މާލޭގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ޗެލެންޖް ކަޕް 2024 ގެ ސެމީ ފައިނަލް ދެވަނަ މެޗުގައި ރާއްޖެ އާއި ތަޖިކިސްތާން ބައްދަލުކުރަން ޖެހިއްޖެއެވެ.
އަންނަ ބުދަ ދުވަހުގެ ނިޔަލަށް ޒުވާނުންގެ މަރުކަޒުގެ އެތެރޭ ކޯޓުގައި ކުރިއަށްދާ މި މުބާރާތުގައި ހަތަރު ގައުމެއް ވާދަކުރާއިރު، އެ ގައުމުތަކަކީ ރާއްޖެ އާއި ތަޖިކިސްތާނުގެ އިތުރުން ކިރްގިސްތާން އަދި އަފްޣާނިސްތާނެވެ.
މުބާރާތުގެ ލީގު ބުރުގެ މެޗުތައް މިރޭ ނިމިގެންދިޔައިރު، ރޭންކިންގައި ރާއްޖެއަށް ލިބުނީ ދެވަނައެވެ. އެގޮތުން ރާއްޖެއަށް ހަ ޕޮއިންޓް ލިބުނުއިރު، އެއްވަނަ ހޯދި ކިރްގިސްތާނުން ވަނީ ކުޅުނު ތިން މެޗުވެސް ކާމިޔާބުކޮށް، ނުވަ ޕޮއިންޓް ހަމަކޮށްފައެވެ. ތިންވަނަ ހޯދި ތަޖިކިސްތާނަށް ތިން ޕޮއިންޓް ލިބުނުއިރު، ހަތަރުވަނައަށް ދިޔަ އަފްޣާނަށް އެއްވެސް ޕޮއިންޓެއް ލިބިފައެއް ނުވެއެވެ.
ލީގު ބުރުގެ ފަހު މެޗުގައި މިރޭ ކިރްގިސްތާނުން ވަނީ ސީދާ ތިން ސެޓުން ރާއްޖެ ބަލިކޮށްފައެވެ. މި މެޗުން ރާއްޖެ ބަލިވި ނަމަވެސް، މެޗުގެ ތިން ސެޓުގައިވެސް ރާއްޖޭގެ ކުޅުންތެރިން ވަނީ މޮޅު ކުޅުމެއް ދައްކާފައެވެ. ވާދަވެރި ކުޅުމެއް ފެނިގެންދިޔަ މި މެޗުގެ ސެޓުތައް ކިރްގިސްތާނުން ގެންދިޔައީ 31-29، 25-16 އަދި 25-23 އިންނެވެ.
މި މުބާރާތުގެ ސެމީގައި ރާއްޖެ އާއި ތަޖިކިސްތާން ބައްދަލުކުރާއިރު، ލީގު ބުރުގައި މި ދެ ޓީމު ބައްދަލުކުރި މެޗު 3-1 ސެޓުން ކާމިޔާބުކޮށްފައިވަނީ ރާއްޖެއިންނެވެ.
ރާއްޖެ އާއި ތަޖިކިސްތާން ބައްދަލުކުރާ ބައްދަލުކުރާ ސެމީގެ މެޗު ކުޅުމަށް ހަމަޖެހިފައިވަނީ އަންގާރަ ދުވަހުގެރެއެވެ. އަދި ސެމީ ފައިނަލް ފުރަތަމަ މެޗުގައި ކިރްގިސްތާނުން އަފްޣާނާ ދެކޮޅަށް ނުކުންނައިރު، އެ މެޗު ކުޅޭނީ އަންގާރަ ދުވަހުގެ ހަވީރެވެ.