މެންޗެސްޓާ ސިޓީގެ ޕޯޗުގަލް ޑިފެންޑަރު ޖޮއާއޯ ކެންސެލޯ، ސައުދީ އަރަބިއްޔާގެ އަލް ހިލާލަށް ވިއްކާލުމަށް އެ ކުލަބުން އެއްބަސްވެއްޖެއެވެ.
މީޑިޔާ ރިޕޯޓްތައް ބުނާ ގޮތުގައި އުމުރުން 30 އަހަރުގެ ޑިފެންޑަރު ގަންނަން އަލް ހިލާލް އިން ހުށައަޅާފައިވަނީ 21.1 މިލިއަން ޕައުންޑްގެ ފީ އެކެވެ. ކެންސެލޯގެ ޓްރާންސްފާ އާއި މެދު ދެ ކްލަބުން އެއްބަސްވެފައިވާއިރު، ކެންސެލޯ އާއި އަލް ހިލާލް އާއި ދެމެދު އަދި އެއްބަސްވުމަކަށް އާދެވިފައިނުވި ނަމަވެސް މި ކަމުގައި މައްސަލައެއް ކުރިމަތިވާނެކަމަށް ގަބޫލު ނުކުރެވެއެވެ.
2019 ވަނަ އަހަރު ޔުވެންޓަސް އިން މެންޗެސްޓަރ ސިޓީ އާއި ގުޅުނު ކެންސެލޯ ސިޓީ އާއި އެކު ހަދާފައިވާ އެއްބަސްވުން 2022 ވަނަ އާ ކުރުމަށްފަހު އެ ޓީމަށް ކުޅުމުގެ ފުރުސަތު ލިބިފައެއް ނުވެއެވެ. އެހެންކަމުން 2023 ވަނަ ސިޓީން ވަނީ ކެންސެލޯ ލޯނެއްގެ ދަށުން ބަޔާން މިއުނިކަށް ބަދަލުވެފައެވެ. އަދި އޭގެ ފަހުން ލޯނު އެއްބަސްވުމެއްގެ ދަށުން ކެންސެލޯ ވަނީ ބާސެލޯނާއަށް ވެސް ކުޅެފައެވެ.
2016 ވަނަ އަހަރުން ފެށިގެން ޕޯޗުގަލްގެ ގައުމީ ޓީމަށް ކުޅެމުންދާ ކެންސެލޯ ވަނީ ގައުމީ ޓީމަށް 58 މެޗު ކުޅެދީފައެވެ. އަދި ސިޓީގައި ހޭދަ ކުރި ދުވަސްވަރު އޭނާވަނީ އެ ކްލަބަށް 98 މެޗު ކުޅެފައެވެ.
ކެންސެލޯ ވަނީ އޭނާގެ ކެރިއަރުގައި ޕޯޗުގަލްގެ ބެންފީކާ، ސްޕޭނުގެ ވެލެންސިއާ އިޓަލީގެ އިންޓަރ މިލާން އަދި ޔުވެންޓަސް އަށް ކުޅެފައެވެ.