ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕް 2024 ގެ ޖޫނިއަރ ފިރިހެން ބައިގެ ޗެމްޕިއަންކަން ޖަޕާންގެ ޓާރޯ ޓަކާއީ ހޯދައިފިއެވެ.
މި ބައިގެ ޗެމްޕިއަންކަން ޓަކާއީ ހޯދީ މިއަދު ކުރިއަށްދިޔަ ފައިނަލް ހީޓުގައި 16.50 ސްކޯ ކޮށްގެންނެވެ. މި ބައިގެ ދެވަނައަށް ދިޔައީ ޖަޕާނުގެ ކައިސެއި އަޑާޗީއެވެ. އޭނާ ވަނީ މި ހީޓުގައި 16.17 ގެ ސްކޯއެއް ހޯދާފައެވެ. ތިންވަނަ ހޯދި ފިލިޕީންސްގެ ޓްރޯއި އެސްޕެޖޯން 8.76 ގެ ސްކޯއެއް ހޯދިއިރު، ހަތަރުވަނައަށް ދިޔައީ ޗައިނާގެ ޝެންޒެން ވަންގެވެ. އޭނާއަށް ސްކޯ ކުރެވުނީ 8.16 އެވެ.
މި އަހަރުގެ އޭޝިއަން ސާފިން ޗެމްޕިއަންޝިޕުގެ ޖޫނިއާ ފިރިހެން ބައިގެ ޗެމްޕިއަންކަން ޖަޕާންގެ ޓަކާއީ ހޯދިއިރު، މިދިޔަ އަހަރުގެ މުބާރާތުގައި އޭނާ ދިޔައީ ތިންވަނައަށެވެ. މިދިޔަ އަހަރުގެ މުބާރާތުގެ ޖޫނިއާ ފިރިހެން ބައިގެ ޗެމްޕިއަންކަން ހޯދީ ޖަޕާންގެ އިކޯ ވަތަނާބޭއެވެ. އަދި ދެވަނައަށް ދިޔައީ ރިކީ ސަޓޯއެވެ.