ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕް 2024 ގެ ފިރިހެން ބައިގެ ޗެމްޕިއަންކަން އިންޑޮނޭޝިއާގެ އައި މޭޑް ޕަޖަރް އަރިޔާނާ ހޯދައިފިއެވެ.
މި ބައިގެ ޗެމްޕިއަންކަން ޕަޖަރް ހޯދީ މިއަދު ކުރިއަށްދިޔަ ފައިނަލް ހީޓުގައި 15.50 ސްކޯ ކޮށްގެންނެވެ. މި ބައިގެ ދެވަނައަށް ދިޔައީ އިންޑޮނޭޝިއާގެ އައި މޭޑް ޖޯއި ސަތުރިއަވަންއެވެ. އޭނާ ވަނީ މި ހީޓުގައި 14.34 ގެ ސްކޯއެއް ހޯދާފައެވެ. ތިންވަނަ ހޯދި ޖަޕާނުގެ އިއްކޯ ވަޓަނާބެ 11.80 ގެ ސްކޯއެއް ހޯދިއިރު، ހަތަރުވަނައަށް ދިޔައީ ހަމަ އެ ގައުމުގެ އެތުލީޓެއް ކަމަށްވާ ޓަކީ ކަނަޒާވާއެވެ. އޭނާއަށް ސްކޯ ކުރެވުނީ 9.07 އެވެ.
މި އަހަރުގެ އޭޝިއަން ސާފިން ޗެމްޕިއަންޝިޕުގެ ފިރިހެން ބައިގެ ޗެމްޕިއަންކަން އިންޑޮނޭޝިއާގެ ޕަޖަރް ހޯދިއިރު، މިދިޔަ އަހަރުގެ މުބާރާތުގެ ފިރިހެން ބައިގެ ޗެމްޕިއަންކަންވެސް ހޯދާފައިވަނީ އިންޑޮނޭޝިއާގެ އެތުލީޓެކެވެ. އެގޮތުން ފިރިހެން ބައިގެ ޗެމްޕިއަންކަން އެ ގައުމުގެ ޑަނީ ވިޑިއަންޓޯ ހޯދިއިރު، އެ ފަހަރު ދެވަނައަށް ދިޔައީ ޖަޕާންގެ ރިކީ ސާޓޯއެވެ. އަދި ތިންވަނަ ހޯދީ މި ފަހަރު ރާއްޖޭގެ ކޯޗު ހުސެއިން އަރީފް (އިބޫ) އެވެ.