އިޓާލިއަން ސެރިއާގައި ރޭ އިންޓަރ މިލާން ލެއްޗޭ އާއި ދެކޮޅަށް ކުޅުނު މެޗް 2-0 ގެ ނަތީޖާއަކުން ކާމިޔާބުކޮށްފައިވާއިރު ވާދަވެރި އޭސީ މިލާން ޕާމާ އަތުން 2-1 ގެ ނަތީޖާ އަކުން ބަލިވެއްޖެ އެވެ.
މިލާނުގެ ގިއުސެއްޕޭ މިއާޒާ ސްޓޭޑިއަމްގައި ކުޅުނު މިމެޗުގައި އިންޓަރ މިލާނުން ވަނީ ރަގަޅު ކުޅުމެއް ދައްކާ މެޗް ޑޮމިނޭޓް ކޮށްފައެވެ. އަދި އިދިކުޅު ޓީމުގެ ގޯލަށް ނުރައްކާތެރި ގިނަ ހަމަލަތަކެއް ފޮނުވާލާފައިވާކަން ފާހަގަ ކުރެވެއެވެ.
މި މެޗުގައި އިންޓަރ މިލާނުން ލީޑު ނަގާފައިވަނީ މެޗުގެ ފަސް ވަނަ މިނިޓްގައި މަހުދީ ތަރީމީ ގެ އެސިސްޓަކުން މަޓިއޯ ޑަމިއަން އެވެ. މި ލަނޑަށްފަހު އިންޓަރ މިލާނުން ވަނީ ފުރަތަމަ ހާފްގައި ލެއްޗެގެ ގޯލަށް ނުރައްކާތެރި ގިނަ ހަމަލަތަކެއް އަމާޒުކޮށްފަ އެވެ.
އިންޓަރ މިލާނުން މި މެޗުގައި ޖެހި ދެވަނަ ލަނޑު މެޗުގެ 70 ވަނަ މިނިޓްގައި އެ ޓީމަށް ކާމިޔާބުކޮށްދީފައިވަނީ ހަކާން ކަނަލޮގްލޫ އެވެ. މިއީ ސެރިއާގައި އޭނާ ޖެހި ފުރަތަމަ ލަނޑެވެ.
އިންޓަރ މިލާނާއި އެންމެ ވާދަވެރި އޭސީ މިލާން ރޭ ރަށުން ބޭރުގައި ޕާމާ އާއި ދެކޮޅަށް ކުޅުނު މެޗުން ބަލިވެފައިވާއިރު، ލީގުގައި އެންމެ ފަހުން އެ ޓީމު ކުޅުނު ހަތަރު މެޗުންވެސް ވަނީ ބަލިވެފައެވެ.
މި މެޗުގެ ދެވަނަ މިނިޓްގައި ޕާމާގެ ޑެނިސް މޭން ވަނީ ލަނޑެއް ކާމިޔާބުކޮށް އެ ޓީމަށް ލީޑު ނަގައިދީފައެވެ. ނަމަވެސް ދެވަނަ ހާފްގެ ކުޅުން ފެށިގެން މާގިނައިރުތަކެއް ނުވަނީސް ކްރިސްޓިއަން ޕުލިސިޗް ވަނީ ލަނޑެއް ކާމިޔާބުކޮށް މެޗުގެ ނަތީޖާ ހަމަހަމަ ކޮށްފަ އެވެ.
މި މެޗުގައި ދެވަނަ ފަހަރަށް ޕާމާއިން ލީޑު ނަގާ މެޗުން މޮޅުވެފައިވަނީ މެޗުގެ 77 ވަނަ މިނިޓުގައި މަޓިއޯ ކެންސެލިއެރީ ކާމިޔާބުކޮށްދިން ލަނޑުންނެވެ.
މި ސީޒަނުގައި އޭސީ މިލާން ކުޅުނު ފުރަތަމަ މެޗުން އެއްވަރުވެ މި މެޗުން ބަލިވެފައިވާއިރު އެ ޓީމަށް ލިބިފައިވާ އެއް ޕޮއިންޓާޢެކު މިވަގުތު އޮތީ ތާވަލުގެ ފަނަރަވަނައިގައެވެ.