އީރާނުގެ ކުރީގެ ރައީސް އިބްރާހީމް ރައީސީ ދަތުރު ކުރައްވަމުން ގެންދެވި ހެލިކޮޕްޓަރު ވެއްޓި އޭނާ އަވަހާރަވެފައި ވަނީ މޫސުން ގޯސްވުމާ ގުޅިގެން ކަމުގައި ސަލާމަތީ މަސްދަރަކާ ހަވާލާދީ އެ ޤައުމުގެ ފާރިސް ނޫސް އޭޖެންސީން ބުނެފިއެވެ. ރައީސީ ދަތުރު ކުރައްވަމުން ގެންދެވި ހެލިކޮޕްޓަރު ވެއްޓިފައި ވަނީ އެ ޤައުމުގެ ހުޅަނގު އުތުރު އީސްޓް އަޒަރްބައިޖާން ޕުރޮވިންސުގެ ޖިލްފާގުގެ ފަރުބަދަމަތީ ހިސާބަކަށް މޭ 19ވަނަ ދުވަހުއެވެ.
އެ ހާދިސާގައި ރައީސީގެ އިތުރުން އީރާނުގެ އޭރުގެ ޚާރިޖީ ވަޒީރު ޙުސައިން އަމީރު ޢަބްދުއްލުހައްޔާނީއާއި, އީސްޓް އަޒަރްބައިޖާން ޕުރޮވިންސުގެ ކުރީގެ ގަވަރުނަރު މާލިކު ރަޙްމަތީއާއި, ތަބްރީޛް ސިޓީގެ ހުކުރު ނަމާދާ ބެހޭ އިސްވެރިޔާ މުޙައްމަދު ޢަލީ އަލް-ހާޝިމް ވެސް އަވަހާރަވިއެވެ.
އީރާނުގެ ސަލާމަތީ ދާއިރާގެ އޮފިޝަލަކާ ހަވާލާދީ ފާރިސް ނޫސް އޭޖެންސީ ބުނީ, ރައީސީ ދަތުރު ކުރައްވަމުން ގެންދެވި ހެލިކޮޕްޓަރު ވެއްޓިފައި ވަނީ މޫސުން ގޯސްވުމާ ގުޅިގެން އުޅަނދުގެ ކޮންޓްރޯލް ގެއްލުމުން ކަމުގައެވެ. އަދި, އެ އުޅަނދުގައި އުފުލޭ ފަސިންޖަރުންގެ ޢަދަދަށްވުރެ އިތުރަށް ފަސިންޖަރުން ތިބުމުން ބަރުދަން އިތުރުވެ, ހެލިކޮޕްޓަރު ރައްކާތެރި ކަމާ އެކު ބިމަށް ތިރި ކުރަން ޕައިލެޓުންނަށް ހުރަސް އެޅުމުން ކަމުގައެވެ.
އެ ހާދިސާއާ ގުޅޭ ތަޙުޤީޤު ރިޕޯޓުގައިވާ މަޢުލޫމާތު ފާރިސް ނޫސް އޭޖެންސީއާ ހިއްސާ ކޮށްފައިވާ ސަލާމަތީ ދާއިރާގެ އޮފިޝަލުގެ ވަނަވަރު ހާމަ ކޮށްފައެއް ނުވެއެވެ. "އާޔަތުالله ރައީސީ ދަތުރު ކުރައްވަމުން ގެންދެވި ހެލިކޮޕްޓަރު ވެއްޓުނު ހާދިސާގެ ތަޙުޤީޤު ވަނީ ނިންމާފައި. އެ ހާދިސާ ހިނގަން މެދުވެރިވި ސަބަބު ވަނީ ދެނެގަނެވިފައި،" ފާރިސް ނޫސް އޭޖެންސީއަށް މަޢުލޫމާތު ދިން ނަން ހާމަ ކޮށްފައި ނުވާ ސަލާމަތީ ދާއިރާގެ އޮފިޝަލު ބުންޏެވެ.
އީރާނުގައި ހިނގާ މި ފަދަ ހާދިސާތަކާ ގުޅޭ މަޢުލޫމާތު ރަސްމީކޮށް ހާމަ ކުރަނީ އެ ޤައުމުގެ އާމްޑް ފޯސަސް ޖެނެރަލް ސްޓާފުންނެވެ. އެ އިދާރާގެ ކޮމިޔުނިކޭޝަންސް ސެންޓަރުން ވަނީ, ރައީސީ އަވަހާރަވި ހާދިސާގެ ތަޙުޤީޤާ ގުޅޭ ގޮތުން ފާރިސް ނޫސް އޭޖެންސީން ޝާއިޢު ކޮށްފައިވާ ރިޕޯޓާއި މަޢުލޫމާތު ދޮގު ކޮށްފައެވެ.
ރައީސީ ދަތުރު ކުރައްވަމުން ގެންދެވި ހެލިކޮޕްޓަރު ވެއްޓުނު ހާދިސާގެ ތަޙުޤީޤާ ގުޅޭ ގޮތުން އީރާނުގެ އަސްކަރިއްޔާއިން މޭ މަހު ބުނެފައި ވަނީ, ހެލިކޮޕްޓަރު ވެއްޓިފައި ވަނީ ބޭރުގެ ބާރެއްގެ އަމަލުތަކުގެ ސަބަބުން ނުވަތަ ޙަމަލާއަކާ ގުޅިގެން ކަމަށް ބެލުމުގެ ފުރުޞަތު ނެތް ކަމުގައެވެ.
ފާރިސް ނޫސް އޭޖެންސީ ރިޕޯޓު ކޮށްފައިވާ ގޮތުގައި, ހެލިކޮޕްޓަރު ވެއްޓިފައި ވަނީ މޫސުން ގޯސްވުމާ ގުޅިގެންނެވެ. އަދި, އެ އުޅަނދުގައި އުފުލުމުގެ ހުއްދަ އޮންނަ ފަސިންޖަރުންގެ ޢަދަދަށްވުރެ އިތުރަށް ދެ މީހުން ތިބި ކަމުގައި ވެސް އެ އޭޖެންސީ ރިޕޯޓު ކުރިއެވެ. ނަމަވެސް, އީރާނުގެ އާމްޑް ފޯސަސް ޖެނެރަލް ސްޓާފުން މި ވަނީ މި ރިޕޯޓު ދޮގު ކޮށްފައެވެ.
ރައީސީ ފަސްދާނުލާފައި ވަނީ މޭ 23ވަނަ ދުވަހު އޭނާގެ އުފަން ރަށް, މަޝްހަދުގައެވެ. ރައީސީ ފަސްދާނުލުމަށް ބޭއްވި ޖަނާޒާގައި އީރާނުގެ ސަރުކާރާއި އަސްކަރިއްޔާގެ އިސް އޮފިޝަލުންގެ އިތުރުން ދީނީ ޢިލްމުވެރިން ބައިވެރިވެ ވަޑައިގެންނެވިއެވެ. އޭނާ ފަސްދާލާފައި ވަނީ 9ވަނަ ޤަރުނުގެ އިސް އިމާމް ޢަލީ އަލް-ރިޟާގެ ޒިޔާރަތް ހުންނަ މަޤުބަރާގައެވެ.
63 އަހަރުގެ ރައީސީއަކީ އީރާނުގެ ސިޔާސީ, ދީނީ އަދި ޝަރުޢީ ދާއިރާގައި ނުފޫޒު ގަދަ ބޭފުޅެކެވެ. 2017ވަނަ އަހަރު ވެސް ރައީސީ ވަނީ ރިޔާސީ އިންތިޚާބުގައި ވާދަ ކުރައްވާފައެވެ. ނަމަވެސް, އެ ފަހަރު ކުރިމަތިވެ ވަޑައިގެންނެވި ނާކާމިޔާބީއަށް ފަހު, 2021ވަނަ އަހަރުގެ ރިޔާސީ އިންތިޚާބުގައި ވާދަކުރައްވައި, އޭނާ ވަނީ ކާމިޔާބީ ހޯއްދަވާފައެވެ.
ރައީސީ އަވަހާރަވީ އިރު އޭނާގެ އަނބިކަނބަލަކާއި ދެ އަންހެން ދަރިކަނބަލުން އެބަތިއްބެވިއެވެ. މަޝްހަދުގައި ހުކުރު ކުރައްވާ އިމާމު އަޙްމަދު ޢަލްމް އަލް-ހުދާގެ ދަރިކަނބަލުން, ޖަމީލާ ޢަލްމް އަލް-ހުދާއާ ރައީސީ ކައިވެނި ބައްލަވާފައި ވަނީ 1983ވަނަ އަހަރުއެވެ.