ނޯވޭގެ ފޯވާޑް އާލިން ބްރައުޓް ހާލަންޑް ކާމިޔާބުކުރި ހެޓްރިކާއެކު މެންޗެސްޓާ ސިޓީން 4-1 އިން އިޕްސްވިޗް ޓައުން ބަލިކޮށް ތާވަލުގެ އެއްވަނައަށް ޖެހިލިއިރު، އެސްޓަން ވިލާގެ ދަނޑުގައި 0-2 އިން އާސެނަލް މޮޅުވެއްޖެއެވެ.
މި ނަތީޖާއާއެކު ސިޓީ ވަނީ ކުޅުނު ދެ މެޗުން ހޯދީ ހަ ޕޮއިންޓާއެކު ލަނޑުގެ ތަފާތުން އެއްވަނަ އަށް ޖެހިލައިފައެވެ. ސިޓީ އަށް ފައިދާ ފަސް ގޯލް އޮތްއިރު، ދެވަނައިގައި އޮތް ބްރައިޓަން އާއި ތިނެއްގައި އޮތް އާސެނަލަށް ވެސް މިއަދަދަށް ޕޮއިންޓް ލިބިފައިވެއެވެ. އެކަމަކު، މި ދެ ޓީމަށް ލިބިފައިވަނީ ފައިދާ ހަތަރު ގޯލެވެ. ހަތަރުވަނައިގައި އޮތް ޓޮޓެންހަމް ހޮޓްސްޕާ އަށް ލިބިފައިވަނީ ހަތަރު ޕޮއިންޓެވެ.
ސިޓީގެ އިއްތިހާދު ސްޓޭޑިއަމްގައި މިރޭ ކުޅުނު މެޗުގައި ހީކުރި ގޮތާއި ހިލާފަށް ކުރީން ލީޑްނެގީ 22 އަހަރުގެ މެދުކެނޑުމަކަށްފަހު އިނގިރޭސި ފުރަތަމަ ޑިވިޝަނަށް އެނބުރިއައި އިޕްސްވިޗުންނެވެ. މެޗު ފެށިތާ ހަތްވަނަ މިނެޓުގައި އެ ޓީމަށް މި ލަނޑުޖަހައިދިނީ ސެމީ ޝްމޮޑިކް އެވެ. އޭގެ ފަސް މިނެޓުފަހުން، ލިބުނު ޕެނަލްޓީއަކުން ސިޓީ އަށް އެއްވަރުކޮށްދިނީ ހާލަންޑް އެވެ. މިއީ ޕެނަލްޓީއޭރިޔާ ތެރެއިން އެ ޓީމުގެ ބްރެޒިލް ވިންގް، ސަވީނިއޯ އަށް އިޕްސްވިޗްގެ ކުޅުންތެރިއަކު ކުރި ފައުލަކަށް ވީއޭއާރް އިން ބެލުމަށްފަހު ރެފްރީ ދިން ޕެނަލްޓީއެކެވެ.
ސިޓީން އެއްވަރުކުރިތާ ދެ މިނެޓުފަހުން، އެ ޓީމަށް ފުރަތަމަ ފަހަރަށް ލީޑްނަގައިދިން ލަނޑުޖަހައިދިނީ ބެލްޖިއަމް މިޑްފީލްޑަރު، ކެވިން ޑި ބްރޭނާ އެވެ. އަދި އޭގެފަހުން، މެޗުގެ 16 ވަނަ މިނެޓުގައި ހާލަންޑް ވަނީ ނަތީޖާ 3-1 އަށް ބަދަލުކޮށްލާފައެވެ. ފުރަތަމަ ހާފު ނިމުނީ މި ނަތީޖާގައި އޮވެގެންނެވެ.
މި މެޗުގައި ސިޓީން ޖެހި ހަތަރުވަނަ ލަނޑު، 88 ވަނަ މިނެޓުގައި ހާލަންޑް ކާމިޔާބުކޮށް، އޭނާގެ ހެޓްރިކް ފުރިހަމަކުރީ ޕެނަލްޓީއޭރިޔާ ބޭރުން ފޮނުވާލި ހަމަލާއަކުންނެވެ.
ލީގުގައި މިރޭ ރަށުން ބޭރުގައި ވިލާ އަތުން އާސެނަލް މޮޅުވީ ފަހު ހާފުގެ 10 މިނެޓުގެ ތެރޭގައި ކާމިޔާބުކުރި ލަނޑުތަކުންނެވެ. އާސެނަލްގެ ފުރަތަމަ ލަނޑު، 67 ވަނަ މިނެޓުގައި ކާމިޔާބުކޮށްދިނީ ފަހު ހާފުގައި ކުޅެން ނިކުތް ބެލްޖިއަމްގެ ވިންގް، ލެއަންޑްރޯ ޓްރޮސާޑް އެވެ. އޭގެފަހުން، މެޗުގެ 77 ވަނަ މިނެޓުގައި ޕެނަލްޓީއޭރިޔާ ބޭރުން ފޮނުވާލި ހަމަލާއަކުން ތޯމަސް ޕާޓޭ ވަނީ އެ ޓީމަށް ތިން ޕޮއިންޓް ކަށަވަރުކޮށްދީފައެވެ. ޕާޓޭ މި ލަނޑުޖެހީ އެ ޓީމުގެ އިނގިރޭސި ވިންގް، ބުކާޔޯ ސަކާ ދިން ޕާހަކުންނެވެ.
މި މެޗުގައި އާސެނަލުން ލީޑްނެގުމުގެ ކުރީން، ވިލާ އަށް ވަނީ ލަނޑުޖަހާނެ ރަނގަޅު ދެ ފުރުޞަތެއްލިބި ބޭކާރުވެފައެވެ. އޭގެތެރެއިން، ފުރަތަމަ ހާފުގައި ވިލާގެ އިނގިރޭސި ފޯވާޑް، އޮލީ ވަޓްކިންސް އަށް ގޯލްކުރިމަތިން ހުހަށް ހުރެ ފޮނުވާލަން ލިބުނު ބޯޅަ ދިޔައީ ގޯލަށް އަމާޒުނުވެ، ދަނޑިކައިރިން ބޭރަށެވެ. އޭގެފަހުން، ދެވަނަ ހާފުގެ ކުރީކޮޅު، ވަޓްކިންސް އަށް ޕެނަލްޓީއޭރިޔާގެ ތެރެއިން ފޮނުވާލަން ލިބުމުން ބޮލުން ޖައްސާލި ބޯޅަ އާސެނަލްގެ ގޯލްކީޕަރު، ޑޭވިޑް ރާޔާ މަތަކުރިއެވެ.
މި މުބާރާތުގައި މިރޭ ކުޅުނު އެހެން މެޗުތަކަށް ބަލާއިރު، ކްރިސްޓަލް ޕެލަސްގެ ދަނޑުގައި 0-2 އިން ވެސްޓް ހޭމް ޔުނައިޓެޑް އަތުން ވަނީ ބަލިވެފައެވެ. އަމިއްލަ ދަނޑުގައި ލެސްޓާ ސިޓީ އަތުން 1-2 އިން ފުލަމް މޮޅުވިއިރު، ސައުތެމްޓަންގެ ދަނޑުގައި ނޮޓިންހަމް ފޮރެސްޓް މޮޅުވީ 0-1 އިންނެވެ. އެވަޓަންއާ ދެކޮޅަށް އަމިއްލަ ދަނޑުގައި ޓޮޓެންހަމް މޮޅުވީ 0-4 އިންނެވެ.