ޔުއެފާ ކޮންފަރެންސް ލީގުގެ ގްރޫޕް ސްޓޭޖުގައި ވާދަކުރާ ޗެލްސީގެ ސްކޮޑުން އިނގިރޭސި ދެ ކުޅުންތެރިން ކަމަށްވާ ކޯލް ޕާމާ އާއި ބެން ޗިލްވެލް އުނިކޮށްފިއެވެ.
ޕާމާ އާއި ޗިލްވެލްގެ އިތުރުން މިދިޔަ ސީޒަނުގައި އަނިޔާގެ ސަބަބުން ބޮޑުބައެއް ކުޅުމާ ދުރުގައި ހުންނަ ޖެހުނު ފްރާންސްގެ ޑިފެންޑަރު، ވެސްލީ ފޮފާނާ އާއި މިޑްފީލްޑަރު ރޮމިއޯ ލާވިއާވެސް ވަނީ ޗެލްސީން ކޮންފަރެންސް ލީގުގެ ފުރަތަމަ ފިޔަވަހީގައި ވާދަކުރާ ސްކޮޑުން އުނިކޮށްފައެވެ. އެކަމަކު، އަންނަ އަހަރުގެ ފެބުރުއަރީ މަހުގައި މުބާރާތުގެ ނޮކްއައުޓް ބުރުގައި ވާދަކުރާ ސްކޮޑުގައި އެ ކުޅުންތެރިން ހިމެނުމުގެ ފުރުޞަތު ޗެލްސީއަށް ލިބިގެންދާނެ އެވެ.
މީގެތެރެއިން، ޕާމާ އަކީ ނިމިދިޔަ ސީޒަނުގައި މޮޅު ކުޅުމެއްދައްކައި، މިފަހަރުގެ ބަލޮންޑޯ އެވޯޑަށް ނޮމިނޭޓްވެފައިވާ 30 ކުޅުންތެރިންގެ ތެރޭގައި ހިމެނޭ ކުޅުންތެރިއެކެވެ. އޭނާ ވަނީ ޕީއެފްއޭ އިން ހޮވި މިދިޔަ އަހަރުގެ އެންމެ މޮޅު ޒުވާން ކުޅުންތެރިޔާގެ އެވޯޑުވެސް ހާސިލްކޮށްފައެވެ. މިއާއެކު، އޭނާ ވެފައިވަނީ މިވަގުތު ޗެލްސީގައި ހުރި އެންމެ މުހިއްމު ކުޅުންތެރިޔާ އަށެވެ.
ޕާމާ ވަނީ މިހާތަނަށް ޔޫރަޕްގައި ޗެލްސީ ކުޅުނު ދެ މެޗުގައިވެސް ބަދަލު ކުޅުންތެރިއެއްގެ ގޮތުގައި ކުޅެން ނިކުމެފައެވެ. މިވަގުތު އަނިޔާގެ މައްސަލައަކާ ގުޅިގެން އިތުރަށް ފަރުވާ ހޯދުމުގެ ގޮތުން ކުރިއަށް އޮތް ޔުއެފާ ނޭޝަންސް ލީގުގައި ވާދަކުރާ އިނގިރޭސި ސްކޮޑުންވެސް ޕާމާ ވަނީ އަމިއްލަ އަށް ވަކިވެފައެވެ.
މި ފަހަރުގެ ސީޒަނުގައި ޗިލްވެލް އަށް ޗެލްސީން އެއްވެސް މުބާރާތެއްގައި ކުޅުމުގެ ފުރުޞަތު ދޭނެ ކަމަށް ނުބެލެވެއެވެ. މީގެކުރީން، އެ ޓީމުގެ ކޯޗު، އެންޒޯ މަރެސްކާ ވަނީ ޗިލްވެލް ހިމެނޭ ގޮތަށް ސީނިއާ ގިނަ ކުޅުންތެރިންތަކެއް އޭނާގެ ގޭމް ޕްލޭންގައި ނުހިމެނޭ ކަމަށް ބުނެފައެވެ. އޭގެތެރެއިން، ރަހީމް ސްޓާލިން ވަނީ ލޯން އެއްބަސްވުމެއްގެ ދަށުން، އާސެނަލަށް ބަދަލުވެފައެވެ.
ކޮންފަރެންސް ލީގުގައި ވާދަކުރާ ޗެލްސީގެ ސްކޮޑުން ޖާގަ ދީފައިވާ ކުޅުންތެރިންގެ ތެރޭގައި، މި ފަހަރުގެ ސީޒަނަށް އެ ޓީމާ ގުޅުނު އިނގިރޭސި ވިންގް ޖޭޑަން ސަންޗޯ އާއި ޕޯޗުގީޒް ފޯވާޑް ޔާއޯ ފެލިކްސް ހިމެނެއެވެ.
ޗެލްސީއަށް މި ފަހަރުގެ ސީޒަނުގައި ޕްރިމިއާ ލީގުގެ އެހެން ޓީމުތަކާ އަޅާބަލާއިރު ގިނަ މެޗުތަކެއް ކުޅެންޖެހޭނެ އެވެ. އެގޮތުން، މުޅިން އައު ފޯމެޓަކަށް އެމެރިކާގައި ބޭއްވުމަށް ހަމަޖެހިފައިވާ ފީފާ ކްލަބް ވޯލްޑް ކަޕް ހިމެނޭ ގޮތަށް މުޅިއެކު ފަސް މުބާރާތެއްގައި ޖުމްލަ 80 އެއްހާ މެޗު ޗެލްސީއަށް ކުޅެން ޖެހިދާނެއެވެ.