މޯލްޑިވްސް ސާފިން އެސޯސިއޭޝަން (އެމްއެސްއޭ) އިން އިންތިޒާމުކޮށްގެން ކުރިއަށްގެންދާ ދިވެހި ސާފް ލީގުގެ ތިންވަނަ މުބާރާތް ކަމަށްވާ ރަންދާ ރާޅުގަނޑުގެ މެންސް އޯޕަން ބައިގެ ޗެމްޕިއަންކަން އިސްމާޢީލް މިގުލާލް (ކުޑަ އިއްސެ) ހޯދައިފިއެވެ.
ކ. ތުލުސްދޫގައި ކުރިއަށްދިޔަ މި މުބާރާތުގެ މެންސް އޯޕަން ބައިގައި 26 ރާޅާއެޅުންތެރިން ވާދަކުރިއިރު, ކުޑަ އިއްސެ ޗެމްޕިއަންކަން ހޯދާފައިވަނީ މިއަދު ކުރިއަށްދިޔަ ފައިނަލް ހީޓުގައި އަޙްމަދު އާގިލް (އައްމަޑޭ) ބަލިކުރުމަށްފަހުއެވެ. އެގޮތުން ފައިނަލް ހީޓުގައި ކުޑަ އިއްސެ 15.67 ސްކޯ ކުރިއިރު، އައްމަޑޭއަށް ސްކޯ ކުރެވުނީ 11.36 އެވެ.
މުބާރާތުގެ ފައިނަލުން ކުޑަ އިއްސެ ޖާގަ ހޯދީ ސެމީ ފައިނަލް ހީޓު ދޭއްގައި ވާދަކޮށް ޒުވާން ރާޅާއެޅުންތެރިޔާ ޔޫސުފް ކަޔާން ހަމްދާން ޒަކީ ބަލިކޮށްގެންނެވެ. އެ ހީޓުގައި ކުޑަ އިއްސެ 12.76 ސްކޯ ކުރިއިރު، ކަޔާންއަށް ސްކޯ ކުރެވުނީ 9.23 އެވެ.
މީގެ އިތުރުން އޯޕަން ބައިގެ ފައިނަލަށް އައްމަޑޭ ދަތުރުކޮށްފައިވަނީ ސެމީ ފައިނަލް ހީޓުގައި ހީޓު އެކެއްގައި ވާދަކޮށް ހޫދު އަޙްމަދު ބަލިކޮށްގެންނެވެ. ވާދަވެރިކޮށް ފެނިގެންދިޔަ މި ހީޓުގައި އައްމަޑޭ 16.84 ސްކޯ ކުރިއިރު، ހޫދަށް ސްކޯ ކުރެވުނީ 15.33 އެވެ.
ރަންދާ ރާޅުގަނޑުގެ ޖޫނިއާ ބައިގެ ޗެމްޕިއަންކަން ހޯދާފައިވަނީ މުޙައްމަދު އިނާން އަބްދުލް ހަންނާނު (ނާނު) އެވެ.
މި މުބާރާތުގެ ޖޫނިއާ ބައިގައި ހަތް ރާޅާއެޅުންތެރިން ވާދަކުރިއިރު, ނާނު ޗެމްޕިއަންކަން ހޯދީ މިއަދު ކުރިއަށްދިޔަ ފައިނަލް ހީޓުގައި ކަޔާން އަބްދުالله އަރީފް ބަލިކުރުމަށްފަހުއެވެ. މި ހީޓުގައި ނާނު 14.67 ސްކޯ ކުރިއިރު، ކަޔާން ވަނީ 14 ޕޮއިންޓް ސްކޯ ކޮށްފައެވެ. އެހެންކަމުން ވާދަވެރިކޮށް ފެނިގެންދިޔަ ފައިނަލް ހީޓުގައި ނާނު ކުރިހޯދީ 0.67 ގެ ސްކޯއެއް އިތުރަށް ހޯދައިގެންނެވެ.
ފައިނަލުން ނާނު ޖާގަ ހޯދީ ސެމީ ފައިނަލް ހީޓު އެކެއްގައި ވާދަކޮށް ކަޔާން ޒަކީ ބަލިކޮށްގެންނެވެ. އެގޮތުން އެ ހީޓުގައި ނާނު 10.27 ސްކޯ ކުރިއިރު، ކަޔާންއަށް ސްކޯ ކުރެވުނީ 8.50 އެވެ. އަދި ކަޔާން އަރީފް ފައިނަލުން ޖާގަ ހޯދާފައިވަނީ ސެމީ ފައިނަލް ހީޓު ދޭއްގައި ވާދަކޮށް ޔާސިން އަޙްމަދު ނާޝިދުގެ މައްޗަށް ކުރިހޯދައިގެންނެވެ. އެ ހީޓުގައި ކަޔާން 15.34 ސްކޯ ކުރިއިރު، ޔާސިންއަށް ސްކޯ ކުރެވުނީ 12 ޕޮއިންޓެވެ.