އިތުރުވަގުތުގެ ތެރޭގައި ޖަރުމަނުގެ މިޑްފީލްޑަރު، ފްލޯރިއަން ވާޓްޒް ވައްދާލި ލަނޑާއެކު ބަޔާ ލެވަކޫސަނުން 3-2 އިން ބޮރޫޝިއާ މުންޗެންގްލަޑްބަކް އަތުން ހޯދީ މޮޅާއެކު ބުންޑެސްލީގާގެ އައު ސީޒަން ފަށައިފިއެވެ.
މިއީ މިފަހަރުގެ ސީޒަނުގައި ލެވަކޫސަނުން ކުޅުނު ދެވަނަ މެޗެވެ. މީގެކުރީން، މިދިޔަ ހޮނިހިރު ދުވަހު އެ ޓީމުން ވަނީ ޖަރުމަނު ސުޕަ ކަޕް މެޗުގައި ޕެނަލްޓީޖަހައިގެން ވީއެފްބީ ސްޓުޓްގާޓް ބަލިކޮށްފައެވެ.
ބޮރޫޝިއާ ޕާކްގައި ރޭ ކުޅުނު މި މެޗުގެ ފުރަތަމަ ހާފުގައި ލެވަކޫސަނުން ވަނީ ދެލަނޑުގެ ލީޑެއްނަގައިފައެވެ. އޭގެފަހުން، ފަހު ހާފުގައި ދެފަހަރު މަތީން މުންޗެންގްލަޑްބަކް ވަނީ ނަތީޖާ އެއްވަރުކޮށްފައެވެ.
ރޭގެ މެޗުގައި ލެވަކޫސަނުން ޖެހި ފުރަތަމަ ލަނޑު، 12 ވަނަ މިނެޓުގައި ކާމިޔާބުކޮށްދިނީ ސްވިޒަލެންޑްގެ މިޑްފީލްޑަރު، ގްރޭނިޓް ޒާކާ އެވެ. މިއީ ޕެނަލްޓީއޭރިޔާ ބޭރުން ފޮނުވާލި ބާރު ހަމަލާއަކުން އޭނާ ކާމިޔާބުކުރި ގޯލެކެވެ. މިއީ މި ފަހަރުގެ ސީޒަނުގެ ޖަރުމަނުގެ ލީގުގައި ފެނިގެންދިޔަ ފުރަތަމަ ގޯލެވެ.
އޭގެފަހުން، މެޗުގެ 38 ވަނަ މިނެޓުގައި ލެވަކޫސަންގެ ދެވަނަ ލަނޑުޖަހައިދިނީ ވާޓްޒް އެވެ. މިއީ އެ ޓީމުގެ ސްޕެއިން ފުލްބެކް، އަލެހަންދްރޯ ގްރިމާލްޑޯ ފޮނުވާލި ހަމަލާއެއް މުންޗެންގްލަޑްބަކްގެ ގޯލްކީޕަރު، ޖޯނަސް އޮމްލިން މަތަކުރުމުން ދެވަނަ ފަހަރަށް އެ ބޯޅަ ގޯލްގެތެރެއަށް ފޮނުވާލައިގެން ވާޓްޒް ކާމިޔާބުކުރި ގޯލެކެވެ.
ފުރަތަމަ ހާފު ނިމެން ތިން މިނެޓަށްވެފައިވަނިކޮށް، މުންޗެންގްލަޑްބަކްގެ ފޯވާޑް، ޓިމް ކްލެއިންޑިއެންސްޓް ގޯލެއް ކާމިޔާބުކުރިއެވެ. ނަމަވެސް، ވީއޭއާރް އިން ބެލުމަށްފަހު، އޮފްސައިޑް ކަމަށް ނިންމާ ރެފްރީ އެ ލަނޑު ގަބޫލެއްނުކުރިއެވެ. މިއާއެކު، ފުރަތަމަ ހާފު ނިމުނީ ލެވަކޫސަން 2-0 އިން ކުރީގަ އޮވެގެންނެވެ.
ދެވަނަ ހާފުގެ ކުޅުން ފެށިތާ ކުޑައިރުކޮޅެއްގެ ތެރޭގައި، މެޗުގެ 59 ވަނަ މިނެޓުގައި މުންޗެންގްލަޑްބަކްގެ ފުރަތަމަ ލަނޑުޖަހައިދިނީ ސްވިޒަލެންޑްގެ ޑިފެންޑަރު، ނިކޯ އެލްވެޑީ އެވެ. އަދި އޭގެފަހުން، މެޗު ނިމެން ފަސް މިނެޓަށްވެފައިވަނިކޮށް މުންޗެންގްލަޑްބަކް އަށް އެއްވަރުކޮށްދިނީ ކްލެއިންޑިއެންސްޓް އެވެ.
މި ނަތީޖާގައި އޮވެ، މެޗު ނިމެންދަނިކޮށް ލެވަކޫސަން މޮޅުކޮށްދިނީ އިތުރުވަގުތުގެ ތެރޭގައި ވާޓްޒް އެވެ. މިއީ ފަހު ހާފުގައި ކުޅެން ނިކުތް އެ ޓީމުގެ އަމީން އަޑްލީ އަށް ޕެނަލްޓީއޭރިޔާ ތެރެއިން މުންޗެންގްލަޑްބަކްގެ ކޯ އިޓަކޫރާ ކުރި ފައުލަކަށް ރެފްރީ ދިން ޕެނަލްޓީއަކުން ވާޓްޒް ފޮނުވާލި ބޯޅަ ކީޕަރު، އޮމްލިން މަތަކުރުމުން ދެވަނަ ފަހަރަށް އެ ބޯޅަ ގޯލްގެތެރެއަށް ފޮނުވާލައިގެން ވާޓްޒް ކާމިޔާބުކުރި ގޯލެކެވެ.
މިއީ ލީގުގައި ލެވަކޫސަނުން ބަލިނުވެ ފުރިހަމަކުރި 35 ވަނަ މެޗެވެ. މީގެކުރީން، ބުންޑެސްލީގާގެ ތާރީޚުގައި ދެ ސީޒަނަށް ދެމިގެންދާގޮތަށް ބަލިނުވެ އެންމެ ގިނަ މެޗު ކުޅެފައިވަނީ ބަޔާން މިއުނިކާއި އެސްވީ ހެމްބާގެވެ. ބަޔާނުން ވަނީ 2012 އިން 2014 އާ ދެމެދު ބަލިނުވެ، 53 މެޗު ފުރިހަމަކޮށްފައެވެ. ހެމްބާގުން ވަނީ 1982 އިން 1983 އާ ދެމެދު ބަލިނުވެ، 36 މެޗު ހަމަކޮށްފައެވެ.
ލެވަކޫސަން ދެން ކުޅޭ މެޗުގައި މި މަހުގެ 28 ވާ ބުދަ ދުވަހު ޖަރުމަނު ކަޕްގައި ރަށުން ބޭރުގައި ނިކުންނާނީ ކާލް ޒެއިސް ޖެނާއާ ދެކޮޅަށެވެ. އެއަށްފަހު، މި މަހުގެ 31 ވަނަ ދުވަހު ލީގުގައި އެ ޓީމަށް އޮތީ އަމިއްލަ ދަނޑުގައި އާރްބީ ލީޕްޒިގާ ބައްދަލުކުރާ މެޗެވެ.