ރާއްޖޭގެ ފުޓްބޯޅަ މިހާރު އޮތް ހާލަތާއެކު މާޒިޔާ އިން ދިވެހި ފުޓްބޯޅަ އަށް ކޮށްދެވެން ހުރި ހުރިހާ ކަމެއް ކޮށްދޭނެ ކަމަށާއި ފުޓްބޯޅައިގެ ކަންކަމުގައި ހަރަކާތްތެރިވަމުން އަންނަނީ ގައުމީ ކަމެއް ކަމުގައި ދެކިގެންކަމަށް މާޒިޔާގެ ޗެއާމަން އަޙްމަދު ސާޖިދު ވިދާޅުވެއްޖެ އެވެ.
ކުރިއަށް އޮތް އޭއެފްސީގެ ޗެލެންޖް ލީގުގެ ކުރިން މާޒިޔާ އިން ވަނީ އެ ޓީމުގެ ކޯޗަކަށް ސާބިއާގެ ޑްރަގަން ޑުކަނޯވިޗް ވަނީ މިއަދު ހަމަޖައްސައިފަ އެވެ.
ރާއްޖޭގެ ފުޓްބޯޅަ މި ވަގުތު އޮތް ނާޒުކު ފައްތަރުގައި ވެސް އޭއެފްސީން ދޭ ކްލަބް ލައިސަންސް ހާސިލްކުރި ހަމައެކަނި ދިވެހި ކްލަބަކީ މާޒިޔާ އެވެ. އެ ކްލަބުން ވަނީ ކުރިއަށް އޮތް ސީޒަނަށް ކުޅުންތެރިންނަށް ދޭން ޖެހޭ އެޑްވާންސް ފައިސާ ވެސް ހަމަޖައްސައިދީފަ އެވެ.
ރާއްޖޭގެ ލީގު ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އާއި އެއް ގްރޫޕެއްގައި ހިމެނެނީ ކުވެއިތުގެ އަލް އަރަބީ ސްޕޯޓްސ ކްލަބް، ތުރުކުމެނިސްތާންގެ އެފްސީ އަކްރަޑަގް އަދި ކިރްގިސްތާން އެފްސީ އަބްދީޝް އާޓާ އެވެ. ސެންޓްރަލައިޒް ކޮށް މި މުބާރާތް ބޭއްވުމަށް ހަމަޖެހިފައިވަނީ ކުވެއިތުގައެވެ.
މާޒިޔާގެ ޗެއާމަން ސާޖިދު ވިދާޅުވީ، ފުޓުބޯޅައިގެ ހާލަތު މިހާރު އޮތް ގޮތުން މާޒިޔާގެ ބޮލުގައި އެޅިފައި އޮތް ޒިންމާ ބޮޑު ކަމަށެވެ. އަދި އެ ޒިންމާ އަދާކުރުމުގައި އެ ކުލަބަށް ވީ ވަރަކުން މަސައްކަތް ކުރާނެ ކަމަށް އޭނާ ވިދާޅުވި އެވެ.
މާޒިޔާއިން މަސައްކަތްކުރަނީ އަންނަ ހަފުތާގައި އެ ޓީމުގެ ފަރިތަކުރުންތައް ފެށުމަށެވެ. އޭއެފްސީ ޗެލެންޖު ލީގަށް ތައްޔާރުވުމުގެ ގޮތުން މާޒިޔާއިން ތައްޔާރީތައް ފަށާފައިވާއިރު ބިދޭސީ ކުޅުންތެރިންވެސް ގެނައުމަށް ނިންމާފައިވާ ކަމަށް އެ ކުލަބުން މައުލޫމާތުދެއެވެ.