓޭޓްކުރުމުގެ ޕްލޭން ދަމަހައްޓާނެކަމަށް ބުނެފިއެވެ.
ޑެޝޯމްޕްސް މިހެން ބުނީ، ބެލްޖިއަމްއާ ދެކޮޅަށް ކުޅުމަށް ހަމަޖެހިފައިވާ މެޗުގެ ކުރީން ބޭއްވި ނޫސްވެރިންގެ ބައްދަލުވުމުގައެވެ.
ޑެޝޯމްޕްސް ބުނީ، ފްރާންސްގެ ނޭޝަންސް ލީގުގެ ކެމްޕޭން ފެށުނީ ދެރަކޮށް ނަމަވެސް، މީގެ ކުރިން ރޭވި ޕްލޭންތަކަށް ބަދަލެއް ނުގެންނާނެ ކަމަށެވެ.
"ނޭޝަންސް ލީގުގެ 6 މެޗު ބޭނުންކުރާނީ އައު ކުޅުޅުންތެރިން ތަޢާރަފުކޮށް، ކުޅޭ ވަގުތު ބަހާލުމަށް،" ޑެޝޯމްޕްސް ބުންޏެވެ.
ޑެޝޯމްޕްސް ބުނީ، މިހާރުގެ ޓީމާ ތަފާތު ޝެޑިއުލެއް އޮވެ، އޭނާގެ ޓީމަށް ކުރިއަށް އޮތީ ފީފާ ވޯލްޑް ކަޕްގެ ކޮލިފައިން މެޗުތައް ކަމަށްވީނަމަ މިހާރުގެ ޕްލޭންތައް އެގޮތަށް ކުރިއަށްނުގެންދާނެ ކަމަށެވެ. މިހާރު އެކަން އެގޮތަށް ކުރަން ނިންމީ، އެކަން އެގޮތަށް ކުރަންޖެހޭނެ ކަމަށް އޭނާ އަށް ގަބޫލުކުރެވޭތީ ކަމަށާއި، ބަދަލެއްނުގެނެސް އެކަން އެގޮތަށް ކުރިއަށްގެންދާނެ ކަމަށް ޑެޝޯމްޕްސް ބުންޏެވެ.
އިޓަލީއާ ދެކޮޅަށް ކުޅުނު މެޗު ފެށިގެން ފުރަތަމަ 20 ސިކުންތުގެ ތެރޭގައި ލީޑްނެގުމަށްފަހު، ފަސޭހަކަމާއެކު އެ ޓީމު އަތުން ބަލިވުމުން އޭގެ ބަދަލުގައި ރަނގަޅު ނަތީޖާއެއް ހޯދަން ބޭނުންވާ ކަމަށް ޑެޝޯމްޕްސް ވަނީ ބުނެފައެވެ.
"އިޓަލީއާ ދެކޮޅަށް ކުޅުނު މެޗާމެދު އަހަރެން ހިތްހަމައެއް ނުޖެހޭ. އަދި ކުޅުންތެރިން ވެސް ހިތްހަމައެއް ނުޖެހޭ."
ޑެޝޯމްޕްސް އިތުރަށް ބުނީ، ކުރިއަށް އޮތީ މުޅިން އެހެން ހާލަތެއްގައި، ތަފާތު ޓީމަކާ ދެކޮޅަށް ކުޅޭ މެޗެއް ކަމަށާއި، އެކަމަކު އެ މެޗަށް ނިކުންނާނީ ރަނގަޅަށް ކުޅެ ނަތީޖާ ނެރުމަށް ކަމަށެވެ.
އަދި، އޭނާ ހިޔާރުކޮށްފައިވާ ގޮތުން ވީހާވެސް ގިނަ ކުޅުންތެރިންނަށް ވީހާވެސް ގިނަވަގުތު ކުޅުމުގެ ފުރުޞަތު ދޭނެ ކަމަށާއި، އެ ކުޅުންތެރިންނަށް ކުޅުމަށް ލިބޭ ވަގުތުތައް މަދުނަމަވެސް، އަބަދުވެސް ޕްރެޝަރު އޮންނާނެ ކަމަށް ވެސް ޑެޝޯމްޕްސް ބުންޏެވެ. އެކަން އެގޮތަށް އޮތް ނަމަވެސް، އޭނާގެ ޓީމުން ރަނގަޅަށް ޕާފޯމްކުރަންޖެހޭނެ ކަމަށް ވެސް ނިންމާލަމުން ޑެޝޯމްޕްސް ބުންޏެވެ.
މި އަހަރުގެ ނޭޝަންސް ލީގުގެ ފުރަތަމަ ދެ މެޗަށްފަހު، ފްރާންސުން އަންނަ މަހު ނިކުންނާނީ އިޒްރޭލާއި ބެލްޖިއަމްއާ ދެކޮޅަށެވެ. އަދި އެއަށްފަހު، އެ ގްރޫޕުގެ ފަހު މެޗުތަކުގައި ނޮވެންބަރު މަހުގައި ކުޅޭނީ އިޒްރޭލާއި އިޓަލީއާ އެވެ.