ޓޭބަލް ޓެނިސް އެސޯސިއޭޝަން އޮފް މޯލްޑިވްސްއިން ނެރުނު ގައުމީ ރޭންކިންގެ އަންހެން ޑިވިޝަނުގެ އެއްވަނަ ފާތިމަތު ދީމާ އަލީ، އަދި ފިރިހެން ޑިވިޝަނުގެ ރޭންކިން އެއްވަނަ މޫސާ މުންސިފް އަޙްމަދު ހޯދައިފިއެވެ.
މިއީ މި އަހަރު ކުޅުނު ރޭންކިންގެ ދެވަނަ މުބާރާތެވެ. އަންހެން ޑިވިޝަނުގެ ރޭންކިން އެއްވަނަ ދީމާ ހޯދިއިރު، އޭނާ އެއްވަނަ މަގާމުގައި އޮންނަތާ މިހާރު ހަތް އަހަރު ވެއްޖެއެވެ. ދީމާ ދަނީ 2018 ވަނަ އަހަރުން ފެށިގެން ރޭންކިންގެ އެއްވަނަ މަގާމުގައި ހިފަހައްޓަމުންނެވެ.
ރޭންކިންގެ އެއްވަނައިގައި ދީމާ އޮތީ ތިން ބުރުގައި ކުޅުނު 24 މެޗުން ހޯދި 48 ޕޮއިންޓާއެކު އެވެ. ކޮންމެ ބުރެއްގައި ޖުމްލަ 8 މެޗު ކުޅޭނެއެވެ. މި ރޭންކިންގެ އަންހެން ޑިވިޝަނުގެ ދެވަނަ ހޯދާފައިވަނީ އައިޝަތު ރަފާ ނާޒިމް އެވެ.
މިއީ އަހަރަކަށް ފަހު ރާއްޖޭގެ މުބާރާތެއްގައި އޭނާ ވާދަކުރި ފުރަތަމަ ފަހަރެވެ. އޭނާ ދަނީ އިނގިރޭސިވިލާތުގައި ޑޮކްޓަރުކަން ކިޔަވަމުންނެވެ. ރޭންކިންގެ ދެވަނައިގައި ރަފާ އޮތީ ޖުމުލަ 21 މެޗުން މޮޅުވެ 45 ޕޮއިންޓް ހޯދައިގެންނެވެ.
ތިންވަނަ ހޯދި މިޝާކާ މުހައްމަދު އިބްރާހިމް ވަނީ ފުރަތަމަ ބުރުގައި ހަ މެޗުން މޮޅުވެފަ އެވެ. ދެވަނަ ބުރުގައި އޭނާ މޮޅުވީ ފަސް މެޗުންނެވެ. ތިންވަނަ ބުރުގައި އޭނާ މޮޅުވީ ހަ މެޗުންނެވެ. އޭނާ ވަނީ 41 ޕޮއިންޓް ހޯދާފައެވެ. ރޭންކިންގެ ހަތަރުވަނަ ހޯދީ ލައިސާ ފަތުހުﷲ އިސްމާއީލެވެ. އޭނާ ވަނީ 15 މެޗުން މޮޅުވެ 39 ޕޮއިންޓް ހޯދާފައެވެ. ހަތަރުވަނަ ހޯދާފައިވަނީ ތަޖުރިބާކާރު ކުޅުންތެރިޔާ ފާތިމަތު ޖުމާނާ ނިމާލެވެ. އޭނާ ވަނީ 11 މެޗުން މޮޅުވެ 35 ޕޮއިންޓު ހޯދާފައެވެ.
ފިރިހެން ޑިވިޝަނުގެ ރޭންކިންގައި މޫސާ މުންސިފް އަހްމަދު އެއްވަނަ ހޯދާފައިވަނީ ކުޅުނު އަށް މެޗުން ވެސް މޮޅުވެ 48 ޕޮއިންޓް ހޯދައިގެންނެވެ. ކުރިން ރޭންކިންގެ އެއްވަނައިގައި އޮތް އަޚްޔާރަށް މިފަހަރު ލިބުނީ ދެވަނައެވެ. އޭނާ ވަނީ 21 މެޗުން މޮޅުވެ 45 ޕޮއިންޓް ހޯދާފައެވެ. ރޭންކިންގެ ތިންވަނަ ހޯދީ ޒީކް ހަސަން ލަތީފެވެ. އޭނާ ވަނީ 18 މެޗުން މޮޅުވެ 42 ޕޮއިންޓް ހޯދާފައެވެ.
ހަތަރުވަނަ ހޯދާފައިވަނީ އިބްރާހިމް އައުޒަމް އަޒީޒެވެ. ވާދަކުރި ފުރަތަމަ ފަހަރު އޭނާ ވަނީ ރޭންކިިންގެ ހަތަރުވަނަ ހޯދާފައެވެ. އޭނާ ވަނީ ޖުމުލަ 15 މެޗުން މޮޅުވެ 37 ޕޮއިންޓް ހޯދާފައެވެ. ފަސްވަނަ ހޯދި އުމެއިރު މުހައްމަދު މުއިއްޒު ވަނީ 11 މެޗުން މޮޅުވެ 35 ޕޮއިންޓް ހޯދާފައެވެ.
ގައުމީ ކުޅުންތެރިންނަށް އިނާޔަތް ދިނުމުގައި އެންމެ ބޮޑަށް ބަލަނީ ރޭންކިންއަށެވެ. މި ރޭންކިންގެ އެންމެ ގަދަ ފަސް ކުޅުންތެރިންނަށް އިނާޔަތް ލިބޭނެއެވެ.