އިޓަލީގެ ދެވަނަ ޑިވިޝަނުގައި ވާދަކުރަމުން އަންނަ ސަމްޕްޑޯރިއާގެ ކޯޗުގެ މަގާމުން އަންދްރޭ ޕިރްލޯ ވަކިކޮށްފިއެވެ.
އުމުރުން 45 އަހަރުގެ ޕިރްލޯ މަގާމުން ވަކިކޮށްފައިމިވަނީ އެ ޓީމާއެކު އެއް ސީޒަން ހޭދަކޮށްފައިވަނިކޮށެވެ.
ޕިރްލޯގެ އިރުޝާދުގެ ދަށުން، ސަމްޕްޑޯރިއާ އިން މި ފަހަރުގެ ސީޒަނުގެ ދެވަނަ ޑިވިޝަނުގައި މިހާތަނަށް ކުޅުނު ތިން މެޗުގެ ތެރެއިން އެންމެ މެޗަކުންވެސް މޮޅުވެފައެއްނުވެއެވެ. ދެ މެޗުން ބަލިވިއިރު، އަނެއް މެޗުން ވީ އެއްވަރެވެ. މިއާއެކު، އެ ޓީމު އޮތީ ތާވަލްގެ ފުލުން ދެވަނައިގައެވެ.
ޕިރްލޯގެ ޕްރޮފެޝަނަލް ކެރިއަރުގައި ގިނަ ކާމިޔާބީތަކެއް ހާސިލްކޮށްފައިވާއިރު، 2006 ވަނަ އަހަރުގެ ފީފާ ވޯލްޑް ކަޕް ޓްރޮފީ އުފުލާލި އިޓަލީ ޓީމުގައި އިސް ދައުރެއް އަދާކޮށްފައިވެއެވެ.
އޭނާގެ ކުޅުމުގެ ކެރިއަރު ނިންމާލުމަށްފަހު 2021/2020 ވަނަ އަހަރުގެ ސީޒަނުގައި ވަނީ ޔުވެންޓަސްގެ ސީނިއާ ޓީމަށް އިރުޝާދު ދީފައެވެ. އޭގެކުރީން، އޭނާ ހުރީ ޔުވެންޓަސްގެ 23 އަހަރުން ދަށުގެ ޓީމުގެ ކޯޗުގެ ގޮތުގައެވެ.