މިއީ ލިވަޕޫލްގައި ހުންނާނެ އެންމެ ފަހު ސީޒަން ކަމަށާއި، އޭނާގެ އެއްބަސްވުން އައުކުރުމާ ގުޅޭ ގޮތުން މިހާތަނަށް ކުލަބުގެ އެއްވެސް ފަރާތަކުން މަޝްވަރާ ކޮށްފައިނުވާ ކަމަށް މުޙައްމަދު ސަލާހު ބުނެފިއެވެ.
އުމުރުން 32 އަހަރުގެ މިސްރަށް އުފަން ސަލާހު ލިވަޕޫލް އާއިއެކު ހަދާފައިވާ އެއްބަސްވުމުގެ މުއްދަތު އަންނަ ހޫނު މޫސުމުގެ ނިޔަލަށް ހަމަވާނެ އެވެ.
ޕްރިމިއާ ލީގުގައި މެންޗެސްޓަރ ޔުނައިޓެޑް އަތުން ރޭ 3-0 ގެ ނަތީޖާއަކުން މޮޅުވި މެޗުގައި ލަނޑުވެސް ޖަހާފައިވާ ސަލާހު އެ މެޗަށްފަހު ބުނެފައިވަނީ އެ މެޗަކީ އޭނާއަށް ޚާއްސަ މެޗެއް ކަމަށެވެ. އެގޮތުން އެ މެޗަށް އޭނާ ނިކުތީ އެއީ އޯލްޑް ޓްރެފަޑްގައި އޭނާ ކުޅޭނެ ފަހު މެޗު ކަމަށް ގަބޫލު ކޮށްގެން ކަމަށެވެ.
މެޗަށްފަހު ސްކައި ސްޕޯޓްސްއަށް ދިން އިންޓަވިއުއެއްގައި ސަލާހު ބުނެފައިވަނީ އޭނާގެ ވިސްނުން މިހާރު ހުރީ އޭނާ އަކީ ހިލޭ ކުޅުންތެރިއެއް ގޮތުގައި ކަމަށެވެ. އަދި މިވަގުތު އޭނާ އާއި ކްލަބުން އެފަދަ ވާހަކައެއް ދައްކާފައި ނުވާތީ އެކަމާއިމެދު ނުވިސްނާ ކަމަށާއި ސީޒަން ނިމުމާއިއެކު ވާނެ ގޮތެއް ބަލަން ހުރި ކަމަށެވެ.
އެކަމާއި ގުޅޭ ގޮތުން ސުވާލު ކުރުމުން ކޯޗް ސްލޮޓް ބުނެފައިވަނީ ކުޅުންތެރިންގެ ކޮންޓްރެކްޓާއި ގުޅޭ ގޮތުން އޭނާ ވާހަކަ ދައްކަން ބޭނުން ނުވާ ކަމަށާއި ސަލާހުގެ ކުޅުމާއިމެދު އޭނާއަށް ދެއްކޭނެ ވަރަށް ގިނަ ވާހަކަ އެބަހުރި ކަމަށެވެ. އަދި ރޭގެ މެޗުގައި ސަލާހުގެ ފަރާތުން މޮޅު ކުޅުމެއް ފެނިގެން ގޮސްފައިވާ ކަމަށްވެސް ސްލޮޓް ވަނީ ބުނެފަ އެވެ.
އިޓަލީގެ ރޯމާ އިން 2017 ވަނަ އަހަރު ލިވަޕޫލް އާއި ސަލާހު ގުޅިފައިވަނީ 36.9 މިލިއަން ޕައުންޑްގެ ފީއަކަށެވެ. އަދި 2022 ވަނަ އަހަރު އޭނާ ލިވަޕޫލް އާއި އެކު ހަދާފައިވާ އެއްބަސްވުމުގެ މުއްދަތު އިތުރު ކޮށްފައިވަނީ އެ ކްލަބުގެ ތާރީޚުގައިވެސް އެންމެ ބޮޑު މުސާރައެއް ލިބޭ ކުޅުންތެރިޔާގެ ގޮތުގަ އެވެ. އެއީ މުސާރައިގެ ގޮތުގައި ހަފްތާއަކު ތިން ލައްކަ ފަންސާސް ހާސް ޕައުންޑެވެ.
ސަލާހުގެ ސޮއި ހޯދުމަށް މިދިޔަ ސެޕްޓެމްބަރ މަހު ސައުދި އަރަބިއްޔާގެ އަލް އިއްތިހާދުން 150 މިލިއަން ޕައުންޑުގެ ހުށައެޅުމެއް ލިބުނު ނަމަވެސް ލިވަޕޫލް އިން ވަނީ އެ ހުށައެޅުން ދޫކޮށްފަ އެވެ.
ސަލާހު ވަނީ ލިވޫޕްލް އަށް މިހާތަނަށް ކުޅެދިން ދުއްސައްތަ ފަންސާހަށްވުރެ ގިނަ މެޗުގައި 150 އަށް ވުރެ ގިނަ ލަނޑު ޖަހާފަ އެވެ.