ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕް 2024 ގެ އަންހެން ބައިގެ ޗެމްޕިއަންކަން ޖަޕާންގެ މިރާއީ އިކޭޑާ ހޯދައިފިއެވެ.
މި ބައިގެ ޗެމްޕިއަންކަން މިރާއީ އިކޭޑާ ހޯދީ މިއަދު ކުރިއަށްދިޔަ ފައިނަލް ހީޓުގައި 12.93 ސްކޯ ކޮށްގެންނެވެ. މި ބައިގެ ދެވަނައަށް ދިޔައީ ޖަޕާނުގެ އަންރީ މަޓްސޫނޯއެވެ. އޭނާ ވަނީ މި ހީޓުގައި 11.83 ގެ ސްކޯއެއް ހޯދާފައެވެ. ތިންވަނަ ހޯދި ޗައިނާގެ ސިގީ ޔަންގް 8.16 ގެ ސްކޯއެއް ހޯދިއިރު، ހަތަރުވަނައަށް ދިޔައީ އިންޑޮނޭޝިއާގެ ޓައިނާ އެންޖެލް އިޒްކުއެޑޯއެވެ. އޭނާއަށް ސްކޯ ކުރެވުނީ 7.97 އެވެ.
މި އަހަރުގެ އޭޝިއަން ސާފިން ޗެމްޕިއަންޝިޕުގެ އަންހެން ބައިގެ ޗެމްޕިއަންކަން ޖަޕާންގެ މިރާއީ އިކޭޑާ ހޯދިއިރު، މިދިޔަ އަހަރުގެ މުބާރާތުގައި އޭނާ ދިޔައީ ދެވަނައަށެވެ. މިދިޔަ އަހަރުގެ މުބާރާތުގެ އަންހެން ބައިގެ ޗެމްޕިއަންކަން ހޯދީ ޖަޕާންގެ ސުމޯމޯ ސަޓޯއެވެ. އަދި ތިންވަނައަށް ދިޔައީ އިންޑޮނޭޝިއާގެ ޑިއާ ނަޓާޝާއެވެ.