ނިމިދިޔަ ސީޒަނުގައި ސްޕޭނުގެ ބާސެލޯނާއަށް ކުޅުނު ޖަރުމަންގެ އިލްކާއި ގުންޑޮގާން އެނބުރި އޭނާގެ ކުރީގެ ކްލަބް ކަމަށްވާ މެންޗެސްޓަރ ސިޓީއަށް އިއްޔެ ސޮއިކޮށްފި އެވެ.
ޖަރުމަނުގެ ގައުމީ ޓީމަށް ކުޅުން ހުއްޓާލިކަން ދާދި ފަހުން އިއުލާން ކުރި އުމުރުން 33 އަހަރުގެ ގުންޑޮގާން ސިޓީއަށް ބަދަލުވެފައިވަނީ އެއް އަހަރު ދުވަހުގެ އެއްބަސްވުމެއްގެ ދަށުންނެވެ. ބާސެލޯނާ ގައި އެއް ސީޒަން ހޭދަ ކުރުމަށްފަހު ގޮންޑޮގާން ވަނީ އެ ކްލަބާއިއެކު ހަދާފައިވާ އެއްބަސްވުމުގައި ބާކީ އެއް އަހަރު އޮއްވާ އެއްބަސްވުން އުވާލާފައެވެ.
2016 ވަނަ އަހަރު ޖަރުމަނުގެ ބޮރޫޝިއާ ޑޯޓްމަންޑްއިން ސިޓީ އާއި ގުޅުނު ގޮންޑޮގާން ވަނީ ޕެޕް ގަޑިއޯލާ އާއިއެކު އެކްލަބުގައި ގިނަ ކާމިޔާބީތަކެއް ހޯދާފައެވެ. އޭގެ ތެރޭގައި 2023 ވަނަ އަހަރުގެ އެފްއޭ ކަޕްގެ ޗެމްޕިއަންކަން ސިޓީން ވާދަވެރި މެންޗެސްޓަރ ޔުނައިޓެޑް ބަލިކޮށް ހޯދާފައިވަނީ ފައިނަލް މެޗުގައި ގޮންޑޮގާން ކާމިޔާބުކޮށްދިން ދެ ލަނޑުންނެވެ. އަދި މިމެޗްގެ 13 ވަނަ ސިކުންތުގައި އޭނާ ޖެހި ލަނޑަކީ އެފްއޭ ކަޕްގެ ތާރީޚުގައިވެސް ޖެހި އެންމެ އަވަސް ލަނޑެވެ.
ގުންޑޮގާން ވަނީ ސިޓީގައި ހޭދަކުރި ދުވަސްތަކުގައި އެ ޓީމަށް ކުޅެދިން 304 މެޗުގައި 60 ލަނޑު ޖަހާފައެވެ. އަދި އެ ކްލަބާއިއެކު އޭނާ ވަނީ 12 ތަށި ހޯދާފައެވެ.