މާލޭގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ޗެލެންޖް ކަޕް 2024 ގައި މިއަދު ހަވީރު ކުޅުނު މެޗުގައި އަފްޣާނިސްތާން ބަލިކޮށް، ތަޖިކިސްތާނުން ރޭންކިންގެ ތިންވަނަ މަގާމު ހޯދައިފިއެވެ.
މި މަހުގެ 11 ވަނަ ދުވަހުގެ ނިޔަލަށް ޒުވާނުންގެ މަރުކަޒުގެ އެތެރޭ ކޯޓުގައި ކުރިއަށްދާ މި މުބާރާތުގައި ހަތަރު ގައުމެއް ވާދަކުރާއިރު، އެ ގައުމުތަކަކީ ރާއްޖޭގެ އިތުރުން ތަޖިކިސްތާނާއި، ކިރްގިސްތާން އަދި އަފްޣާނިސްތާނެވެ.
މިއަދު ހަވީރު ކުޅުނު މެޗުން ތަޖިކިސްތާން މޮޅުވީ އަފްޣާން އަތުން ސީދާ ތިން ސެޓުންނެވެ. މި މެޗުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ ނަމަވެސް، ތަޖިކިސްތާނުން ސެޓުތައް ގެންދިޔައީ 25-19، 25-21 އަދި 31-29 އިންނެވެ.
މި މޮޅާއެކު ތަޖިކިސްތާނުން ވަނީ ރޭންކިންގެ ތިންވަނަ މަގާމު ކަށަވަރުކޮށްފައެވެ. މިހާތަނަށް ކުޅުނު ތިން މެޗުންވެސް އަފްޣާން ބަލިވިއިރު، އެ ޓީމު ދިޔައީ ރޭންކިންގެ ހަތަރުވަނައަށެވެ. މުބާރާތުގެ ރޭންކިންގެ އެއްވަނަ މަގާމާއި ދެވަނަ މަގާމަށް ވާދަކުރަނީ ރާއްޖެ އާއި ކިރްގިސްތާނެވެ. އެ ދެ ޓީމު މިރޭ ބައްދަލުކުރާއިރު، އެއްވަނަ މަގާމު ލިބިގެންދާނީ އެ މެޗުން މޮޅުވާ ޓީމަކަށެވެ.
މުބާރާތް ރޭވިފައިވާ ގޮތުން ސެމީގެ ފުރަތަމަ މެޗުގައި ބައްދަލުކުރާނީ ރޭންކިންގެ އެއްވަނަ ޓީމާއި، ހަތަރުވަނައަށް ދާ ޓީމެވެ. އަދި ދެވަނަ ސެމީގައި ބައްދަލުކުރާނީ ދެވަނަ ހޯދާ ޓީމާއި، ތިންވަނައިގައި ނިންމާ ޓީމެވެ.