ފްރެންޗް ލީގުގައި ރޭ ލިލް ބަލިކޮށް، އެންމެ ފަހުގެ ޗެމްޕިއަން ޕީއެސްޖީން ސައްތައިން ސައްތައިގެ ރިކޯޑު ދަމަހައްޓައިފިއެވެ.
ޕީއެސްޖީން މި މެޗު ކާމިޔާބުކުރި 3-1 ގެ ނަތީިޖާއަކުންނެވެ.
މި ނަތީޖާއާއެކު ޕީއެސްޖީ އެއްވަނައިގައި އޮތީ މިހާތަނަށް ކުޅުނު ތިން މެޗުން ހޯދީ ނުވަ ޕޮއިންޓާއެކު އެވެ. އޭގެ ދެ ޕޮއިންޓް ފަހަތުން ދެވަނައިގައި އޮތް އޮލިމްޕިކް މާސޭ އާއި ތިނެއްގައި އޮތް ނަންޓެސްގެ އިތުރުން ހަތަރުވަނައިގައި އޮތް ލެންސް އަށް ވެސް ލިބިފައިވަނީ ހަތް ޕޮއިންޓެވެ. މާސޭ އަށް ކުރިލިބެނީ ފައިދާ ގޯލްގެ ތަފާތުންނެވެ.
ލިލްގެ ޑިކެތުލޯން އެރީނާގައި ރޭ ކުޅުނު މި މެޗުގެ ފުރަތަމަ ހާފުގެ 33 ވަނަ މިނެޓުގައި ޕީއެސްޖީން ލީޑްނެގީ ލިބުނު ޕެނަލްޓީއަކުން އެ ޓީމުގެ ޕޯޗުގީޒް މިޑްފީލްޑަރު، ވިޓީނިއާ ވައްދާލި ލަނޑުންނެވެ. މިއީ ޕެނަލްޓީއޭރިޔާ ތެރެއިން ޕީއެސްޖީގެ އޮސްމާނޭ ޑެމްބެލޭ އަށް ލިލްގެ އަލެކްސެންޑްރޯ ރިބެއިރޯ ކުރި ފައުލަކަށް ރެފްރީ ދިން ޕެނަލްޓީއެކެވެ.
އޭގެ ތިން މިނެޓުފަހުން، ޕީއެސްޖީގެ ދެވަނަ ލަނޑުޖަހައިދިނީ ފްރާންސްގެ ވިންގް، ބްރެޑްލީ ބާކޯލާ އެވެ. މިއީ ކައުންޓާއެޓޭކެއްގައި ޕީއެސްޖީން ކާމިޔާބުކުރި ގޯލެކެވެ. މިއީ މި ފަހަރުގެ ސީޒަނުގައި ބާކޯލާގެ ފަރާތުން ފެނިގެންދިޔަ ހަތަރުވަނަ ގޯލެވެ.
ދެވަނަ ހާފު ފެށިގެން ލިލް އިން ކުޅުން ރަނގަޅުކުރިއިރު، މެޗު ނިމެން 12 މިނެޓަށްވެފައިވަނިކޮށް އެ ޓީމުގެ ހަމައެކަނި ލަނޑުޖަހައިދިނީ ގޯލާއި ދުރުން ފޮނުވާލި ހަމަލާއަކުން އެޑޮން ޒެގްރޯވާ އެވެ.
އަދި އޭގެފަހުން، މެޗުގެ އިތުރުވަގުތުގެ ދެވަނަ މިނެޓުގެ ތެރޭގައި ޕީއެސްޖީގެ ތިންވަނަ ލަނޑުޖަހައިދިނީ ފްރާންސްގެ ފޯވާޑް، ރަންޑަލް ކޯލޯ މުއާނީ އެވެ.
ޕީއެސްޖީ އަށް ލީގުގައި ދެން އޮތީ އިންޓަނޭޝަނަލް ބްރޭކަށްފަހު މި މަހުގެ 15 ވަނަ ދުވަހު އަމިއްލަ ދަނޑުގައި ބްރެސްޓްއާ ބައްދަލުކުރާ މެޗެވެ.