ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) ގެ ހިންގުން ކުޅިވަރާ ބެހޭ ގައުމީ މަޖިލީހަށް ހަވާލުކުރަން ކޮމިޝަނަރ އޮފް ސްޕޯޓްސްއިން ނިންމި ނިންމުމާ ދެކޮޅަށް ހުށަހެޅި މައްސަލައިގައި ވަގުތީ އަމުރެއް ނެރެދެވެން ނެތް ކަމަށް ސިވިލް ކޯޓުން ނިންމައިފިއެވެ.
މިދިޔަ އޯގަސްޓް މަހުގެ މެދުތެރޭގައި ކޮމިޝަނަރ އޮފް ސްޕޯޓްސް މުޙައްމަދު ޠަލާލް، އެކްސްގައި ކުރެއްވި ޕޯސްޓެއްގައި ވިދާޅުވީ ބެޑްމިންޓަން އެސޯސިއޭޝަންގެ ހިންގުން ވަގުތީ ގޮތުން އެ އެސޯސިއޭޝަންގެ މުއައްސިސް، ކުޅިވަރާ ބެހޭ ގައުމީ މަޖިލީހާ ހަވާލު ކުރުމަށް ނިންމައި، އެކަން އެ އެސޯސިއޭޝަނަށް އަންގާފައިވާ ކަމަށެވެ. އަދި އެސޯސިއޭޝަންގެ އައު ހިންގާ ކޮމިޓީ އިންތިޚާބު ކުރުމަށްޓަކައި ކުރަންޖެހޭ މަސައްކަތްތައް ކުޅިވަރާ ބެހޭ ގައުމީ މަޖިލީހުގެ މަޝްވަރާއާއެކު ފަށާފައިވާ ކަމަށްވެސް ވިދާޅުވިއެވެ.
އެ ނިންމުމާ ދެކޮޅަށް ބީއޭއެމްއިން ސިވިލް ކޯޓަށް ވަގުތީ އަމުރެއް ނެރެދިނުމަށް މައްސަލައެއް ހުށަހެޅި ނަމަވެސް، ކޯޓުން ވަނީ އެ އަމުރު ނެރެދެވޭނެ ގާނޫނީ ހަމައެއް ނެތް ކަމަށް ކަނޑައަޅާފައެވެ. އަދި އެ ގޮތަށް ކަނޑައެޅީ ވަގުތީ އަމުރުގެ ހުށަހެޅުން ހުށަހެޅުމުގެ ހައިސިއްޔަތު ބެޑްމިންޓަން އެސޯސިއޭޝަނުގެ މުއްދަތު ހަމަވެފައިވާ ހިންގާ ކޮމިޓީއަށް ލިބިގެން ނުވާތީ ކަމަށްވެސް ސިވިލް ކޯޓުގެ ނިންމުމުގައި ވަނީ ފާހަގަކޮށްފައެވެ.
ބީއޭއެމްގެ ހިންގާ ކޮމިޓީގެ މުއްދަތު ހަމަވެފައި އޮންނަތާ ހަ މަހަށް ވުރެ ގިނަ ދުވަސް ވެފައިވާއިރު، އެ އެސޯސިއޭޝަނުން އެންމެ ފަހުން ހިންގާ ކޮމިޓީ އިންތިޚާބުކޮށްފައިވަނީ 2021 ވަަނަ އަހަރުގެ ފެބްރުއަރީ މަހުގެ ތެރޭގައެވެ. އަދި އެ ހިންގާ ކޮމިޓީ، ސްޕޯޓްސް ކޮމިޝަނުގައި ރަޖިސްޓަރީ ކުރީ އެ އަހަރުގެ މާޗު މަހުގެ ތެރޭގައެވެ. މިދިޔަ ޖުލައި މަހުގެ މެދު ތެރޭގައި ބީއޭއެމްގެ ރައީސްގެ މަގާމުން މޫސާ ނާޝިދު (މޫސަ) ވަނީ އިސްތިއުފާ ދެއްވާފައެވެ. ނަމަވެސް އެ އެސޯސިއޭޝަނުގެ ރައީސްކަން މިދިޔަ ތިން ދައުރުގައި ކުރެއްވި މޫސަ އިސްތިއުފާދެއްވާފައިވަނީ މަގާމުގެ މުއްދަތު ހަމަވިތާ ހަތަރު މަސް ފަހުންނެވެ.
ބެޑްމިންޓަން އެސޯސިއޭޝަނުން ހުށަހެޅި މައްސަލައިގައި ވަގުތީ އަމުރެއް ނެރެދީފައި ނުވާއިރު، ބީއޭއެމްގެ ހިންގުން ކުޅިވަރާ ބެހޭ ގައުމީ މަޖިލީހަށް ހަވާލުކުރަން ކޮމިޝަނަރ އޮފް ސްޕޯޓްސްއިން ނިންމި ނިންމުމާ ގުޅިގެން ރާއްޖެއަށް ފިޔަވަޅު އަޅަން ޖެހިދާނެކަމުގެ އިންޒާރު ދުނިޔޭގެ ބެޑްމިންޓަން ފެޑެރޭޝަން (ބީޑަބްލިއުއެފް) އިން މީގެ ކުރިން ވަނީ ދީފައެވެ.
ބީޑަބްލިއުއެފް އިން މޯލްޑިވްސް އޮލިމްޕިކް ކޮމިޓީ (އެމްއޯސީ) އަށް ފޮނުވި ސިޓީއެއްގައި ބުނެފައިވާ ގޮތުގައި ބީއޭއެމްގެ ހިންގުން ކުޅިވަރާ ބެހޭ ގައުމީ މަޖިލީހާ ހަވާލުކުރީ، މި އަހަރުގެ ފަހުކޮޅު އެ އެސޯސިއޭޝަންގެ އިންތިޚާބު ބޭއްވުމަށް މަގުފަހި ކުރުމަށް ތިން މެންބަރުންގެ އެޑްހޮކް ކޮމިޓީއެއް އެކުލަވާލުމަށް މަޝްވަރާ ކުރަމުންދަނިކޮށެވެ. އަދި ބީއޭއެމްގެ ހިންގުން ކުޅިވަރާ ބެހޭ ގައުމީ މަޖިލީހާ ހަވާލުކޮށްފައިވާ ނިންމުން ބަދަލުނުކޮށް ކުރިއަށްދާން ނިންމައިފިނަމަ، ބީއޭއެމަށް އެކަމުގެ ނޭދެވޭ އަސަރު ފޯރާނެ ކަމަށް ބެލެވޭތީ ރާއްޖެއަށް ފިޔަވަޅު އަޅަން ބީޑަބްލިއުއެފްގެ ކައުންސިލަށް ހުށަހަޅަން ޖެހިދާނެ ކަމަށްވެސް ވަނީ ބުނެފައެވެ.
މިކަމާ ގުޅިގެން "ޕީއެސްއެމް ސްޕޯޓްސް" އަށް މައުލޫމާތުދެއްވަމުން ޠަލާލް ވިދާޅުވީ ބީއޭއެމްގެ ހިންގުން ކުޅިވަރާ ބެހޭ ގައުމީ މަޖިލީހާ ހަވާލުކުރަން ނިންމީ އެ އެސޯސިއޭޝަނުގެ ގިނަ މައްސަލަތަކެއް ފެންމަތިވެ، ބެޑްމިންޓަން ކޮމިއުނިޓީ އާއި ކުޅުންތެރިންގެ ގިނަ ޝަކުވާތަކެއް ލިބެމުން އައުމާއެކު، އެ މައްސަލަތައް ހައްލުކޮށް، އިދާރީ ގޮތުން ކުރަން ޖެހޭ ކަންކަން ކުރުމަށް މަގުފަހިކޮށްދިނުމުގެ މަގުސަދުގައި ކަމަށެވެ. އަދި ބީއޭއެމްގައި ހުރި މައްސަލަތައް ހައްލުކުރުމަށް އެ އެސޯސިއޭޝަނުގެ ހިންގާ ކޮމިޓީގެ ފަރާތުން އެއްބާރުލުން ލިބިފައިނުވާކަންވެސް ޠަލާލް ވަނީ ފާހަގަކުރައްވާފައެވެ.
ޠަލާލް ވިދާޅުވީ ކަންކަން ހިނގަމުންދާ ގޮތާއި، ކަމުގެ ހަގީގަތް އެސޯސިއޭޝަނުން ބީޑަބްލިއުއެފް އަށް ވަރަށް ބޮޑަށް އޮޅުވާލާފައިވާކަން ފާހަގަކުރެވިފައިވާ ކަމަށެވެ. އަދި ބީޑަބްލިއުއެފް އިން އައީ އިންޒާރެއް ކަމަށް ނުބަލާ ކަމަށާއި، ބީޑަބްލިއުއެފްގެ ބަހެއް ލިބުން އެއީ ބެޑްމިންޓަންގައި ހުރި މައްސަލަތައް ހައްލުކުރުމަށް ކުރާ މަސައްކަތަށް ލިބިގެންދިޔަ އިތުރު ކުރިއެރުމެއް ކަމަށްވެސް ވަނީ ވިދާޅުވެފައެވެ.
ބީއޭއެމްގެ ހިންގުމުގައި ގިނަ މައްސަލަތަކެއް ހުރިއިރު، މިދިޔަ ފަސް ވަރަކަށް މަސް ދުވަހުގެ ތެރޭގައި އެ އެސޯސިއޭޝަނާ ގުޅޭ ކޮރަޕްޝަންގެ ގިނަ މައްސަލަތަކެއްވެސް ވަނީ ފެންމަތިވެފައެވެ.