ޖަޕާނުގައި 2026 ވަނަ އަހަރު ކުރިއަށްދާ އޭޝިއަން ގޭމްސްގެ ފިރިހެން ސާފިންގައި ދެކުނު އޭޝިއާއަށް ލިބޭ ޖާގަ ރާއްޖެއަށް ކަށަވަރުވެއްޖެއެވެ.
މި ފުރުސަތު ރާއްޖެއަށް ލިބުނީ ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕް 2024 ގެ މެންސް އޯޕަން ބައިގެ ކުއާޓާ ފައިނަލް ހީޓު އެކެއްގައި ރާއްޖޭގެ ހޫދު އަޙްމަދު ވާދަކޮށް، ނެރުނު ނަތީޖާއާ ގުޅިގެންނެވެ. އެގޮތުން މި ހީޓުގެ ތިންވަނައަށް ހޫދު ދިޔައިރު، އޭނާ ވަނީ 9.10 ސްކޯ ކޮށްފައެވެ.
މި އާއެކު އޭޝިއަން ގޭމްސްއިން ދެކުނު އޭޝިއާ ސަރަހައްދުގެ ޖާގަ ރާއްޖެއަށް ލިބުނުއިރު، ކުއާޓާ ފައިނަލުގައި ދެކުނު އޭޝިއާ ސަރަހައްދުން ވާދަކޮށްފައިވަނީ ހޫދުގެ އިތުރުން އިންޑިއާގެ އެތުލީޓެކެވެ. އެގޮތުން ހީޓު ދޭއްގައި ވާދަކުރި އިންޑިއާގެ ހަރިޝް މުތޫވެސް ތިންވަނައަށް ދިޔައިރު، އޭނާއަށް ސްކޯ ކުރެވުނީ 6.76 އެވެ. މީގެ އިތުރުން މެންސް އޯޕަން ބައިގެ ހަތަރުވަނަ ބުރުގައި ރާއްޖޭގެ ހަތަރު އެތުލީޓެއް ވާދަކުރިއިރު، އިންޑިއާއިން އެ ބުރުގައި ވާދަކޮށްފައިވަނީ ދެ އެތުލީޓުންނެވެ.
މި ނަތީޖާތަކާއެކު ރޭންކިންގައި ރާއްޖެއަށް ވަނީ ދެކުނު އޭޝިއާ ސަރަހައްދުގެ އެއްވަނަވެސް ލިބިފައެވެ. އަދި މި ވަގުތު ރާއްޖެ އޮތީ އޭޝިއާ ބައްރުގެ ހަތަރުވަނައިގައެވެ.
އޭޝިއަން ގޭމްސްގެ ފިރިހެން ސާފިން އިވެންޓުގައި ވާދަކުރުމުގެ ފުރުސަތު ރާއްޖެއަށް ލިބުނުއިރު، އިއްޔެ ރާއްޖެއަށް ވަނީ ސާފިން އަންހެން ޑިވިޝަނުގައި ވާދަކުރުމުގެ ފުރުސަތުވެސް ލިބިފައެވެ. މޯލްޑިވްސް ސާފިން އެސޯސިއޭޝަން (އެމްއެސްއޭ) އިން މައުލޫމާތުދޭ ގޮތުން 2026 ވަނަ އަހަރުގެ ގޭމްސްގައި ވާދަކުރާނެ އެތުލީޓުން ކަނޑައަޅާނީ އެ އެސޯސިއޭޝަނުންނެވެ.