އެތުލެޓިކްސްއިން މިހާރުގެ އަމާޒަކީ 2028 ވަނަ އަހަރު އެމެރިކާގެ ލޮސް އަންޖެލެސްގައި އޮންނަ އޮލިމްޕިކް ގޭމްސްއަށް ކޮލިފައިވުން ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ. ވަޒީރު މިހެން ވިދާޅުވީ ކުރިއަށް އޮތް ސައުތު އޭޝިއަން އެތުލެޓިކްސް ޖޫނިއާ ޗެމްޕިއަންޝިޕުގައި ވާދަކުރާ ދިވެހި ޓީމާ ބައްދަލުކުރައްވައި ވާހަކަފުޅު ދައްކަވަމުންނެވެ.
ދެކުނު އޭޝިއާގެ ޖޫނިއާ އެތުލެޓިކްސް މުބާރާތް އޮންނާނީ މި މަހުގެ 11-13 އަށް އިންޑިއާގެ ޗެންނާއިގައެވެ. އެ މުބާރާތަށް އެތުލެޓިކްސް އެސޯސިއޭޝަން އޮފް މޯލްޑިވްސްއިން ވަނީ 16 އެތުލީޓުންގެ ސްކޮޑެއް އެކުލަވާލާފައެވެ. އެއީ އަށް އަންހެން އެތުލީޓުންނާއި އަށް ފިރިހެން އެތުލީޓުންނެވެ.
މުބާރާތަށް އެތުލީޓުން ފުރުމުގެ ކުރިން ރޭ "މީރުމާ" ގައި ޚާއްސަ ރަސްމިއްޔާތެއް ބޭއްވިއިރު، މި ރަސްމިއްޔާތުގައި ވަޒީރުގެ އިތުރުން ކޮމިޝަނަރ އޮފް ސްޕޯޓްސް މުޙައްމަދު ޠަލާލް އަދި އެތުލެޓިކްސް އެސޯސިއޭޝަންގެ އިސްވެރިން ބައިވެރިވެވަޑައިގެންނެވިއެވެ. މި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ވަޒީރު ވިދާޅުވީ ވުޒާރާގެ ވިސްނުން މިހާރު ހުރީ އެލްއޭގައި އޮންނަ އޮލިމްޕިކްސްއަށް ކޮލިފައިވުމަށް ކަމަށެވެ. އެގޮތުން އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި ވަރަށް ގިނައިން ވާދަކުރެވިއްޖެ ކަމަށާއި، މިސްރާބަކީ އެ ގޭމްސްއަށް ވުރެ ދުރަށް ދިޔުން ކަމަށްވެސް ވިދާޅުވިއެވެ.
"މިހާރު ކުދިން ތިބޭ ތަން، އެއަށްވުރެ ރަނގަޅު ހާލަތަކަށް ގެނައުމުގައި އަޅުގަނޑުމެން އެސޯސިއޭޝަނާ ގުޅިގެން މަސައްކަތްކުރާނަން. 2028 އަށް އަމާޒުހިފައިގެން، މިއީ ދިގު ޕްރޮގުރާމެއްގެ ގޮތުގައި ބަލައިގެން އެކަން އަޅުގަނޑުމެން ކުރިއަށް ގެންދާނަން." ވަޒީރު ވިދާޅުވިއެވެ.
ވަޒީރު މިހެން ވިދާޅުވިއިރު، ފްރާންސްގެ ވެރިރަށް ޕެރިހުގައި މި ފަހަރު ބޭއްވި އޮލްިމްޕިކްސްގައި ރާއްޖޭގެ އެތުލީޓަކު ވަނީ ފުރަތަމަ ފަހަރަށް ކޮލިފައިވެގެން، ގޭމްސްގައި ވާދަކޮށްފައެވެ. އެ ޝަރަފު ހޯދާފައިވަނީ ޓޭބަލް ޓެނިސް ތަރި ފާތުމަތު ދީމާ އަލީއެވެ. އޮލިމްޕިކްސްގެ އެތުލެޓިކްސް އިވެންޓުތަކުގައި މީގެ ކުރިން ރާއްޖޭގެ އެތުލީޓުން ވާދަކޮށްފައިވީ ނަމަވެސް، އެ އެތުލީޓުންނަށް ފުރުސަތު ލިބިފައިވަނީ ޓްރައިޕާޓައިޓް އިންވިޓޭޝަނަލް ފުރުސަތުތަކުގައެވެ.
ރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން އެތުލެޓިކްސް އެސޯސިއޭޝަނުގެ ރައީސްގެ މަގާމު ވޭތުވެދިޔަ 12 އަހަރު ފުރުއްވި ޠަލާލް ވިދާޅުވީ ދެކުނު އޭޝިއާގެ އެތުލެޓިކްސް މުބާރާތަކީ އެތުލެޓިކްސްގެ ކާމިޔާބީއާ ވަރަށް ބޮޑަށް ގުޅިފައި އޮތް މުބާރާތެއް ކަމަށެވެ. އެގޮތުން 2010 ވަނަ އަހަރު ބަންގްލަދޭޝްގެ ވެރިރަށް ޑާކާގައި ބޭއްވި ސާފް ގޭމްސްގައި ރާއްޖޭގެ އެތުލެޓިކްސްއިން ފުރަތަމަ މެޑަލް ހޯދަން ކުރި މަސައްކަތުގެ ތެރެއިން، 2007 ވަނަ އަހަރު ސްރީ ލަންކާގައި ބޭއްވި ޖޫނިއާ މުބާރާތުން ހޯދި މެޑެއްޔަކީ އެތުލެޓިކްސްއިން ރާއްޖެއަށް ލިބިގެންދިޔަ ފުރަތަމަ މެޑެލްކަން ޠޮލާލް ފާހަގަކުރެއްވިއެވެ
"އެހެންވީމާ އެތުލެޓިކްސްގެ ކާމިޔާބީއާ ވަރަށް ބޮޑަށް ގުޅިފައި އޮތް މުބާރާތަކަށް ދާއިރު، އަޅުގަނޑު އުއްމީދުކުރަނީ އޭރު އެ ހޯދި މެޑެއްޔަށްވުރެ ރަނގަޅު މެޑެއްޔެއް، އަދި އޭރު އެ ހޯދި މެޑެއްޔަށްވުރެ ގިނަ މެޑެލް އެތުލެޓިކްސް ޓީމުން ހޯދާނެ ކަމަށް." ޠޮލާލް ވިދާޅުވިއެވެ.
ކުރިއަށް އޮތް ސައުތު އޭޝިއާގެ އެތުލެޓިކްސް ޖޫނިއާ މުބާރާތަށް ރާއްޖެއިން ވަރުގަދަ ސްކޮޑެއް އެކުލަވާލާފައިވާއިރު، މިދިޔަ ދެތިން އަހަރު ގައުމީ ސީނިއާ އެތުލެޓިކްސް ޓީމުގައި ހިމެނިގެން ބައިނަލްއަގުވާމީ މުބާރާތްތަކުގައި ވާދަކޮށް، ރަނގަޅު ކާމިޔާބު ހޯދާފައިވާ އެތުލީޓުންވެސް އެ ސްކޮޑުގައި ހިމެނެއެވެ.