ގެސްޓްހައުސްއެއް ތެރޭގައި ޒަޚަމްކޮށްލާފައި އޮތް މީހަކު ފެނިއްޖެ

ޒަޚަމްތަކަކާއެކު މާލޭގެ ގެސްޓްހައުސްއެއްގައި އޮތް މީހަކު ފެނިފައިވާކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ. ފުލުހުން ވިދާޅުވީ، މާފަންނު ގެސްޓްހައުސްއެއްގެ ކޮޓަރިއެއްގައި އުޅޭ މީހެއްގެ ޚަބަރެއް ނުވާކަމަށް ލިބުނު މައުލޫމާތަކާއި ގުޅިގެން މިއަދު ފުލުހުން އެތަނަށް ގޮސް ބަލާފައިވާކަމަށެވެ.

ފުލުހުން އެ ކޮޓަރިއަށް ވަދެ ބެލި އިރު ޒަޚަމްތަކާއެކު އޮތް މީހަކު ފެނިފައިވާކަމަށް ވަނީ ބުނެފައެވެ. އެއީ ދިވެހި ފިރިހެނެއްކަމަށާއި، އެމީހާ މިހާރު އައިޖީއެމްއެޗަށް ގެންގޮސްފައިވާކަމަށް ފުލުހުން ވިދާޅުވިއެވެ. އަދި އެމީހާއަށް ފަރުވާދެމުން އަންނަނީ އައިސީޔޫގައިކަމަށްވެސް ހޮސްޕިޓަލާ ހަވާލާދެއްވާ ފުލުހުން ވިދާޅުވިއެވެ.

ފުލުހުން ވިދާޅުވީ، ހާދިސާ ހިނގި ތަނުގައި ފުލުހުން ހަރަކާތްތެރިވަމުންދާކަމަށެވެ. އަދި މި ހާދިސާ އިތުރަށް ތަހުޤީގުކުރަމުންދާކަމަށް ފުލުހުން ވަނީ ވިދާޅުވެފައެވެ.