މާލޭގެ އިރުދެކުނު ފަރާތުގައި ހަދާ އިންޑަސްޓްރިއަލް ވިލެޖްގެ މަސައްކަތުގެ ތެރޭގައި ހިމެނޭ ނެރުކެނޑުމުގެ މަސައްކަތްނިންމާ މިހަފްތާތެރޭ ނެރު ހުޅުވާލެވޭ ވަރުވާނެކަމަށް މިމަސައްކަތުގެ ކޮންޓްރެކްޓަރ އެމްޓީސީސީން ހާމަކޮށްފިއެވެ.
އިސްޑަސްޓްރިއަލް ވިލެޖްގެ މަސައްކަތަކީ މާލެތެރޭގައިހުރި އެކިކަހަލަ ކެމިކަލް ގުދަންތަކާއި، ވަރކްޝޮޕް،ގަރާޖްފަދަ ތަންތަނަށް ޚާއްޞަ ކުރައްވައިގެން ތަރައްޤީ ކުރާ ތަނެކެވެ.
މިއަހަރުގެ ޖުލައި މަހުގެ 26 ވަނަ ދުވަހު ހުޅުވުމަށް އަމާޒުކޮށްގެން ކުރިޔަށްގެންދާ އިންޑަސްޓްރިއަލް ވިލެޖްގެ މަސައްކަތުގެތެރެއިން އެންމެބާރަށް ކުރިޔަށްދާ އެއް މަސައްކަތަކީ އިރުމަތީ ފަރާތު ފަޅަށްވަދެނިކުތުމަށްޓަކައި ނެރު ކެނޑުމުގެ މަސައްކަތެވެ. އެމްޓީސީސީން ބުނީ ނެރުކެނޑުމުގެ މަސައްކަތުގެ ތެރޭން ކަނޑިންމައިގެ ތޮށިގަނޑު ޖެހުމުގެ މަސައްކަތް ފިޔަވާ އެހެންމަސައްކަތްތައް މިހާރު ނިމުމަކަށް އައިސްފައިވާކަމަށާ މި ހަފްތާގެ ތެރޭގައި އެނެރުން ވަދެނިކުމެ ވެވޭގޮތް ހަދާނެކަމަށެވެ. އެހެންނަމަވެސް މި ނެރުން ވަދެނިކުމެއުޅުމުގެ ހުއްދަ އަދި ދިނުމަށް ހަމަޖެހިފައިވަނީ ހަމައެކަނި ކުނި ހިފައިގެންދާ ދޯނިފަހަރަށާއި ސްޓެލްކޯއަށް ތެޔޮ ހިފައިގެން ވަންނަ އުޅަނދުފަހަރު ފަދަ ޚާއްޞަ ބޭނުންތަކަށް އެކަނި ކަމަށް އެމްޓީސީސީން މަޢުލޫމާތުދެއްވައެވެ. އެހެންކަމުން އާންމު ބޭނުން ތަކަށްއަދި މި ނެރު ބޭނުން ނުކުރެވޭނެކަމަށް އެމްޓީސީސީން މަޢުލޫމާތުދެއެވެ.
އިންޑަސްޓްރިއަލް ވިލެޖްގެ މަސައްކަތުގެތެރެއިން 4.5 ހެކްޓަރުގެ ބިން ހިއްކަންޖެހޭއިރު، ބިން ހިއްކާ ސަރަހައްދުގެ ބޭރުތޮށި އިތުރަށް ބޭރަށް ޖެއްސުމުގެ މަސައްކަތްވެސް މިހާރުކުރަމުން ގެންދާކަން ފާހަގަކޮށްލެވެއެވެ. ޓީޖެޓީ ސަރަހައްދުން ފެށިގެން ގާތްގަޑަކަށް މޭރީބްރައުން ހުރިހިސާބަށް، ފަޅުތެރެއަށް ވެލިއަޅާ، ހިއްކުމަށް ހަމަޖެހިފައިވާއިރު ބިން ހިއްކުމުގެ މިމަސައްކަތްތައް، މިފެށޭ ޖޫންމަހުގެ މެދެއްހާ ތަނުގައި ނިންމާލެވޭވަރުވާނެކަމަށް އެމްޓީސީސީން ލަފާކުރެއެވެ.
ދައުލަތުގެ ބަޖެޓުން ސަތޭކަ ފަސްދޮޅަހެއްހާ މިލިޔަން ރުފިޔާ ޚަރަދު ކޮށްގެންހަދާ އިންޑަސްޓްރިއަލް ވިލެޖަށް، މާލޭގެ ކުނި މެނޭޖްކުރުމުގެ މަސައްކަތާއި، މާލޭގައި ހުރި އެކި ކަހަލަ ކެމިކަލް ގުދަންތަކާއި، ވޯކްޝޮޕް، ގަރާޖްފަދަ ތަންތަން ބަދަލުކުރެވުމުން، މާލޭގެ ތޮށްޖެހުން ކުޑަވެ މާލޭގެ ވެއްޓަށް ހެޔޮބަދަލެއް ގެނެވޭނެކަމަށް ސަރުކާރުން އުއްމީދުކުރައްވައެވެ.