ދުނިޔޭގެ އެއްވަނަ ފިރިހެން ޓެނިސް ކުޅުންތެރިޔާ ޔެނިކް ސިނާ އޭނާގެ ޓްރެއިނަރ އާއި ފިޒިއޮތެރަޕިސްޓް މަގާމުން ވަކިކޮށްފި އެވެ.
ޔޫއެސް އޯޕަން ޓެނިސް މުބާރާތުގެ ކުރިން ނޫސްވެރިންނާ ވާހަކަ ދައްކަމުން ސިނާ ބުނެފައިވަނީ ޓްރޭނަރު ފެރޭރާ އާއި ނަލްދީ އަކީ އޭނާ އާއިއެކު ގިނަ ކާމިޔާބީތަކެއް ހޯދާފައިވާ ދެ މީހުން ކަމަށެވެ. ނަމަވެސް އެފަދަ ގޯހެއް އިތުރަށް ތަކުރާރުވާނެ ފުރުސަތެއް ދޭން އިތުރަށް ބޭނުން ނުވާ ކަމަށެވެ.
އޭނާގެ ޓީމުގެ ދެ އޮފިޝަލުން މަގާމުން ވަކިކޮށްފައިވަނީ ކުޅިވަރުގައި މަނާ ބޭސް ބޭނުން ކުރިކަމަށް ހެދި ޓެސްޓުތަކުން އޭނާ ޕޮޒިޓިވްވެ އެ މައްސަލައިން ސަލާމަތްވިތާ ގިނަ ދުވަސްތަކެއް ނުވަނީހެވެ. މަނާ ބޭހަށް ސިނާ ޕޮޒިޓިވް ވިކަމަށް ބުނެފައިވަނީ މިދިޔަ މާޗް މަހު ހެދި ޑޯޕިން ޓެސްޓަށް ފަހުގައެވެ. އަދި އޭގެ އަށް ދުވަސް ފަހުން ހެދި ދެވަނަ ޓެސްޓުންވެސް އޭނާ ޕޮޒިޓިވް ވެފައިވާތީ އޭނާ ހުރީ ޕްރޮވިޝަނަލް ސަސްޕެންޝަނެއްގައި މުބާރާތްތަކުގައި ވާދަ ކުރެވޭ ގޮތަށެވެ.
މި މައްސަލަ ސިނާ އިސްތިއުނާފްކޮށް ކަން ހިގައިދިޔަގޮތް އިންޓަނޭޝަނަލް ޓެނިސް އިންޓެގްރިޓީ އެސޯސިއޭޝަނަށް ހުށައަޅާ އިތުރަށް މައްސަލަ ބެލުމަށްފަހު ނިންމާފައިވަނީ ސިނާ މަނާ ބޭހަކަށް ޕޮޒިޓިވް ވެފައިވަނީ އޭނާގެ ފިޒިއޮތެރަޕިސްޓް، ޖިއާކޯމޯ ނަލްޑީގެ އަތުން ކަނޑައިގެން ގޮސްފައިވާ ތަނަކަށް ފަރުވާ ކުރުމަށް އޭނާ އަތުގައި އުނގުޅާފައިވާ ބޭހެއްގެ ސަބަބުން ސިނާ ޕޮޒިޓިވް ވެފައިވާ ކަމަށެވެ. އަދި ނަލްޑީގެ އަތުގައި ބޭސް އުނގުޅުމަށްފަހު އެ މުއްދަތުގެ ތެރޭގައި އޭނާ ވަނީ ސިނާ އަށް މަސާޖް ސެޝަންތަކާއި ސްޕޯޓްސް ތެރަޕީ ނަގައިދީފަ އެވެ.
މަނާ ބޭސް ބޭނުން ކުރި މައްސަލައިގައި ދެ ފަހަރު ހެދި ޓެސްޓްތަކުންވެސް ސިނާ ޕޮޒިޓިވް ވެފައިވާއިރު، އޭނާއަށް މުބާރާތްތަކުގައި ވާދަ ކުރުމުގެ ފުރުސަތު ދީފައިވާތީ ބައެއް އެތްލީޓުން ވަނީ ހިތްހަމަ ނުޖެހުން ފާޅުކޮށްފަ އެވެ.