މަސައްކަތްތައް ކުރަމުންދާ ގޮތުން ފުޓްބޯޅަ މިހާރު އޮތް ހާލަތުން އަރައިގަނެ، ކުރީގައި އޮތް ރޫހު އަލުން ގެނެވޭނެ ކަމަށް ގަބޫލުކުރާ ކަމަށް ކޮމިޝަނަރ އޮފް ސްޕޯޓްސް މުޙައްމަދު ޠަލާލް ވިދާޅުވެއްޖެއެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ނޯމަލައިޒިން ކޮމިޓީއެއްގެ ދަށަށް ގެންނަން ދުނިޔޭގެ ފުޓްބޯޅައިގެ މައި އިދާރާ (ފީފާ) އިން ނިންމާފައިވަނީ ޖުލައި މަހުގެ 23 ވަނަ ދުވަހެވެ. އަދި މި ފަހުން ފީފާއިން ވަނީ ނޯމަލައިޒިން ކޮމިޓީ އެކުލަވާލައި، އެ ކޮމިޓީގެ ޗެއާމަނަކަށް ކުރީގެ ކުޅިވަރާ ބެހޭ ވަޒީރު އަޙްމަދު ޒުހޫރު ހަމަޖައްސަވާފައެވެ.
އެފްއޭއެމްގެ ހިންގުން ނޯމަލައިޒިން ކޮމިޓީއަކާ ހަވާލުކުރަން ފީފާއިން ނިންމުމުން، އެ ކޮމިޓީއަށް ފުރިހަމަ އެއްބާރުލުން ދެއްވާނެ ކަމަށް ޠަލާލް މީގެ ކުރިންވެސް ވަނީ ވިދާޅުވެފައެވެ. ޕީއެސްއެމް އިން ގެނެސްދިން "ކުޅިވަރު ވިންދު" ޕްރޮގުރާމުގައި ވާހަކަފުޅުދައްކަވަމުން ޠަލާލް ވިދާޅުވީ ފުޓްބޯޅަ މިހާރު އޮތް ހާލަތުން އަރައިގަތުމަށް ވަރަށް ގިނަ މަސައްކަތްތަކެއް ސަރުކާރުން ކުރައްވަމުން ގެންދަވާ ކަމަށެވެ. އަދި ކުޅިވަރުގެ ކަންތައްތައް ކުރިއަށްދާ ގޮތް ރައީސުލްޖުމްހޫރިއްޔާވެސް ވަރަށް ގާތުން ބައްލަވަމުން ގެންދަވާ ކަމަށްވެސް ވިދާޅުވިއެވެ.
ޠަލާލް ވިދާޅުވީ ކުޅިވަރުގައި ފެންނަމުންދާ މައްސަލަތައް ހައްލުކޮށްގެން ކުރިއަށްދެވޭނެ މަގުތައް ފެންނަމުންދާ ކަމަށާއި، މަސައްކަތްތައް ކުރަމުންދާ ގޮތުން ފުޓްބޯޅަ މިހާރު އޮތް ހާލަތުން އަރައިގަނެ، ކުރީގައި އޮތް ރޫހު އަލުން ގެނެވޭނެ ކަމަށް ގަބޫލުކުރާ ކަމަށެވެ.
"އެހެންމާ އަޅުގަނޑުމެންނަށް އެބަ ލިބޭ ފުރުސަތު. އަޅުގަނޑުމެންނަށް ކުޅިވަރު މިހާރު އޮތް ހާލަތު ބައެއް ކަހަލަ މައްސަލަތައް ހުރި ދިމާލުން އެކަން ހައްލުކޮށްގެން އަޅުގަނޑުމެންނަށް ކުރިއަށްދެވޭނެ މަގުތަކެއް އެބަ ފެނޭ. އެކަންކަން އިރާދަކުރެއްވިއްޔާ ހައްލުވެގެންދާނެ." ޠަލާލް ވިދާޅުވިއެވެ.
ފުޓްބޯޅައިގެ ކަންކަމަށް ސަރުކާރުން ނުފޫޒު ފޯރުވާ ކަމަށް ބުނެ، ފީފާއިން ރާއްޖެ ސަސްޕެންޑް ކުރާނެ ކަމަށް މީގެ ކުރިން ދެކެވުނު ވާހަކަތަކަށް ރައްދު ދެއްވަމުން ޠަލާލް ވިދާޅުވީ ފުޓްބޯޅަ ސަސްޕެންޑް ނުވާނެ ކަމަށް އޭރުވެސް ދެންނެވި ކަމަށެވެ. އަދި ރައީސުލްޖުމްހޫރިއްޔާ ގެންނެވި ކުޅިވަރުގެ މެނިފެސްޓޯގައި، ކުޅިވަރުގެ ކުރީގައި އޮތް ރޫހު އަނބުރާ ގެންނާނެ ވާހަކަ އެބައޮތް ކަމަށާއި، މަސައްކަތް ކުރަމުންދަނީ އެ މަގުން ކަމަށްވެސް ވިދާޅުވިއެވެ.
ޠަލާލް ވިދާޅުވީ ބައިނަލްއަގުވާމީ ޖަމުއިއްޔާއަކާ "އެފިލިއޭޓް" ވުމަށްފަހު، އެސޯސިއޭޝަނެއްގައި ސަރުކާރަށް އަތް ނުލެވޭނެ ކަމަށް ވާހަކަ ދެކެވުނު ނަމަވެސް، އެކަންކަން ކުރިއަށްދަނީ އެ އުސޫލުން ނޫން ކަމަށެވެ. އެގޮތުން ބައިނަލްއަގުވާމީ ޖަމުއިއްޔާތަކުންވެސް، އެތަނެއްގައި އޮންނަ ގާނޫނާ ގަވާއިދުގެ ތެރެއިން ކުރަން ޖެހޭ ކަންކަން ކުރުމަށް ބުނެފައިވާނެ ކަމަށްވެސް ޠަލާލް ވިދާޅުވިއެވެ.
"މީގަ ހަމައެކަނި ތަންކޮޅަކީ އެސޯސިއޭޝަންތަކުގެ އިންތިޚާބަށް ސަރުކާރުން ނުފޫޒު ފޯރުވުން. ނޫނިއްޔާ އެސޯސިއޭޝަންގެ ހިންގުމުގެ ތެރެއިން ކުރަން ޖެހޭ ކަންތައްތަކަށް ސަރުކާރުން، ހިންގާ ގަވާއިދުގެ ބޭރުން ކުރަން އެންގުން. މިކަހަލަ ކަންކަން ނުކުރާހާ ހިނދަކު ބައިނަލްއަގުވާމީ ޖަމުއިއްޔާ އަކުން ނުބުނާނެ ތިކަން ނުކުރާށެކޭ. އެހެންވީމާ އަތްނުލެވެނީކީ ނޫން. އަތްލެވޭނެ އިނގޭތޯ." ޠަލާލް ވިދާޅުވިއެވެ.
އެފްއޭއެމްގެ ހިންގުން ނޯމަލައިޒިން ކޮމިޓީއަކާ ހަވާލުކޮށްފައިވާއިރު، ފީފާއިން މި އަހަރުގެ ޖޫން މަހު ވަނީ އެފްއޭއެމްގެ ރައީސް ބައްސާމް އަދީލް ޖަލީލް، ނުވަ މަސް ދުވަހަށް ސަސްޕެންޑް ކުރަން ނިންމާފައެވެ. ފީފާއިން އެގޮތަށް ނިންމީ ބައްސާމްގެ މައްޗަށް ކުރެވޭ ކޮރަޕްޝަނާއި، މަނީ ލޯންޑަރިންގެ ތުހުމަތުގެ މައްސަލަތަކެއް އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގުކުރަމުންދާތީ އާއި، ޚިޔާނާތާއި މަނީ ލޯންޑަރިންގެ ދައުވާވެސް އޭނާގެ މައްޗަށް އުފުލާފައިވާތީއެވެ.