އިނގިރޭސި ޕްރިމިއާ ލީގުގެ ކްލަބް ޗެލްސީގެ ފުރަތަމަ ޓީމުން ފުރުސަތު ގެއްލިފައިވާ ރަހީމް ސްޓާލިން ލޯނު އެއްބަސްވުމެއްގެ ދަށުން އާސެނަލް އަށް ބަދަލުވެފައިވާއިރު މެންޗެސްޓަރ ޔުނައިޓެޑްގެ ޖޭޑަން ސަންޗޯ ވަނީ ލޯނެއްގެ ދަށުން ޗެލްސީ އަށް ބަދަލު ވެފައެވެ.
މި ފަހަރުގެ ޓްރާންސްފާ ބާޒާރުގެ ފަހު ވަގުތުތައް ގުނަމުންދާއިރު, އުމުރުން 29 އަހަރުގެ ސްޓާލިން އާސެނަލް އަށް ބަދަލު ވެފައިވަނީ މި ސީޒަނުގެ ނިޔަލަށެވެ. ޗެލްސީގެ ކޯޗު އެންޒޯ މަރެސްކާ ވަނީ ސްޓާލިން އަކީ އޭނާގެ ޕްލޭން ގައި ހިމެނޭ ކުޅުންތެރިއެއް ނޫން ކަމަށާއި އެހެން ކްލަބަކަށް ބަދަލުނުވާނަމަ ކުޅުމުގެ ފުރުސަތު ގެއްލޭނެ ކަމަށް ބުނެފަ އެވެ.
އާސެނަލް އަށް ބަދަލު ވުމަށްފަހު ސްޓާލިން ބުނެފައިވަނީ މިއީ ރަގަޅު ބަދަލެއް ކަމަށާއި އޭނާގެ އާ ކްލަބާއިއެކު ކާމިޔާބީ ހޯދަން ބޭނުންވާ ކަމަށެވެ.
2022 ވަނަ އަހަރު މެންޗެސްޓަރ ސިޓީން 50 މިލިއަން ޕައުންޑްގެ ޓްރާންސްފާ ފީ އަކަށް ޗެލްސީ އަށް ބަދަލުވި ސްޓާލިން އެކްލަބަށް ކުޅުނު 81 މެޗުގައި ކާމިޔާބު ކުރެވިފައިވަނީ 19 ގޯލެވެ.
ޗެލްސީން ސްޓާލިން ދޫކޮށްލިއިރު އެ ޓީމުން ވަނީ މެންޗެސްޓަރ ޔުނައިޓެޑްގެ ޖޭޑަން ސަންޗޯ ލޯނު އެއްބަސްވުމެއްގެ ދަށުން އެ ކްލަބަށް ގެނެސްފަ އެވެ.
2021 ވަނަ އަހަރު ޖަރުމަނުގެ ބޮރޫޝިއާ ޑޯޓްމަންޑް އިން 73 މިލިއަން ޕައުންޑަށް މެންޗެސްޓަރ ޔުނައިޓެޑާއި ގުޅުނު ސަންޗޯ ޗެލްސީއަށް ގެނެސްފައިވަނީ 20 މިލިއަނާއި 25 މިލިއަން ޕައުންޑާއި ދެމެދުގެ ފީ އަކަށް އޭނާގެ ކޮންޓްރެޓް ގަނެ ދާއިމީ ކުރެވޭނެ ފަދަ މާއްދާ އަކާއި އެކުގައެވެ.
ޗެލްސީގެ ކުޅުންތެރިން ގިނަވެ ކުޅުންތެރިން މަދު ކުރަން ބޭނުންވާ ކަމަށް ކޯޗު މަރެސްކާ ބުނެފައިވާއިރު, އަދިވެސް ކުޅުންތެރިން ހޯދުމުގެ މަސައްކަތް ކުރަމުންދާތީ ގިނަ ބައެއްގެ ފާޑު ކިއުންތައް ވަނީ އަމާޒު ފައެވެ.
މި ސީޒަނަށް ޓީމު އިތުރަށް ވަރުގަދަ ކުރުމުގެ ގޮތުން ޗެލްސީން ވަނީ 200 މިލިއަން ޑޮލަރަށް ވުރެ ބޮޑު ހޭދައެއް ކޮށް 12 ވަރަކަށް ކުޅުންތެރިން ގެނެސްފަ އެވެ. ޗެލްސީގެ ފުރަތަމަ ޓީމުގައި މިހާރު ސާޅީހަށްވުރެ ގިނަ ކުޅުންތެރިން އެބަތިއްބެވެ. އަދި ކޯޗު މަރެސްކާ ވަނީ ގިނަ ކުޅުންތެރިން ގޮވައިގެން ފަރިތަކުރުންތައް ކުރިއަށް ގެންދިއުމަކީ އެއްވެސް ކޯޗަކަށް ވާނެ ކަމެއް ނޫން ކަމަށެވެ.