މާލޭގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ޗެލެންޖް ކަޕް 2024 ގައި މިއަދު ހަވީރު ކުޅުނު މެޗުގައި ފަސޭހަކަމާއެކު އަފްޣާނިސްތާން ބަލިކޮށް، ކިރްގިސްތާނުން ދެވަނަ މޮޅު ހޯދައިފިއެވެ.
މި މަހުގެ 11 ވަނަ ދުވަހުގެ ނިޔަލަށް ޒުވާނުންގެ މަރުކަޒުގެ އެތެރޭ ކޯޓުގައި ކުރިއަށްދާ މި މުބާރާތުގައި ހަތަރު ގައުމެއް ވާދަކުރާއިރު، އެ ގައުމުތަކަކީ ރާއްޖޭގެ އިތުރުން ތަޖިކިސްތާނާއި، ކިރްގިސްތާން އަދި އަފްޣާނިސްތާނެވެ.
މިއަދު ހަވީރު ކުޅުނު މެޗުން ކިރްގިސްތާން މޮޅުވީ އަފްޣާން އަތުން ސީދާ ތިން ސެޓުންނެވެ. މި މެޗުގެ ސެޓުތައް ކިރްގިސްތާނުން ގެންގޮސްފައިވަނީ 25-14، 25-12 އަދި 25-14 އިންނެވެ.
މި މެޗުން ކިރްގިސްތާން މޮޅުވިއިރު، އެ ޓީމުން މުބާރާތުގެ ފުރަތަމަ މެޗުގައި އިއްޔެ ހަވީރު ސީދާ ތިން ސެޓުން ތަޖިކިސްތާން ބަލިކޮށްފައެވެ. ލީގު ބުރުގައި ކިރްގިސްތާނުން ކުޅޭ ފަހު މެޗުގައި މާދަމާރޭ ނުކުންނާނީ ރާއްޖެއާ ދެކޮޅަށެވެ.