ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕް 2024 ގެ ޖޫނިއަރ އަންހެން ބައިގެ ޗެމްޕިއަންކަން ޖަޕާންގެ އަރީސާ އިޝީ ހޯދައިފިއެވެ.
މި ބައިގެ ޗެމްޕިއަންކަން އަރީސާ ހޯދީ މިއަދު ކުރިއަށްދިޔަ ފައިނަލް ހީޓުގައި 13.50 ސްކޯ ކޮށްގެންނެވެ. މި ބައިގެ ދެވަނައަށް ދިޔައީ ޖަޕާނުގެ ކޮކޯރޯ ބާބާއެވެ. އޭނާ ވަނީ މި ހީޓުގައި 12.66 ގެ ސްކޯއެއް ހޯދާފައެވެ. ތިންވަނަ ހޯދި އިންޑޮނޭޝިއާގެ ހަނާ ސުރީ ޖަބްރިކް 9.50 ގެ ސްކޯއެއް ހޯދިއިރު، ހަތަރުވަނައަށް ދިޔައީ ޗައިނާގެ ޔައޯމެއި ވޫއެވެ. އޭނާއަށް ސްކޯ ކުރެވުނީ 9.47 އެވެ.
މި އަހަރުގެ އޭޝިއަން ސާފިން ޗެމްޕިއަންޝިޕުގެ ޖޫނިއާ އަންހެން ބައިގެ ޗެމްޕިއަންކަން ޖަޕާންގެ އަރީސާ ހޯދިއިރު، މިދިޔަ އަހަރުގެ މުބާރާތުގެ ޖޫނިއާ އަންހެން ބައިގެ ޗެމްޕިއަންކަން ހޯދީ ޖަޕާންގެ ސުމޯމޯ ސަޓޯއެވެ. އަދި ދެވަނައަށް ޗައިނާގެ ސިކީ ޔަން ދިޔައިރު، ތިން ވަނަ ހޯދީ ޖަޕާންގެ މިރާއީ އިކޭޑާއެވެ.