ޓްރާންސްފާގެ ވާހަކަތަކުގެ ސަބަބުން ޗެލްސީގެ ކުޅުންތެރިންގެ ސަމާލުކަން ނުގެއްލޭނެ: ޑިއުސްބަރީ-ހޯލް
ޗެލްސީގެ ކުޅުންތެރިން މިވަގުތު ވަނީ "ބަބަލްއެއް" ގައި ކަމަށާއި، ކްލަބާ ގުޅޭގޮތުން ދެކެވޭ ޓްރާންސްފާ ވާހަކަތަކުން އެމީހުންގެ ސަމާލުކަން ނުގެއްލޭނެ ކަމަށް މިޑްފީލްޑަރު، ކިއަރނަން ޑިއުސްބަރީ-ހޯލް ބުނެފިއެވެ.
މިފަހަރުގެ ސީޒަނަށް ލެސްޓާ ސިޓީ އިން ޗެލްސީ އަށް ބަދަލުވި، ޑިއުސްބަރީ-ހޯލް މިހެން ބުނެފައިމިވަނީ، އެ ޓީމުގެ ކޯޗު، އެންޒޯ މަރެސްކާ ޗެލްސީގެ ބޮޑުވެފައިވާ ސްކޮޑު ކުޑަކުރުމަށް މަސައްކަތްކުރަމުންދާ ދަނޑިވަޅެއްގައެވެ.
ދާދިފަހުން، މަރެސްކާ ވަނީ، އިނގިރޭސި ގައުމީ ޓީމުގެ ކުޅުންތެރިންކަމަށްވާ، ރަހީމް ސްޓާލިންގ އާއި ބެން ޗިލްވެލް ހިމެނޭގޮތަށް 15 އަށްވުރެ ގިނަ ކުޅުންތެރިން ފުރަތަމަ ޓީމާއެކު ތަމްރީނު ނުކުރާ ކަމަށާއި، އަދި މި ސީޒަނުގައި އެ ކްލަބުގެ ޕްލޭންތަކުގައި އެ ކުޅުންތެރިން ނުހިމެނޭ ކަމަށް ބުނެފައެވެ.
ސްކޮޑާ ގުޅޭގޮތުން އޮތް ހަމަނުޖެހުމުގެ ސަބަބުން ކުޅުންތެރިންނަށް އުނދަގޫވޭތޯ ސުވާލުކުރުމުން، ބުދަ ދުވަހު ނޫސްވެރިންނާ ވާހަކަދައްކަމުން ޑިއުސްބަރީ-ހޯލް ބުނީ، "ނޫން، އަހަރެމެން މިތިބީ އެކަމާ ގުޅޭގޮތުން ބަބަލްއެއްގައި."
"އެފަދަ ކަންތައްތަކުން އަހަރެމެންނަށް އަސަރުކުރަން ދޫކޮށްލައިގެން ނުވާނެ. އަހަރެމެން ހަމައެކަނި ކުރާ ކަމަކީ ކޮންމެ ދުވަހަކު ވީހާވެސް ރަނގަޅަށް ތަމްރީންތަކުގައި ބައިވެރިވެ، މެޗުތަކަށް ތައްޔާރުވުން. ބޭރުގައި ހިނގާ ކަންތައްތަކަކީ އަހަރެމެންނަށް ބާރު ފޯރުވޭނެ ކަންކަމެއް ނޫން."
އަދި ޓްރާންސްފާ ބާޒާރު އެއްކޮށް ބަންދުވުމުން ހުރިހާ ގޮތަކުން ފަސޭހަވެ، ސީޒަނަށް އެންމެ ފުރިހަމައަށް ފޯކަސް ކުރެވޭނެ ކަމަށާއި، ހުޅުވިފައި އޮންނައިރު ޝައްކުތައް އުފެދޭނެ ކަމަށް ވެސް ޑިއުސްބަރީ-ހޯލް ބުންޏެވެ.
ޗެލްސީ އަށް ލީގުގައި ދެން އެންމެ އަވަހަށް ކުޅެން އޮތީ ރަށުން ބޭރުގައި އަންނަ އާދީއްތަ ދުވަހު ވުލްވްސް އާ ދެކޮޅަށެވެ.