މިހާތަނަށް 4004 ކުއްޖަކު ތެލެސީމިއާއަށް ސްކްރީންކޮށްފި
-
ތެލެސީމިއާއަށް ހޭލުންތެރިކުރުމުގެ ޤައުމީ ޕްރޮގްރާމްގެ ފުރަތަމަ ފިޔަވަހި ވަނީ ނިންމާލާފައި
-
ތެލެސީމިއާއަށް ސްކްރީންކޮށްފައިވަނީ ގުރޭޑު 10 ގައި ކިޔަވާ ދަރިވަރުން
-
ތެލެސީމިއާއަށް ހޭލުންތެރިކުރުވުމުގެ ސެޝަންތަކެއްވެސް ކުރިއަށްގެންގޮސްފައިވޭ
ތެލަސީމިއާއަށް ހޭލުންތެރިކުރުމުގެ ޤައުމީ ކެމްޕޭންގެ ދަށުން މިހާތަނަށް 4004 ކުއްޖަކު ތެލެސީމިއާއަށް ސްކްރީންކޮށްފިއެވެ.
ސްކޫލް ކުދިން ތެލެސީމިއާއަށް ސްކްރީންކުރުމުގެ ޤައުމީ ޕްރޮގްރާމްގެ ފުރަތަމަ ފިޔަވަހި ފަށާފައިވަނީ މިއަހަރުގެ ފެބްރުއަރީމަހުގެ 1 ވަނަ ދުވަހުއެވެ.
ޞިއްޙަތާ ބެހޭ ވުޒާރާއިން ވިދާޅުވީ ފެބްރުއަރީމަހުގެ ތެރޭގައި ފެށި ތެލަސީމިއާއަށް ހޭލުންތެރިކުރުމުގެ ޤައުމީ ކެމްޕޭން މިހާރު ނިންމާލާފައިވާ ކަމަށެވެ. އެގޮތުން މި ކެމްޕެއިންގެ ދަށުން ގުރޭޑު 10 ގައި ކިޔަވަމުންދާ 4004 ދަރިވަރަކު ތެލެސީމިއާއަށް ސްކްރީންކޮށްފައިވާކަމަށް ޞިއްޙަތާބެހޭ ވުޒާރާއިން ވިދާޅުވިއެވެ.
މި ކެމްޕޭންގެ ދަށުން ދަރިވަރުން ސްކްރީންކުރުމުގެ އިތުރުން ތެލެސީމިއާއަށް ހޭލުންތެރިކުރުވުމުގެ ސެޝަންތަކެއްވެސް ކުރިއަށް ގެންގޮސްފައިވެއެވެ. އެގޮތުން މާލެ ސަރަހައްދުގައި ހިމެނޭ ސްކޫލްތަކުގެ 124 ބެލެނިވެރިންނާއި 198 ދަރިވަރުންނަށް ތެލެސީމިއާއާ ގުޅޭގޮތުން މަޢުލޫމާތު ދީފައިވެއެވެ. އަދި ސްކޫލްތަކުގެ އިތުރުން ސަރުކާރުގެ ބައެއް ވުޒާރާތަކާއި އޮފީސްތަކުގައިވެސް ހޭލުންތެރިކުރުމުގެ ސެޝަންތައް ކުރިއަށް ގެންގޮސްފައިވާކަމަށް ޞިއްޙަތާ ބެހޭ ވުޒާރާއިން ވިދާޅުވިއެވެ.
ތެލަސީމިއާއަށް ހޭލުންތެރިކުރުމުގެ ޤައުމީ ކެމްޕޭންގެ ފުރަތަމަ ފިޔަވަހި ކުރިއަށްގެންގޮސްފައިވަނީ މޯލްޑިވިއަން ބްލަޑް ސާވިސަސްއާއި ޞިއްޙަތާ ބެހޭ ވުޒާރާއާއި ތަޢުލީމީ ވުޒާރާއާ ގުޅިގެންނެވެ.