އެތުލެޓިކްސް އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ބޭއްވި 33 ވަނަ ގައުމީ އެތުލެޓިކްސް ޗެމްޕިއަންޝިޕުގެ އެންމެ މޮޅު ފިރިހެން އެތުލީޓުގެ މަގާމު އިބާދުﷲ އާދަމް އަދި އެންމެ މޮޅު އަންހެން އެތުލީޓުގެ މަގާމު ފަސޫހާ އަޙްމަދު ހޯދައިފިއެވެ.
މާލޭ އެކުވެނި ސިންތެޓިކް ޓްރެކުގައި ކުރިއަށްދިޔަ މި މުބާރާތް މިއަދު ހަވީރު ނިންމާލިއިރު، އެންމެ މޮޅު ފިރިހެން އެތުލީޓުގެ މަގާމު ހޯދި ރައުހަތު ސްޕޯޓްސްގެ އިބާދުﷲ ވަނީ މި ފަހަރުގެ މުބާރާތުގައި ދެ ރަން މެޑަލް ހާސިލުކޮށްފައެވެ. އެއީ 100 މީޓަރު ދުވުމާއި 200 މީޓަރު ދުވުމުންނެވެ.
އަދި އެންމެ މޮޅު އަންހެން އެތުލީޓުގެ މަގާމު ހޯދި ފަސޫހާ ތިން ރަން މެޑަލް ހޯދިއިރު، އޭނާ ވަނީ 1500 މީޓަރު ދުވުމުގެ ގައުމީ ރިކޯޑުވެސް އައުކޮށްފައެވެ. ފަސޫހާ ރަން މެޑަލް ހޯދާފައިވަނީ 1500 މީޓަރު ދުވުމުގެ އިތުރުން 800 މީޓަރާއި 400 މީޓަރު ދުވުމުންނެވެ.
މިއަދު ހަވީރު ކުރިއަށްދިޔަ އަންހެނުންގެ 400 މީޓަރު ދުވުން ފަސޫހާ ކާމިޔާބުކޮށްފައިވަނީ 57.22 ސިކުންތުން ރޭސް ނިންމައިގެންނެވެ. މި އިވެންޓުން ރިހި މެޑަލް ހޯދި ޓްރެކް އެންޑް ފީލްޑް އެސޯސިއޭޝަނުގެ ޒިވާ މޫސާ ޝަފީއު ރޭސް ނިންމާފައިވަނީ 59.98 ސިކުންތުންނެވެ. އަދި ލޯ މެޑަލް ހޯދި އައްޑޫ އެތުލެޓިކްސްގެ ހައްވާ މުޒުނާ ފާއިޒް ރޭސް ނިންމާފައިވަނީ އެއް މިނެޓު 1.17 ސިކުންތުންނެވެ.
މިއަދު ކުރިއަށްދިޔަ ފިރިހެނުންގެ 400 މީޓަރު ދުވުމުން ރަން މެޑަލް ހޯދީ ކަސްޓަމްސް ރެކްރިއޭޝަން ކުލަބުގެ އާދަމް ރިފްއަތެވެ. އޭނާ ރޭސް ނިންމީ 50.45 ސިކުންތުންނެވެ. ރިހި މެޑަލް ހޯދި ދިވެހި ސިފައިންގެ ކުލަބުގެ ހުސެއިން ޒީކް ސުއާދު ރޭސް ނިންމާފައިވަނީ 50.56 ސިކުންތުންނެވެ. އަދި ލޯ މެޑަލް ހޯދި ސާއިދު ސްޕޯޓްސްގެ ޔޫސުފް އާއިޝް މުޙައްމަދު ރޭސް ނިންމާފައިވަނީ 51.46 ސިކުންތުންނެވެ.
މީގެ އިތުރުން މިއަދު ހަވީރު ކުރިއަށްދިޔަ ފިރިހެނުންގެ 100 މީޓަރު ރިލޭ ކާމިޔާބުކޮށްފައިވަނީ ދިވެހި ސިފައިގެން ކުލަބުންނެވެ. އެ ޓީމުން ރޭސް ނިންމާފައިވަނީ 42.38 ސިކުންތުންނެވެ. ރިހި މެޑަލް ހޯދި ޓްރެކް އެންޑް ފީލްޑް އެސޯސިއޭޝަނުގެ ޓީމު 45.56 ސިކުންތުން ރޭސް ނިންމިއިރު، ލޯ މެޑަލް ހޯދާފައިވަނީ ޝަރީފް ސްޕޯޓްސް އިންނެވެ. އެ ޓީމުން ރޭސް ނިންމީ 46.02 ސިކުންތުންނެވެ.
މި މުބާރާތުގެ އަންހެނުންގެ 100 މީޓަރު ރިލޭއިން ރަން މެޑަލް ހޯދީ ޝަރީފް ސްޕޯޓްސް އިންނެވެ. އެ ޓީމުން ރޭސް ނިންމާފައިވަނީ 51.49 ސިކުންތުންނެވެ. އަދި ރިހި މެޑަލް ހޯދި ޓްރެކް އެންޑް ފީލްޑް އެސޯސިއޭޝަނުގެ ޓީމު ރޭސް ނިންމާފައިވަނީ 54.75 ސިކުންތުންނެވެ.
މި އަހަރުގެ މުބާރާތުގެ ފިރިހެން ބައިގެ އެންމެ މޮޅު ޓީމަކީ ދިވެހި ސިފައިންގެ ކުލަބެވެ. މި ބައިގެ ދެވަނަ މަގާމު ޓްރެކް އެންޑް ފީލްޑް އެސޯސިއޭޝަނުން ހޯދިއިރު، ތިންވަނަ ލިބުނީ ޝަރީފް ސްޕޯޓްސް އަށެވެ. އަދި އަންހެން ބައިގެ އެންމެ މޮޅު ޓީމަކަށް ހޮވިފައިވަނީ ޓްރެކް އެންޑް ފީލްޑް އެސޯސިއޭޝަނެވެ. މި ބައިގެ ދެވަނަ މަގާމު އައްޑޫ އެތުލެޓިކްސްއިން ހޯދިއިރު، ތިންވަނަ ލިބުނީ ޝަރީފް ސްޕޯޓްސް އަށެވެ.