2024 ވަނަ އަހަރުގެ ސީޒަނުގައި ބައިނަލްއަގުވާމީ ޓްރާންސްފާތައް ރިކޯޑު އަދަދަކަށް މައްޗަށް ގޮސްފައިވާ ދުނިޔޭގެ ފުޓްބޯޅައިގެ މައި އިދާރާ، ފީފާ އިން ބުނެފިއެވެ.
ދާދިފަހުން ފީފާ އިން ނެރުނު ރިޕޯޓްގައިވާ ގޮތުން، މި ފަހަރުގެ ސީޒަނަށް ޓްރާންސްފާ ބާޒާރުގައި ގާތްގަނޑަކަށް 11 ހާހެއްހާ ބައިނަލްއަގުވާމީ ޓްރާންސްފާ ރަޖިސްޓްރީކޮށްފައިވާ ކަމަށާއި، އެއީ ކުރީއަހަރަށް ވުރެ 4.8 އިންސައްތައިގެ ކުރިއެރުމެއް ކަމަށް ބަޔާންކޮށްފައިވެއެވެ.
އެގޮތުން، ކުޅުންތެރިން ގަތުމަށް ކްލަބުތަކުން ގާތްގަނޑަކަށް 6.40 ބިލިއަން އެމެރިކާ ޑޮލަރު ޓްރާންސްފާ ފީގެ ގޮތުގައި ހޭދަކޮށްފައިވާއިރު، މިއީ ކުރީ އަހަރަށްވުރެ 13.06 އިންސައްތައިގެ ވެއްޓުމެކެވެ. މީގެތެރެއިން، ގާތްގަނޑަކަށް 5.58 ބިލިއަން އެމެރިކާ ޑޮލަރު ހޭދަކޮށްފައިވަނީ އިނގިރޭސި ކްލަބުތައް ހިމެނޭ ޔޫރަޕުންނެވެ. މިއީ އަހަރުގެ މެދުތެރޭގެ ޓްރާންސްފާ ބާޒާރުގައި ހޭދަކުރި މިންވަރަށްވުރެ 1.6 ބިލިއަން އެމެރިކާ ޑޮލަރުގެ އިތުރުވުމެކެވެ.
އެހެންނަމަވެސް، އިނގިރޭސިވިލާތަށް ނިސްބަތްވާ ކްލަބުތަކުން ކުޅުންތެރިން ގަތުމަށް ކުރި ހޭދަވަނީ، އޭގެ ކުރީ އަހަރުގެ 2 ބިލިއަން އެމެރިކާ ޑޮލަރަށްވުރެ 15.5 އިންސައްތަ ދަށަށް ގޮސްފައެވެ. މިކަން މިގޮތަށް ހިނގާފައިމިވަނީ، ޓްރާންސްފާ ބާޒާރުގައި ޕްރިމިއާ ލީގުގެ ކުލަބުތަކުން އިތުރަށް ހޭދަކޮށްގެން ޕީއެސްއާރްގެ ގަވާއިދުތަކާ ހިލާފުވެ، އަދަބު ލިބިދާނެކަމުގެ ސަބަބުން އޮތް ކަންބޮޑުވުންތަކަށް އިތުރަށް ވިސްނަގައިގެން ކުރިއަށްދިއުމުގެ ގޮތުން ކަމަށް ބެލެވެއެވެ.
ޓްރާންސްފާ ބާޒާރުގައި އިނގިރޭސިވިލާތަށް ނިސްބަތްވާ ކުލަބުތަކުން ކުރި ހޭދަ ދަށަށް ގޮސްފައިވީނަމަވެސް، އެންމެ ގިނަ އަދަދަކަށް ކުޅުންތެރިން ބަދަލުވެފައިވަނީ އިނގިރޭސި ކުލަބުތަކަށެވެ. އެގޮތުން، އިނގިރޭސި ކްލަބުތަކަށް 526 އެއްހާ ޓްރާންސްފާ ކޮށްފައިވާއިރު، ދެން އެންމެ ގިނައިން ކުޅުންތެރިން ބަދަލުވެފައިވަނީ ބްރެޒިލާއި ޕޯޗުގީޒް ކުލަބުތަކަށެވެ.
އެކަމަކު، މި ފަހަރުގެ ޓްރާންސްފާ ބާޒާރުގައި އަންހެން ކުޅުންތެރިންނަށް ކުރި ހޭދަވަނީ ކުރިފަހަރަށްވުރެ ގާތްގަނޑަކަށް ދެގުނަ އިތުރުވެފައެވެ. އެގޮތުން، މި ފަހަރުގެ އަހަރުގެ މެދުތެރޭގެ ޓްރާންސްފާ ބާޒާރުގައި އަންހެން ކުޅުންތެރިންނަށް ޓްރާންސްފާ ފީގެ ގޮތުގައި ގާތްގަނޑަކަށް 6.8 މިލިއަން އެމެރިކާ ޑޮލަރު ވަނީ ހޭދަކޮށްފައެވެ.
މީގެއިތުރުން، ސަޢުދީ ޢަރަބިއްޔާގެ ކްލަބުތަކުން ޓްރާންސްފާ ބާޒާރުގައި ކުރި ޚަރަދުތައް ވެސް ވަނީ ކުރީއަހަރާ އަޅާބަލާއިރު ގާތްގަނޑަކަށް 50.74 އިންސައްތަ ދަށަށް ގޮސްފައެވެ. މިދިޔަ އަހަރުގެ ޓްރާންސްފާ ބާޒާރުގައި ގާތްގަނޑަކަށް 875 މިލިއަން އެމެރިކާ ޑޮލަރު ޓްރާންސްފާ ފީގެ ގޮތުގައި ހޭދަކޮށްފައިވާއިރު، މިފަހަރުގެ ސީޒަނުގައި ކުރި ހޭދަހުރީ 431 މިލިއަން އެމެރިކާ ޑޮލަރުގައެވެ. އެކަމަކު، ސަޢުދީ ލީގުގައި ކުޅުންތެރިން ރަޖިސްޓްރީކުރުމުގެ ފުރުޞަތު އަންނަ އޮކްޓޫބަރު މަހުގެ ނިޔަލަށް އޮތީ ހުޅުވިފައެވެ.