ސައުދީ އަރަބިއްޔާގައި 2027 ވަނަ އަހަރު އޮންނަ އޭއެފްސީ އޭޝިއަން ކަޕުގެ ކޮލިފައިންގައި ސްރީ ލަންކާ އާއި ކެމްބޯޑިއާ ބައްދަލުކުރާ މެޗުގެ ކޮމިޝަނަރަކަށް ރާއްޖޭގެ އަޙްމަދު ޝާހިރު ހަމަޖައްސައިފިއެވެ.
މި މެޗު މާދަމާ މެންދުރުފަހު ކޮލަމްބޯގެ ރޭސް ކޯސް އިންޓަނޭޝަނަލް ސްޓޭޑިއަމުގައި ކުޅޭއިރު، ޝާހިރު ވަނީ މެޗުގެ ކުރިން މިއަދު ބޭއްވި މެނޭޖާސް މީޓިންގައި ބައިވެރިވެފައެވެ.
އޭޝިއަން ކަޕުގެ ކޮލިފައިން މެޗުގެ މެޗު ކޮމިޝަނަރަކަށް ޝާހިރު ހަމަޖެއްސިއިރު، އޭނާ ވަނީ މީގެ ކުރިން ފީފާ ވޯލްޑް ކަޕުގެ ކޮލިފިކޭޝަން ވަރުގަދަ މެޗުތަކެއްގައިވެސް ކޮމިޝަނަރުކަން ކޮށްފައެވެ. މީގެ އިތުރުން ޝާހިރު ވަނީ 2015 ގައި އޮސްޓްރޭލިއާގައި ބޭއްވި އޭޝިއަން ކަޕުގެ ފައިނަލާއި، 2019 ވަނަ އަހަރުގެ އޭއެފްސީ ޗެމްޕިއަންސް ލީގުގެ ސެމީ ފައިނަލުގައިވެސް މެޗު ކޮމިޝަނަރުކަން ކޮށްފައެވެ.
މީގެ ކުރިން ގައުމީ ފުޓްބޯޅަ ޓީމުގެ މެނޭޖަރުކަންވެސް ކޮށްފައިވާ ޝާހިރު ވަނީ 2008 ވަނަ އަހަރު ފީފާއިން އެކުލަވާލި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ނޯމަލައިޒޭޝަން ކޮމިޓީގެ ޗެއާމަންގެ މަގާމުވެސް ފުރުއްވާފައެވެ.
އޭޝިއަން ކަޕުގެ ކޮލިފައިން ޕްލޭއޮފް ބުރުގައި ލަންކާ އާއި ކެމްބޯޑިއާ ވާދަކުރާއިރު، ދެ ލެގުގެ މި މެޗުން މޮޅުވާ ޓީމަކަށް ތިންވަނަ ބުރުގެ ފުރުސަތު ލިބިގެންދާނެއެވެ. ރާއްޖެއަށް ވަނީ ޕްލޭއޮފް ކުޅެން ނުޖެހި ކޮލިފައިންގެ ތިންވަނަ ބުރުން ފުރުސަތު ލިބިފައެވެ. އޭޝިއަން ކަޕުގެ ކޮލިފައިން ތިންވަނަ ބުރުގައި 24 ޓީމެއް ވާދަކުރާއިރު، އެ ޓީމުތައް ހަ ގްރޫޕަކަށް ބަހާލާނެއެވެ. ކޮންމެ ގްރޫޕެއްގައި ހަތަރު ޓީމު ހިމެނޭއިރު، އޭޝިއަން ކަޕުން ފުރުސަތު ލިބޭނީ ކޮންމެ ގްރޫޕަކުންވެސް އެންމެ ކުރީގައި އޮންނަ ޓީމުތަކަށެވެ.