ބަޔާން މިއުނިކާއި ބޮރޫޝިއާ ޑޯޓްމުންޑުގެ ކުރީގެ ޑިފެންޑަރު މެޓްސް ހަމެލްސް، އިޓަލީގެ އޭއެސް ރޯމާއަށް ބަދަލުވެއްޖެއެވެ.
އުމުރުން 35 އަހަރުގެ ހަމެލްސް ރޯމާއަށް ބަދަލުވީ އެއްއަހަރުގެ އެއްބަސްވުމެއްގައި 2.5 މިލިއަން ޔޫރޯގެ ޑީލެއްގައެވެ. މިދިޔަ ޖޫން މަހުގެ ނިޔަލަށް ޑޯޓްމުންޑް އާއެކު ހަމެލްސް ހަދާފައިވާ އެއްބަސްވުން ހަމަވުމުން، މިހާތަނަށް އޭނާ ހުރީ ފްރީ އޭޖެންޓެއްގެ ގޮތުގައެވެ.
އޭނާގެ ކްލަބު ކެރިއަރުގައި ޑޯޓްމުންޑަށް 500 އަށްވުރެ ގިނަ މެޗު ކުޅެދީފައިވާއިރު، އެ ޓީމާއެކު ވަނީ ޖަރުމަނު ލީގާއި ޖަރުމަނު ކަޕް ދެ ފަހަރު ކާމިޔާބުކޮށްފައެވެ.
އަދި ބަޔާންގައި ހޭދަކުރި މުއްދަތުގައި ހަތަރު ފަހަރު ލީގު ކާމިޔާބުކޮށް، ޖަރުމަނު ސުޕަ ކަޕް ތިން ފަހަރު އަދި ޖަރުމަނު ލީގު ކަޕާއި، ޖަރުމަނު ކަޕް އެއް ފަހަރު ވަނީ ކާމިޔާބުކޮށްފައެވެ. އަދި އެ ކްލަބަށް އޭނާ ވަނީ 118 މެޗު ކުޅެދީފައެވެ.
2014 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރި ޖަރުމަނު ޓީމުގައި މުހިއްމު ދައުރެއް އަދާކުރި ހަމެލްސް ވަނީ ގައުމީ ޓީމަށް ކުޅުނު 78 މެޗުގައި ފަސް ލަނޑު ޖަހައިފައެވެ.
ރޯމާގައި ހަމެލްސް ބޭނުންކުރާނީ 15 ނަންބަރު ޖާޒީ އެވެ. އޭނާ އަކީ އެ ކްލަބަށް ކުޅޭ ޖަރުމަނަށް ނިސްބަތްވާ ހަތްވަނަ ކުޅުންތެރިޔާ އެވެ.
ހަމެލްސްއަކީ މި ފަހަރުގެ ޓްރާންސްފާ ބާޒާރުގައި ރޯމާ އަށް ބަދަލުވި 11 ވަނަ ކުޅުންތެރިޔާ އެވެ. މި ފަހަރުގެ ސީޒަނަށް އެ ޓީމަށް ބަދަލުވި ކުޅުންތެރިންގެ ތެރޭގައި، ޔޫކްރޭންގެ ފޯވާޑް އާޓެމް ޑޮވްބީކާއި، އާޖެންޓީނާގެ ވިންގް މަޓިއަސް ސޫލޭގެ އިތުރުން އެންޒޯ ލެ ފީ އާއި އެންޖެލީނޯ އަދި އޮސްޓްރޭލިއާގެ ގޯލްކީޕަރު، މެޓް ރަޔާން ހިމެނެއެވެ.