އޭޝިއަން ސާފިން ޗެމްޕިއަންޝިޕުން ރާއްޖެ ހޯދީ ފަޚުރުވެރި ކާމިޔާބީއެއް: މެޑަމް ސާޖިދާ

އޭޝިއަން ސާފިން ޗެމްޕިއަންޝިޕް 2024 ގައި ރާއްޖެއިން ހޯދީ ފަޚުރުވެރި ކާމިޔާބީއެއް ކަމަށާއި، އޭޝިއަން ގޭމްސްއިން ފުރުސަތު ހޯދުމަކީ ދިވެހި ގައުމު ފަޚުރުވެރިވާ ކަމެއް ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.

ކ. ތުލުސްދޫގައި ކުރިއަށްދިޔަ އޭޝިއަން ސާފިން ޗެމްޕިއަންޝިޕުގެ ފިރިހެން ބައިގެ ހަތަރުވަނަ ރާއްޖެއިން ވަނީ ހޯދާފައެވެ.

އޭޝިއަން ސާފިން ޗެމްޕިއަންޝިޕް ނިންމުމުގެ ރަސްމިއްޔާތު މިއަދު ހަވީރު ކ. އަތޮޅު ތައުލީމީ މަރުކަޒުގައި ބޭއްވިއިރު، މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ އަނބިކަބަލުން ސާޖިދާ މުޙައްމަދެވެ. އަދި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުވެސް ވަނީ ބައިވެރިވެވަޑައިގެންފައެވެ.

އޭޝިއަން ސާފިން ޗެމްޕިއަންޝިޕުގައި ބައިވެރިވި ދިވެހި ގައުމީ ފިރިހެން ޓީމާއި އަންހެން ޓީމުން ވަނީ 2026 ވަނަ އަހަރު ޖަޕާނުގައި ބާއްވާ އޭޝިއަން ގޭމްސްގެ ޖާގަތައް ކަށަވަރުކޮށްފައެވެ.

ނިންމުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވީ މި މުބާރާތް ރާއްޖޭގައި ބޭއްވުމަކީ ލިބުނު ފަޚަރެއް ކަމަށާއި، އަދި ތުލުސްދޫ އަކީ މި މުބާރާތް ބޭއްވުމަށް އެންމެ ގާބިލު އެއް ރަށް ކަމަށެވެ. މީގެ އިތުރުން ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވަނީ މުބާރާތުން ވަނަވަނަ ހޯދި އެތުލީޓުންނަށް މަރުހަބާ ވިދާޅުވެފައެވެ.

އޭޝިއަން ސާފިން ޗެމްޕިއަންޝިޕުގެ ފިރިހެން ބައިގެ ހަތަރުވަނަ ރާއްޖެއަށް ލިބުނުއިރު، އެއްވަނަ ހޯދީ އިންޑޮނޭޝިއާއެވެ. އަދި ދެވަނައިގައި ޖަޕާން އޮތްއިރު، ތިންވަނައަށް ދިޔައީ ފިލިޕީންސްއެވެ. މި ފަހަރުގެ ރޭންކިންގެ ހަތަރުވަނަ ރާއްޖެއަށް ލިބުނުއިރު، ދެކުނު އޭޝިއާ ސަރަހައްދުގެ އެއްވަނައިގައި އޮތީވެސް ރާއްޖެއެވެ.

މީގެ އިތުރުން އޭޝިއަން ސާފިން ޗެމްޕިއަންޝިޕުގެ އަންހެން ބައިގެ އެއްވަނަ ޖަޕާނުން ހޯދިއިރު، ދެވަނައިގައި އޮތީ އިންޑޮނޭޝިއާއެވެ. އަދި ތިންވަނައަށް ޗައިނާ ދިޔައިރު، ހަތަރުވަނަ ލިބުނީ ފިލިޕީންސްއަށެެވެ. އަންހެން ބައިގެ ރޭންކިންގައި ރާއްޖެ އޮތީ އަށްވަނައިގައެވެ.

މުބާރާތުގެ އިންޑިވިޖުއަލް އިވެންޓުތަކަށް ބަލާއިރު، ފިރިހެން ބައިގެ ޗެމްޕިއަންކަން ހޯދީ އިންޑޮނޭޝިއާގެ އައި މޭޑް ޕަޖަރް އަރިޔާނާއެވެ. އަދި އަންހެން ބައިގެ ޗެމްޕިއަންކަން ހޯދާފައިވަނީ ޖަޕާންގެ މިރާއީ އިކޭޑާއެވެ. ޖޫނިއާ ފިރިހެން ބައިގެ ޗެމްޕިއަންކަން ޖަޕާންގެ ޓާރޯ ޓަކާއީ ހޯދިއިރު، ޖޫނިއާ އަންހެން ބައިގެ ޗެމްޕިއަންކަން ހޯދީ ޖަޕާންގެ އަރީސާ އިޝީއެވެ. މީގެ އިތުރުން އޭއެސްއެފް ޓީމު ޗެލެންޖް މަރުހަބާ ކަޕުގެ ޗެމްޕިއަންކަން ހޯދާފައިވަނީ ޖަޕާނުންނެވެ.

މި ފަހަރުގެ އޭޝިއަން ސާފިން ޗެމްޕިއަންޝިޕުގައި އޭޝިއާގެ 20 ގައުމަކުން 100 އަށްވުރެ ގިނަ އެތުލީޓުން ވަނީ ވާދަކޮށްފައެވެ. މިއީ މި މުބާރާތް ރާއްޖޭގައި ބޭއްވި ދެވަނަ ފަހަރެވެ. އެގޮތުން މިދިޔަ އަހަރުގެ މުބާރާތްވެސް ބާއްވާފައިވަނީ ތުލުސްދޫގައެވެ.