މި ފަހަރުގެ ޓްރާންސްފާ ބާޒާރުގައި ޗެލްސީގެ މައިގަނޑު މަގުސަދަކީ ކުޅުންތެރިން ވިއްކާލުމަށްފަހު، އެ ކުލަބުގެ މާލީ ހިސާބުތައް ބެލެންސްކުރުން ކަމަށް އެ ޓީމުގެ ކޯޗު އެންޒޯ މަރެސްކާ ބުނެފިއެވެ.
މަރެސްކާ މިހެން ބުނީ، ޗެލްސީގެ ރަސްމީ ވެބްސައިޓަށް ދިން އިންޓަވިއުއެއްގައެވެ.
"މައިގަނޑު މަޤްޞަދަކީ ކުޅުންތެރިން ވިއްކައިގެން މާލީ ހިސާބުތައް ހަމައަކަށް އެޅުވުން،" މަރެސްކާ ބުންޏެވެ.
އެއަށްފަހު ދެން އޭނާގެ މަސައްކަތަކަށް ވާނީ، އެ ޓީމާއެކު ކުރިއަށްދެވެން އޮތް އެންމެ ރަނގަޅު ހިސާބަކަށް ދިއުމަށް ބުރަކޮށް މަސައްކަތްކުރުން ކަމަށް ވެސް މަރެސްކާގެ ވާހަކައިގައި ފާހަގަކުރިއެވެ.
މީގެ ދެ އަހަރު ކުރީން، އެމެރިކާގެ މަހުޖަނު ޓޮޑް ބޯލީ، ޗެލްސީ ގަތް ފަހުން ވަނީ ޓްރާންސްފާ ބާޒާރުގައި ގިނަ މަސައްކަތްތަކެއްކޮށް، ކުޅުންތެރިން ގަނެ ވިއްކުމުގައި ސަމާލުކަން ހޯދާފައެވެ.
އެގޮތުން، މި ފަހަރުގެ ސީޒަނަށް އެކަނިވެސް އެ ކްލަބުން ވަނީ 11 ކުޅުންތެރިން ގެނައުމަށް ގާތްގަނޑަކަށް 160 މިލިއަން ޕައުންޑަށް (211.50 މިލިއަން އެމެރިކާ ޑޮލަރު) ވުރެ ބޮޑު ހޭދައެއްކޮށްފައެވެ. އޭގެތެރޭގައި، ޕޯޗުގަލްގެ ކުޅުންތެރިން ކަމަށްވާ، ޕެޑްރޯ ނެޓޯ އާއި ޔާއޯ ފެލިކްސްގެ އިތުރުން ކިއެރނަން ޑިއުސްބަރީ-ހޯލް އަދި ގޯލްކީޕަރު، ފިލިޕް ޖޯގެންސެން ހިމެނެއެވެ.
މިހާތަނަށް ޗެލްސީން ވިއްކާލާފައިވާ ކުޅުންތެރިންގެ ތެރޭގައި، މިޑްފީލްޑަރު ކޮނާ ގެލަގާ އާއި ޑިފެންޑަރު އިއާން މާޓްސެން ހިމެނެއެވެ. ނަމަވެސް، އެ ކްލަބުގައި އަދިވެސް 40 އަށް ވުރެ ސީނިއާ ކުޅުންތެރިން ރަޖިސްޓްރީވެފައިވާތީވެ ޕްރިމިއާ ލީގުގެ ފައިނޭންޝަލް ގަވާއިދުތަކާ ހިލާފުވުމުގެ ނުރައްކާ އެބައޮތެވެ.
މިވަގުތު ޗެލްސީ އަށް ދިމާވެފައިވާ އެންމެ ބޮޑު މައްސަލަ ކަމަށްވާ، ކުޅުންތެރިން ދޫކޮށްލުމަށް އޮތް ގޮންޖެހުންތަކަކީ އެންމެންނަށް އެނގޭ ކަންކަމެވެ. އޭގެތެރެއިން، އިނގިރޭސި ގައުމީ ޓީމުގެ ކުޅުންތެރިން ކަމަށްވާ، ބެން ޗިލްވެލް އާއި ރަހީމް ސްޓާލިންގ ފަދަ ބޮޑު މުސާރައިގައި ތިބި 15 ވަރަކަށް ކުޅުންތެރިން ސީނިއާ ޓީމާ އެކަހެރިކުރުމަށްފަހު ވަކީން ފަރިތަކުރުންތައް ކުރިއަށްގެންދިއުމަށް ކޯޗު، މަރެސްކާ ބުނެފައިވުން ފާހަގަކޮށްލެވެއެވެ.
މަރެސްކާ ވަނީ، މިވަގުތު އޭނާގެ އެންމެ ބޮޑު މަގްޞަދަކީ ކްލަބުގައި ތިބި ކުޅުންތެރިންނަށް ކުރިއެރުންތައް ހޯދައިދީ، ކުޅުން ރަނގަޅުކުރުން ކަމަށެވެ. އަދި، ޕްރިމިއާ ލީގު ނުވަތަ ޗެމްޕިއަންސް ލީގުގެ ޖާގައަކަށް ވާދަކުރުން އަމާޒެއްގެ ގޮތުގައި ކަނޑައަޅައި، އެކަން އެގޮތަށް ހާސިލްކުރުމަށް ޗެލްސީގެ ވެރީން އޭނާގެ ގާތުގައި ބުނެފައިނުވާ ކަމަށް ވެސް މަރެސްކާ ފާހަގަކުރިއެވެ.
މަރެސްކާ އިތުރަށް ބުނީ، އެންމެ ދެކެން ބޭނުންވަނީ އޭނާގެ އިރުޝާދާއި އެއްގޮތަށް ޓީމުން ކުޅެން ބޭނުންވާ ގޮތަށް ކުޅޭ މަންޒަރު ކަމަށާއި، ބޯޅަ އާއި އެއްކޮށް އަދި ބޯޅައާ ނުލައިވެސް އެގްރެސިވް ކުޅުމެއް ކުޅޭތަން ކަމަށެވެ. އަދި، މި ހުރިހާ ކަމަކަށްވުރެ އެންމެ މުހިއްމީ މެޗަކަށްފަހު މެޗެއްގައި ކުޅުން ރަނގަޅުކުރުން ކަމަށް ވެސް ނިންމާލަމުން މަރެސްކާ ބުންޏެވެ.