ސްޕެނިޝް ލަލީގާގައި އެތްލެޓިކް ބިލްބާއޯ އާއި ދެކޮޅަށް ބާސެލޯނާ ކުޅުނު މެޗުން 2-1 ގެ ނަތީޖާއަކުން ބާސެލޯނާ ކާމިޔާބުކޮށްފި އެވެ.
ބާސެލޯނާގެ އޮލިމްޕިކް ސްޓޭޑިއަމްގައި ކުޅުނު މި މެޗުގެ 24 ވަނަ މިނިޓްގައި ބާސެލޯނާގެ ލަމީން ޔަމާލް ވަނީ ލަނޑެއް ކާމިޔާބުކޮށް ހެންސީ ފްލިކްގެ ޓީމަށް ލީޑު ނަގައިދީފަ އެވެ. އުމުރުން 17 އަހަރުގެ ޔަމާލް މި ލަނޑު ކާމިޔާބުކޮށްފައިވަނީ އޭރިޔާ ބޭރުން ފޮނުވާލި ރީތި ހަމަލައަކުންނެވެ.
ބާސެލޯނާއިން ލީޑު ނެގިތާ މާގިނައިރުތަކެއް ނުވަނީސް އެތްލެޓިކް ބިލްބާއޯއަށް ލިބުނު ޕެނަލްޓީ އަކުން އެ ޓީމުން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފަ އެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ އޮއިހާން ސަންސެޓް އެވެ.
ބާސެލޯނާއަށް މި މެޗުން ތިން ޕޮއިންޓް ކަށަވަރުވެފައިވަނީ މެޗުގެ ފުރިހަމަ ވަގުތު ހަމަވާން 15 މިނިޓަށް ވެފައިވަނިކޮށް ރޮބަޓް ލެވަންޑޯސްކީ ކާމިޔާބުކޮށްދިން ލަނޑުންނެވެ. މި ލަނޑުގެ ކުރިން ލެވަންޑޯސްކީ ފޮނުވާލި ނުރައްކާތެރި ދެ ހަމަލައެއް ވަނީ ބިލްބާއޯގެ ގޯލުގެ ދަނޑިއަށް އަމާޒުވެފައެވެ.
މި ލަނޑާއެކު ލެވަންޑޯސްކީ ވަނީ މި ސީޒަނުގައި ކުޅުނު ދެ މެޗުން ތިން ލަނޑު ކާމިޔާބުކޮށްފަ އެވެ. ލީގުގެ ފުރަތަމަ މެޗުގައި ވެލެންސިއާ އަތުން ބާސެލޯނާ މޮޅުވިއިރު، އެ މެޗުގައި ޖެހި ދެ ލަނޑުވެސް ކާމިޔާބުކޮށްދީފައިވަނީ ލެވަންޑޯސްކީ އެވެ.
ސްޕެނިޝް ލަލީގާ ގައި ރޭ ކުޅުނު އެހެން މެޗުތަކަށް ބަލާއިރު، އެސްޕަނިއޯލް އަތުން ރެއާލް ސޮސިއެޑާޑް ވަނީ 1-0 ގެ ނަތީޖާއަކުން މޮޅުވެފައެވެ. އަދި އޮސަސޫނާ އިން ވަނީ މަޔޯކާގެ މައްޗަށް 1-0 ގެ ނަތީޖާއަކުން ކުރި ހޯދާފައެވެ.