ޔުއެފާ ނޭޝަންސް ލީގުގައި މިދިޔަ ހޮނިހިރު ދުވަހު ރިޕަބްލިކް އޮފް އަޔަލަންޑާ ދެކޮޅަށް ކުޅުނު މެޗުން މޮޅުވުމާއެކު އިތުބާރު ބޮޑުވެފައިވާ ކަމަށް އިންގްލެންޑްގެ އިންޓެރިމް ކޯޗު، ލީ ކާސްލީ ބުނެފިއެވެ.
މެޗަށްފަހު ކާސްލީ ދެއްކި ވާހަކައިގައި ވަނީ، އިންގްލެންޑްގެ ކޯޗުގެ މަގާމާ ހަވާލުވިއިރު އެ މަސްއޫލިއްޔަތު އަދާކުރެވިދާނެ ކަމާމެދު އޭނާ އަށް ޝައްކުތަކެއް ހުރި ކަމަށް ބުނެފައެވެ.
ޑަބްލިންގައި ކުޅުނު މި މެޗުން އިންގްލެންޑް މޮޅުވީ، ކުރީން އަޔާލެންޑަށް ކުޅެފައިވާ ދެ ކުޅުންތެރިން ކަމަށްވާ، ޑެކްލަން ރައިސް އާއި ޖެކް ގްރީލިޝް ކާމިޔާބުކުރި ލަނޑުތަކުންނެވެ.
ކާސްލީ ބުނީ، އިންގްލެންޑްގެ ކޯޗުގެ ޒިންމާ އަދާކުރުމަކީ މީހުން ހީކުރާހާ ފަސޭހަ ކަމެއް ނޫން ކަމަށާއި، ގޭގައި އިށީނދެގެން އިނދެ އެހެން އެގޮތަށް ހިތަށް އަރައިފާނެ ކަމަށެވެ.
"އަހަރެންނަށް މިކަން ނުކުރެވިދާނެ ކަމަށް ހިތަށްއެރި ވަގުތުތަކެއް އައިސްފައިވޭ." ކުރީން އަޔާލެންޑަށް ކުޅެފައިވާ މިޑްފީލްޑަރު ބުންޏެވެ.
"އެކަމަކު (ޑަބްލިންގައި) ލިބުނު ކާމިޔާބީ އިން އަހަރެންގެ އިތުބާރު ބޮޑުވެއްޖެ،"
އަދި، ޓީމުގެ ސްޓާފުން ހިމެނޭ ގޮތަށް އަހަރެމެންނަށް މިކަން އެންމެ ރަނގަޅަށް ކުރެވިދާނެ ކަމަށް ގަބޫލުކުރަން." ކާސްލީ ބުންޏެވެ.
އާއްމުގޮތެއްގައި އިންގްލެންޑްގެ 21 އަހަރުން ދަށުގެ ޓީމުގެ ކޯޗުގެ މަގާމުގައި ހުންނަ ފަރާތަކަށް ވަގުތީ ގޮތުން ސީނިއާ ޓީމާ ހަވާލުވަމުން އައިސްފައިވާއިރު، ކާސްލީގެ އިރުޝާދުގެ ދަށުން އެ ޓީމުން ކުޅުމަށް ހަމަޖެހިފައިވަނީ އަޔާލެންޑްގެ އިތުރުން ވެމްބްލީގައި ފިންލެންޑާ ބައްދަލުކުރާ މެޗެވެ.
މިހާތަނަށްއައިއިރު ކާސްލީގެ ކޯޗިންގ ކެރިއަރުގައި ދިގު މުއްދަތަކަށް މާގިނަ މަސައްކަތްތަކެއް ކޮށްފައިނުވާއިރު، އޭނާ ވަނީ 2012 އިން 2017 އާ ދެމެދު ކޮވެންޓްރީ އާއި ބްރެންޓްފޯޑްގެ އިތުރުން ބާމިންހަމް އަށް އިރުޝާދު ދީފައެވެ.