ރ.މިދޫގައި ބޭއްވި "މައިލޯ އިތާ އިންޓަރ ރިސޯޓް ވޮލީބޯޅަ ޗެންޕިއަންޝިޕް 2024" ގެ ޗެމްޕިއަންކަން ޖޯލި ބީން ހޯދައިފިއެވެ.
ބުދަ ދުވަހު ކުޅުނު ފައިނަލް މެޗު ޖޯލި ބީން ކާމިިޔާބުކޮށްފައިވަނީ ޖޯލި މޯލްޑިވްސްއާ ވާދަކޮށް ފަހަތުން އަރައި ތިން ސެޓް އެއް ސެޓުން މެޗު ކާމިޔާބުކޮށްގެންނެވެ.
އެންމެ ފަހުގެ ޗެމްޕިއަން ޖޯލި ބީންގ މުބާރާތުގެ ފައިނަލުން ޖާގަހޯދީ ސެމީފައިނަލް ފުރަތަމަ މެޗުގައި ފަސޭހަކަމާއެކު ސީދާ ތިން ސެޓުން އާރަށް ބަލިކޮށްގެންނެވެ. އަދި ޖޯލި މޯލްޑިވްސް ފައިނަލުން ޖާގަ ހޯދީ ސެމީފައިނަލުގެ ދެވަނަ މެޗުގައި އެންމެފަހުގެ ރަނަރަޕް ކުޑަފުށި ސީދާ ތިން ސެޓުން ބަލިކޮށްގެންނެވެ.
މެޗުގެ ފުރަތަމަ ސެޓުގައި ޖޯލި ބީންގ ފަރާތުން އާދައިގެ ކުޅުމެއް ފެނިގެންދިޔައިރު، މިސެޓް އަށް ޕޮއިންޓްގެ ލީޑަކާއެކު 17-25 ގެ ނަތީޖާއަކުން ކާމިޔާބުކުރީ ޖޯލި މޯލްޑިވްސް އެވެ.
ނަމަވެސް ޖެހިގެން އައި ދެވަނަ ސެޓުގައި ޖޯލި ބީންގ ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. އަދި މިސެޓުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ތިން ޕޮއިންޓްގެ ލީޑަކާއެކު އެޓީމުން ސެޓް ކާމިޔާބުކުރީ 22-25 ގެ ނަތީޖައަކުންނެވެ.
މެޗުގެ ތިންވަނަ ސެޓުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، 23-25 ގެ ނަތީޖާއަކުން ކާމިޔާބުކުރީ ޖޯލި ބީންގ އެވެ. އަދި ޖެހިގެންއައި ހަތަރުވަނަ ސެޓުގައި ޖޯލި ބީންގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، މިސެޓް އެޓީމުން ކާމިޔާބުކުރީ ފަސޭހަކަމާއެކު 12-25 ގެ ތަފާތުބޮޑު ނަތީޖާއަކުންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ޖޯލި ބީންގ ޝެހާން އެވެ.
މި މުބާރާތަކީ މީދޫގެ ކުލަބު ޖަމުއިއްޔާއެއް ކަމަށްވާ އެކުވެރި ކްލަބުން އިންތިޒާމުކޮށް، މި އަތޮޅުގައި ހިމެނޭ ރިސޯޓްތަކަށް ހުޅުވާލައިގެން 2023 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ.