ކުލަބު މޯލްޑިވްސް ކަޕް 2024 ހުޅުވުމުގެ ރަސްމިއްޔާތު ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ޝަރަފުވެރިކޮށްދެއްވައިފިއެވެ.
ކުލަބު މޯލްޑިވްސްގެ މުބާރާތްތައް މި އަހަރު ފަށާފައިވަނީ ރިސޯޓް ސުޕަ ލީގު 2023 ގެ ޗެމްޕިއަނުން ޖޯލި ބީން އާއި މިދިޔަ އަހަރުގެ ކުލަބު މޯލްޑިވްސް ކަޕުގެ ޗެމްޕިއަން ކުލަބު ވެމްކޯއާ ދެމެދު ކުޅުނު ކިންގްސް ކަޕުގެ މެޗުންނެވެ. ހުޅުމާލޭ ރެހެންދި ފުޓްސަލް ދަނޑުގައި މިރޭ ކުޅުނު މެޗު 2-1 ގެ ނަތީޖާއަކުން ކާމިޔާބުކޮށް، ކިންގްސް ކަޕުގެ ޝީލްޑް އުފުލާލީ ވެމްކޯ އިންނެވެ. މި މެޗުގައި, ރާއްޖޭގެ ތާރީޚުގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ވަނީ ވެމްކޯ ޓީމަށް ކުޅެފައެވެ.
ކިންގްސް ކަޕުގެ މެޗުގެ ކުރިން, ހުޅުވުމުގެ ރަސްމިއްޔާތުގައި ވަނީ ކުލަބު މޯލްޑިވްސް އިން މި އަހަރު ބާއްވާ ތިން މުބާރާތް ކަމަށްޗާ ކުލަބު މޯލްޑިވްސް ކަޕާއި، ކުލަބު މޯލްޑިވްސް ކްލަސިކް އަދި 18/30 ފުޓްސަލް ފިއެސްޓާގެ ތަށި ދައްކާލާފައެވެ. އަދި މުބާރާތުގައި ވާދަކުރާ ޓީމުތަކުގެ ޖާޒީތައްވެސް ވަނީ ދައްކާލާފައެވެ. މީގެ އިތުރުން މި ރަސްމިއްޔާތުގައި ވަނީ ނައިބު ރައީސަށް، ކުލަބު މޯލްޑިވްސްއިން ހަނދާނީ ފިލައެއް އަރުވާފައެވެ.
މި އަހަރުގެ ކުލަބު މޯލްޑިވްސް ކަޕުގައި 28 ޓީމެއް ބައިވެރިވެފައިވާއިރު، އެ ޓީމުތައް ވަނީ ހަތް ގްރޫޕަކަށް ބަހާލާފައެވެ. ކުލަބު މޯލްޑިވްސްގެ މުބާރާތްތަކުގެ ތެރެއިން މި ފަހަރު އެންމެ ގިނަ ޓީމު ވާދަކުރަނީ ކްލަސިކްގައެވެ. އެ ގޮތުން މިދިޔަ އަހަރު ފެށި ކްލަސިކް މުބާރާތުގައި މި ފަހަރު 32 ޓީމެއް ވާދަކުރާއިރު، އެ ޓީމުތައް ވަނީ އަށް ގްރޫޕަކަށް ބަހާލާފައެވެ. މީގެ އިތުރުން ކުލަބު މޯލްޑިވްސްއިން މި އަހަރު އަންހެން ޑިވިޝަނަށް ކުރިއަށްގެންދަނީ 18/30 ފުޓްސަލް ފިއެސްޓާ އެކަންޏެވެ. އެ މުބާރާތުގައި ހަތް ޓީމު ބައިވެރިވެފައިވާއިރު، އެ ހަތް ޓީމު ވަނީ ދެ ގްރޫޕަކަށް ބަހާލާފައެވެ.
ކުލަބު މޯލްޑިވްސް ކްލަސިކް އާއި 18/30 ފުޓްސަލް ފިއެސްޓާ އަންނަ އަންގާރަ ދުވަހު ފަށާއިރު، ކުލަބު މޯލްޑިވްސް ކަޕް ފަށަން ތާވަލުކޮށްފައިވަނީ މި މަހުގެ 23 ވަނަ ދުވަހެވެ.