އޭޝިއަން ވޮލީބޯލް ކޮންފެޑެރޭޝަން (އޭވީސީ) ގެ އެގްޒެކްޓިވް ނައިބު ރައީސަކަށް ރާއްޖޭގެ ވޮލީބޯލް އެސޯސިއޭޝަނުގެ ރައީސް، އަދި ސެންޓްރަލް އޭޝިއާގެ ވޮލީބޯލް އެސޯސިއޭޝަނުގެ ރައީސްކަމުގެ މަޤާމު ފުރުއްވަމުން އަންނަ މުޙައްމަދު ލަތީފް އިންތިޚާބުވެވަޑައިގެންވި އެވެ.
ތައިލެންޑްގެ ވެރިރަށް ބެންކޮކްގައި މިދިޔަ ދެ ދުވަހު، ކުރިއަށްދިޔަ އޭވީސީގެ އިލެކްޓޯރަލް ކޮންގްރެސްގައި އެ ފެޑެރޭޝަންގެ ރައީސަކަށް އިންތިހާބުވެވަޑައިގެންނެވީ ފިލިޕީންސްގެ ވޮލީބޯލް ފެޑެރޭޝަންގެ ރައީސް، ރަމޯން ސުޒާރާ އެވެ. އޭނާ އޭވީސީގެ އިންތިހާބު ކާމިޔާބުކުރެއްވީ، 48 ވޯޓު ހޯއްދަވައިގެންނެވެ. ދެން އިންތިހާބުގައި ވާދަކުރެއްވި ގަތަރުގެ އަލީ ގާނިމް އަލް ހުވާރީ އަށް ލިބިވަޑައިގެންނެވީ 15 ވޯޓެވެ.
އޭވީސީގެ ސީނިއާ އެކްޒެކްޓިވް ނައިބު ރައީސަކަށް އޮސްޓްރޭލިއާގެ ކްރެއިގް ކެރަޗާ، އެގްޒެކްޓިވް ނައިބަކަށް ރާއްޖޭގެ ލަތީފް، ސެކްރެޓަރީ ޖެނެރަލަކަށް ކުކް އައިލެންޑްސްގެ ހިއު ގްރަހަމް، ޓްރެޝަރަކަށް ހޮންގްކޮންގް މަރީނާ ޓްސުއީ އަދި އިންޓާނަލް އޮޑިޓަރަކަށް، ބަހުރޭންގެ ހަސަން އަލްފްރާންސިނީ ވަނީ އިންތިޚާބުކޮށްފައެވެ.
އޭވީސީ ބޯޑުގައި މަސައްކަތް ކުރުމުގެ ފުރުސަތު ލަތީފަށް ލިބިވަޑައިގެންނެވިއިރު، އޭނާ އަންނަނީ ކާވާގެ ރައީސްގެ މަގާމު ދެ ވަނަ ދައުރަކަށް ފުރުއްވަމުންނެވެ. މިއީ ރާއްޖޭގެ ފަރާތެއް އޭވީސީ އެގްޒެކެޓިވް ކޮމިޓީން ފުރުސަތު ލިބުނު ފުރަތަމަ ފަހަރެވެ.